|
معقول باقي من الشهر 10 أيام ؟
معقول باقي من الشهر 10 أيام ؟
معقــول راحــت منــه 20 ليــلة ؟
شفتوا أجل ؟ مرت بنا مثـل الأحـلام
مــامن جــديد وكلّــن يعيـش جيـله !
اللي معانا العام هـ العـام مـا صام
منهـو ضمـن مستقبله وش يجيله ؟
كـذا الحيـاة تمـرّ عـامٍ ورى عـام !
كـم فـرّقت بيـن الخلـيل وخليـله !
شف الليالي كم تقضت بـ الأعوام
وحنـا نقـول أن الليـالـي طـويله !
ياهوه صحصح عندنا لك خـبر هـام
نـص الأمانـي فـي الحقيـقة قتيله !
دنياك هذي حـزن وجـروح وأوهـام
ومـالك علـى دنيـاك مكـر وحيـله !
كـم واحـدٍ ودّع حبيبـه وسـط خـام
وعلـى حبيبـه حـدّر الـدمع سيـله !
بكـى فـراقه ! مـرّت أيـام مـانام !
بكـى وروحـه مـن فــراقه عليـله !
لكــن نســى إنــه كــذا بعـد أيــام
نفـس الأيـادي يــمّ قبــره تشيلـه !
يــارب عفــوك قبـل تلـتف الأقـدام
يـوم الخليـل يخـون عشـرة خليله !
ويــارب ثبتنــا علــى ديـن الإســلام
واللي خذاه الطيش تهـدي سبيـله !
أقـولهـا والعــمر لــو طــال مـادام
وإعرف سنين العمر ياخي قليله !
والحين باقي من الشهر 10 أيام
طـالبـك عــوّض فيــه 20 ليــله !
|