منتديات العاشق - عرض مشاركة واحدة

ℓєℓσυcн · #1 02-03-2013, 10:26 PM

اڷسڷام عڷيڪم ۈرحمـۃ اڷڷـہ ٺعاڷى ۈبرڪاٺہ

أسعد اڷڷـہ صباحڪم ۈمساڪم بأڷف خير إن شـاء اڷڷـہ.. !!

ۈ اهلا

بجميع اعضاء منتدي العاشق وخاصۃ رواد القسم الادبي

اتمني تڪۈنۈا بأتم اڷصحة ۈاڷعافيۃ إن شاء

اليوم اقدم لكم ان شاء اڷڷـہ ثالث مواضيعي بالقسم الادبي ان شاء الله يعجيكم

وهو عبارة عن قصص ساخره مكونه من عشرة اجزاء بعنوان يوميات صيدلي

والبعض طلب مني ان اكتب باللغة الفصحي حتي يفهمها جميع اعضاء

لكن هذا شبه مستحيل لأن القصه لن يكون لها معني اذا كانت بالفصحي

ففي بعض الكلمات العامية اذا كتبت بالفصحي فقدت معناها
ان شاء الله تعجبكم

اقدم لكم اليوم الجزء الثالث

وهذا الجزء به العديد من المعاني الصعبه التي لا يفهمها الا المصريون

لكن ستجدون في نهاية القصه شرح لأصعب المعاني

ويرجي اذا لم تفهموا اي كلمه من القصه

تكتبوها في الرد حتي اعدل الموضوع واع شرح ليهم حتي يستفيد باقي الاعضاء

لكن ارجوا ان ينال اعجابكم

لتحميل ملف الword الخاص بالجزء الثالث

تم ألغاء الرابط

تنبية .القصه خياليه ولا تمت للواقع بصله والشخصيات الموجودة بها من واقع الخيال
واي تشابه بينها وبين الواقع فهو اغرب من الخيال
اه نسيت اقولكم هذه القصه لجميع الاعمار
( المصريين فقط يعرفون هذه مقدمه اي )

العاملون علي الموضوع

مؤلف القصه : dr.mahmoud elmakawy صديقي العزيز
فكرة وتنسيق وكتابه الموضوع : lelouch lamperouge
تصميم : Assa550ssino المبدع دائما
تدقيق ومراجعه ووضع المفاهيم الصعبه : khaled2103
البنر

(يوميات صيدلى) .... الحلقه الثالثه

يوم جديد كالعاده .. قاعد مستنى فرج ربنا .. كل ساعه أبيع كيس جيل هيركود اخضر او حبايتين للصداع
.......................

واحده تخينه اوى ( ماشاء الله) داخلالى ....

- والنبى يابنى قيسلى الضغط لأنى هبطانه خالص ومش داريه بنفسى
-أنتى تأمرى يا حجه .. استريحى بس وخدى نفسك الاول
جبت جهاز الضغط الأثرى بتاع الصيدليه وانى أحاول ألِفه على أيديها مش عارف .. الجهاز مش جايب أيديها خالص طب اعمل ايه ؟؟
رحت لَفُه أى كلام حوالين أيديها وماسكه بأيدى (قال يعنى أتربط خلاص) ... وقعدت أنفخ عالفاضى ..
خمس دقائق من النفخ والهوا بيطلع عالفاضى .. والست تقولى :
-فيه مشكله معاك يابنى ؟؟
- لا يا حجه مفيش .. خلاص خلصت اهو
انا مش سامع نبض ولا أى حاجه .. طب أقولها إيه دى ما هيا اللى أيديها سمينه (ماشاء الله كمان مره)
:D
ومينفعش أقولها ان الجهاز مش جايب أيديها خالص ... بعدين اخر مازهقت ...
- قومى يا حجه 120 على 80 أنتى زى الحصان مفيش حاجه

..............
المفروض أى صيدليه ف الدنيا يكون فيها وسائل للتسليه

عالاقل لو مفيش كومبيوتر يكون فيه تلفزيون يسلينى شويه بدل منا قاعد خلقتى ف خلقة الادويه علطول كده

وعشان كده مقضيها نت موبايل على اما ربنا يفرجها بزبون ..

و فى يوم من الايام وانا شغال كومنتات عالفيس من عالموبايل فى الصيدليه وفجأه لقيت الصيدليه نورت.....

بنت زى القمر داخله ..وعلى وشها ابتسامه مبهجه تخليك تديلها اللى هيا عايزاه ببلاش ...

الصراحه اول مره وقفت فيها فصيدليه كنت برتبك جداً قدام أى بنت بتخشلى وخصوصا اذا كانت حلوه ... بس خلاص الواحد أتعود عالوضع

المهم .. لقيتها بتقولى بصوت واطى وحنين :
- لو سمحت عندك بُدرة بى وايت ؟؟
-بتقولى ايه ؟؟
- بُدرة بى وايت للتفتيح
- ايه؟؟؟

راحت ساكته شويه واحرجتنى بابتسامتها

- انا بجد مش سامع ممكن تعلى صوتك شويه ؟؟

- بقولك بُدرة بىىى واييييتتتت

المهم انا اتلخبطت و من ربكتى بقولها : (دى بدرة للشعر دى؟؟)
:D:D

- للشعر ؟؟ .. وراحت كاتمه ضحكه ف سرها و قايله : هو فين الدكتور اللى هنا ؟؟

..اوبسسس ... الصراحه كنت عايز الأرض تتشق وتبلعنى .. بس تمالكت نفسى بسرعه :

