( 6 يناير )
(نَجونا مِن الطوفان.. ولكِن سيُخيفنا الماء للأبد )
اهلا وسهلا ..
بعد عقد اجتماعات و مناقشات بيني وبين عقلي
ولكثرة الاختبارات والمذاكرة ، قررت انني احاول اكتب المدونة بالاسبوع مرة وحدة وبتكون يوم الخميس او الجمعة .. ، لان الكتابة هنا تاخذ مني حول ساعة كاملة
تذكرت حدث حصل لي العام الماضي
..
بدايةَ.. (هل من الممكن ان تضحي ببعض الدرجات لأجل المتعه
)
في السنة الماضية - التحضيرية - ، كان مقرر علينا ندرس انجلش و بعض اساسيات الطب ،
بالانجلش كنا اسبوعيا .. نسوي كوزين ببداية الاسبوع ، واخر الاسبوع يكون عندنا اختبار للوحدة الي اخذنها كاملة + اختبار اسبيكينق ( نتكلم فيه من دقيقة الى 4 دقايق عن موضوع مختلف كل اسبوع ) المهم ..
مشيت الايام والشهور .. كانت بعض الاختبارات بسيطة وجبت فيها درجات عالية واخرى مثل وجهي الجميل وجبت فيها درجات نازلة
، الى ان وصلنا لاخر اختبار !!
كان المفروض ان نجهز لاختبار الوحدة ، ونجهز لاختبار السبيكينق حق الاسبوع النهائي ..
ف كالعادة كتبت السبيكينق تبعي وتدربت عليه شوي .. الا فجأة خطرت ببالي خطة خنفشارية !
جا على بالي ان اكتب الاسبيكنق بسجع واحد
، بسجع واحد يعني مثل اغاني الراب ، يعني تكون نهاية الكلمات وحدة
!!، ولكن خفت ان المدرس مايعجبه ويعطني درجة نازلة ، ولكن كان ودي جدا اني اجرب هالحركة .
ف قلت ماابي اخلي شي بخاطري
، والله وكتبت الاسبيكينق بسجع واحد ، وصار كنه راب
وجهزت له وسويت بروفا اكثر من مرة واستعديت كويس .
وجا اليوم الي بعد ، وبدأ الاختبار وبدأوا زملائي يطلعون ويلقون .. الى ان جاء دوري !
طلعت وبديت اقول موضوعي ، بالبداية شفت المدرسة حط درجة مععينة وقعد يسمعني بس .. ولكن بعد برهات غير الدرجة لي كان حاطها
.. الى ان انتهيت .
لقيت اطراء جدا من زملائي واعجبهم الاداء
، واهم شي انا استمتعت وانا اقوله كان شعور غريب اني سويت شي غير المعتاد ، غير ان حتى زملائي استمتعوا معي لانه غير معتاد . وانا حسيت بنشوة الانجاز ههه
أما بالنسبة للدرجة ، ف المدرس عطاني درجة النجاح بس هههههههه
ولكني ماتندمت ابدا اني سويت هالحركة ، كانت ذكرى ممتعة و تجربة فريدة !
شرايكم انتوا ؟ تضحوا ببعض الدرجات للمتعة ولا لا ؟