(13 يناير )
(A day without laughter is a day wasted. - Charlie Chaplin)
بسم الله الرحمن الرحيم
اهلا وسهلا جميعا ..
اتمنى ان تكونوا بتمام الصحة والعافية .
كنت ناوي اتكلم عن موضوع الحش بالاوادم ( الغيبة )
واقولكم سالفة عليه ..
بس امس كان يوم جميل جدا طغى على موقف الحش ههههههه
امس الخميس والذي يوافق ( 12 يناير ) كان يوم جميل
كنت متواعد مع أصحابي بعد المغرب ان نطلع ، و خرجنا جميعاً نلهو ونمرح .. الا ان تفاجأت ان كان (عيد ميلاد ) أحد أصحابي و كان في اثنين من أصحابي جايبين له هدية وخالصين بالسر
..
ف سوينا خطة لطلعتنا وكانت كالتالي ( نروح نتمشى ونروح نقضي كام شي من اسوق التميمي ثم نروح نتتعشى و نجلس بالجو الجميل الحديقة اخر شي ) طبعا صارت هالاتفاقيه بعد مشاورة دامت 15 دقيقة
..
المهم .. تمشينا ثم رحنا لأسوق التميمي نتسكع ، وكنت اتمشى مع أحد اصحابي ورحنا قسم المخبوزات ، ف كنت أمازح صاحبي واقوله - ( وهذا الشخص مشهور بقروبنا ان اكثر واحد يجيب هدايا ) - واقوله "شرايك نشتري هذا الكب كيك ونحط بوسطه شمعه ونعطيها فلان ونقوله هذا هديتك
" ؟ << واضح ان الاحوال المادية تعبانه هههههههه .. كنت انا امزح يعني بس ، مااشوف الا صاحبي عجبته الفكرة وأخذ الموضوع بجدية جداً ، وأخذه الحماس قال " عندي فكرة أحسن ، بطلع بجيب له كيكة وافاجأه فيها
" ، استغربت انا، بس قلت له براحتك ! ( انا انسان ماعندي بهالحركات .. اذا كلش بجيب لواحد هدية يمكن اصفق الكيكة بوجهه
)
ع العموم كملنا خطتنا احنا .. والرجال راح يجيب الكيكة ويضبط الوضع .. والجماعة مستغربين انه تأخر وكل شوي ييتصلون عليه
، (كان عذره انه انشغل مع أهله واضطر يتركنا شوي ويرجع )
..
المهم وصلنا لأخر الجدول ورحنا الحديقة كلنا
..شوي الا دق علينا صاحبي ( الي عنده الكيكة ) وقال ان تعطلت سيارته و بنشر كفر سيارته وقال تعالوا لي
( هذا جزء من المفاجأة عبارة
)
الشي الجميل جدا بالموضوع .. ان كان مجهز سيناريو معين عشان يتفاجأ صاحبي الي عيد ميلاده اليوم .. ولكن كان السيناريو ضعييف ججدا ههههههههههه ، كنت واقف مستغرب و مو فاهم شيحاول يسوي
وكان الوضع غريب جدا لان ماحد يدري سالشسالفة اصلا ههههههه ..
وبعد محاولات تلميحية شديدة جدا بالاخير وبعد عناء شديد تفاجأ صاحبي الي عيد ميلاد كان بنفس اليوم وعطاه الكيكة بعد جههد جهيد .
الشي الجميل ان الموضوع اخذ حول 10 دقايق على ماخلص السيناريو وعطاه الكيكة ولكن قعدنا نضحك على الي صار حول ساعة كاملة واحنا نردد الي صار ونضحك ههههههههه
لان كل شي كان ضعيف بالقصة الي اخترعها (صاحب الكيكية ) عشان يفاجئ صاحبي الثاني
.. فكان جمال الموضوع انه ماضبط عدل وان السيناريو كان ابو كلب وكل شي كان غلط فيه لان بالنهاية ضحكنا كثيير والله وصاحب عيد الميلاد استانس جدا وقال ان " هذا اليوم كان أحد أجمل أيام حياتي" بالرغم ان مافي شي من الي حصل كنا مخططين له من الأساس وكل شي خطط له صاحب المفاجأة كان فشل الا اننا استمتعنا وضحكنا كثييير
.
هنا نعرف ان اجمل الأشيا قد تأتي مُصادفة مِن دون سَابق تخطيط ، و جَمال الأشيا قد يَكُون بفقد جِزء منها وليس بإكتمالها ! المَهم اننا نعيش لحَظاتنا مع اصدِقاءَنا ، اقرباءَنا ، ومع من نحب . نتشارك معهم الضحِكَ والأجواء السعِيدة مُتناسين كَل مايجلِب التَعاسة حولنا في هذا العالم المَرير و فِي هذه الدنيا الدنِيـَة .
فلو ان السيناريو الي كان مُخطط له ضبط ، ماكنا انبسطنا بهذا القدر
الحمد لله يارب ، الله يجعل ايامكم مغمورة بالسعادة والضحك
صارت لكم سالفة كذا خربت عليكم وضحكتوا عليها كثير من قبل ؟
هههههه
كونوا بخير!