-اهااا انا اسف بى وايت لتفتيح البشره معلش أنا كنت ناسى اسمها بس .. اتفضلى

-عادى مفيش مشكله .. متشكره جدا .. ومشيت وهى لسا بتضحك فى سرها
..
انا ايه اللى انا نيلته ده ؟؟ .. هو فيه بدره للشعر اصلا ؟؟ ... دا زمانها بتقول لنفسها دلوقتى مين الغبى اللى موقفينه ف صيدليه ده

من يومها وانا لن انسى بدره بى وايت البمبى لتفتيح البشره اللى ب 3 جنيه دى
:D
............
واحد تانى اول مره اشوفه داخلى يقولى :

- مجدى حبيب قلبى واحشنى ياغالى والله
- وأنت اكتر يا باشا .. بس حضرتك مين بقه ؟؟
- انت مش فاكرنى ولا ايه ؟ انا وليد يا عم
- وليد مين لامؤاخذه ؟
- صديق الطفوله يا جدع .. مش فاكر زمان لما كنا بنلعب استغمايه والسبع بلاطات
-بردو لسه مش فاكرك
-طب فاكر لما كنا بنرن أجراس البيوت ونجرى بأماره لما اتقفشت مره من صاحب البيت و كلك علقة موت ؟
-بغض النظر عن أن الموقف ده حصل فعلاً .. بس لسه مش فاكرك .. المهم أأمرنى يا عم وليد
- والله يا مجدى بقالى يومين كده ظهرى ناقح عليا جامد ومش عارف امشى منه
- اه يعنى عايز حاجه مُسكنة ليه يعنى
- اه ياريت بس وحياة والدك يكون شديد اوى
- خد حبايه الصبح وحبايه بليل من شريط الكتافلام ده وإن شاء الله هتبقى تمام
- كتافلام إيه يا عم ؟؟ بقولك مش عارف أتحرك من ظهرى تقولى كتافلام ؟؟
-يعنى إيه مش فاهمك ؟؟
- يا عم مفيش حاجه حلوه من الحاجات اللى عندك جوه دى ويبقى جزاك الله كل خير
- ااااااااااه .. دانت بتلعب على كبير بقه .. قصدك ترامادول ؟؟
- ايواااااان .. الله ينور عليييك
- لا والله يا وليد مش موجود ( وانا عندى جوه بلاوى )
- ليه بس كده يا عم مجدى ؟ مش الصيدليه اسمها الدلوعه برضو .. عايزك تدلعنى بقه
:D
- أدلع مين يا عم أنت هو كوافير حريمى ؟؟ :S
- طب شريط واحد بس .. ده أنت حبيبى والله .. وأخوك عمرو من أعز اصحابى يعنى
- عمرو مين ؟؟ .. أنا مليش أخوات صبيان اصلاً
- الله؟؟ مش انتا مجدى توفيق برضو ؟؟
-توفيق مين يا عم أتكل على الله .. احنا ناقصين لبخه ف الكلام
...
فجأه راح راسم تكشيرة غضب على وشه وباصصلى بصه مش ولابد وراح حاطط ايده فجيبه بسرعه ...

إيه ده ؟؟ هو هيطلع ايه بالظبط ؟؟
انا شاكلى هاتقلب فى الصيدليه ولا إيه ؟؟

راح مطلع الموبايل بتاعه ومتصل بصاحبه وقايله :

ايوه يا مرسى .. معرفتش اشتغله يا عم .. شوفلى صيدليه تانيه بقه
:D:D

To Be Continueee .... ^_^

To be continuee .....

الاجزاء السابقة

يوميات صيدلي s1

يوميات صيدلي s2 ‏
ها وقد وصلنا الي نهاية الجزء الاول من السلسله

ارجو ان تعجبكم

ملاحظات
شكرا للمبدع خالد

بعض المعانى الصعبة:

واحده تخينه اوى: ببساطة فيل فى شكل امرأة
هبطانه خالص ومش داريه بنفسى: مريضة جداً ومش حسه انها كويس اكيد وعندها ارهاق
قومى يا حجه 120 على 80 أنتى زى الحصان : يعني ان ضغطها جيد
اللى هيا عايزاه ببلاش: مجانى
استغمايه والسبع بلاطات: ألعاب مصرية عتيقة والاستغماية هي لعبه ( الغميضه )
بأماره: يقصد الدليل
لما اتقفشت مره من صاحب البيت و كلك علقة موت: أمسكه وضربه
ظهرى ناقح: بيوجعه
الترامادول : مادة مخدره قد تستعمل في بعض الاحيان كالمخدرات
وانا عندى جوه بلاوى: يقصد عنده حجات أسوأ من الترامادول *.*
انا شاكلى هاتقلب فى الصيدليه ولا إيه: يقصد أنه هيسرق الصيدلية
باصصلى بصه مش ولابد : بصه مش حلوه تدل انه هيعمل حاجة غلط
معرفتش اشتغله يا عم: يقصد معرفش يخدعه

ها وقد وصلنا الي نهاية الجزء الثالث من السلسله

ارجو ان تعجبكم اسستودعكم المولـى

التعديل الأخير تم بواسطة The power ; 02-04-2013 الساعة 07:18 AM سبب آخر: الغاء رابط التحميل^^