( 2 فبراير )

(إجااااازة )

اهلا وسهلا بكم جميعاً ..
اتمنى ان تكونوا بتمام الصحة والعافية ساداتي اخواني وأخواتي .

أعتذر الاسبوع الماضي مانزلت شي ولكن لسبب ستعرفونه بعد بُرهه .

حقيقةً خلصت البلوك التعيس بتاريخ 25 يناير (مما يعني ،قبل عيد ميلادي بيوم واحد )
ولا أخوفيكم سراً اني انسبطت انبساطا كثيرا بإنتهاء البلوك ، ( املا بالنجاح اولا ثم التفوق ) .
لذلك و بِناء على الي مَضى قررنا نروح باليوم اللي بعد اخر يوم دوام دببي !!!
ودي افصل بالكلام كثير ، ولكن سيطول الموضوع جدا لو فصلت ، لكن (what happened in dubai stays in dubai ) هذا كان شعارنا يوم وصلنا الوطن ههههههه .

دُبي .
و تُسمى بدار زايد وتُكنى بَـ دَانة الدُنيا ! ، انطلقنا يوم الخميس 26 يناير والمقرر اننا نقيم هناك 4 ليالي .، ووضعنا جدول الرحلة بالطريق بعد مناقشات و جدالات عنيفة ومُدمِية انتصرت فيها انا بفرض خطة سير الرحلة ، سرعان ماوصلنا اول يوم بعد رحلة بالسيارة دامت حول 6 ساعات ، وضعنا شناطنا الفندق وبدينا الجدول ! ..
و رحنا مكان قفز ! ، اي نعم مكان بس حق قفز وحركات بهلوانيه ، قد يخطر على بالك ان هذا الشي طفولي ياصديقي ، نعم انه كذلك ولكن حين يكون الأمر متعلق بالمتعة فإننا جميعا نرغب بأن نكون اطفال هههههههه ، كان ممتع المكان في زي النطيطة ( مكان للقفز ) واحنا نقفز فيه لأعلى وروحنا معنا تحلق عاليا،متناسين نكبات البلوك الماضي واملين بغد أفضل حتى ولو تكسرت عظامنا من كثر الطيحات الي طحناها بس مستمتعين و نضحك ع بعض ، و بس خلصنا رجعنا الفندق متكسرين وجايعين ورحنا المول وتعشينا ( هنا فيه قصة ثانيه بس لا يسع الوقت هههههه) .

وبعده بيومين رحنا الألعاب (IMG ) كانت ممتعة وخطيرة ، لدرجة اننا في لعبة لعبناها حول 4 مرات متواصلة ههههههه وهي عبارة عن قطار يمشي بسرعة جنونية على سكة ذات انحناءات مختلفة ( الإفعوانية ) كنت خايف بيني وبينكم بالبداية اركبها بعدين صارت ادماان ، و بعدين دخلنا محل اسمه فندق الرعب ، كان مرعب وممتع ،لدرجة ان في بشر من الجنس الناعم قاموا يصيحوا من الرعب وانا اضحك ومستانس ، يعني تخيلوا تدفعون فلوس عشان يرعبونكم ههههههه .

هذا باختصار ججدا عن الرحلة .

كانت الرحلة كلها بتوفيق من الله سبحانه ميسرة و استمتعنا جدا ، وغيرنا عن الجو الدراسي التعيس .


وانتوا كيف كان عطلتكم أو اسبوعكم ؟
زرتوا محل جديد ؟

كونوا بخير !