الثلاثاء بالليل الاربعاء الصبح والليل والخميس الصبح.
كان عيد الهالووين وكان عليا شفت ليل وهدا التاريخ كصص صارت فيه، انه ميلاد امي، وذكرى وفاة ام صاحب عزيز عليا، طلبت من الصغار يخبولي شكلاطه، وانا بالشفت تبعي ضليت فاتح الخط مع صاحبي طول الليل لان بتكون نفسيته زفت عشان ذكرى وفاه أمه، الله يرحمها ويرحم جميع اموات المسلمين، وبكون الخط اغلبه مفتوح بدون ما نحكي، بس نسمع أنفاس بعض، وكنت تعبانه ونعسانه واشتغل غصب عني، ولما اخدت بريك وكعدت ع الكنبة اغفيت كالعاده، كأنه جسمي بكون يستنى يكعد لينام غصب عني، وكنت عالخط مع صاحبي كمان لما اغفيت وما اصحيت الا ع رنة البلفون وكان هو وبحكيلي (نمتي وتركتك وحبيت اصحيكي احسن تروح عليكي نومه) سألت إذ حكيت اشي وانا نايمه أو اد طول وهو فاتح الخط ما جاوب، وكملت الشفت، واجى الصبح وكان عليا موعد مع البنك لان التحويله للاجار مش زابطة، جنني صاحب الدار حسبي الله عليه، كل اشي مرمي عليا وانا بكون اطارد كأنه لحالي عايشه فيها، فا اطلعت من الشغل وكنت جد لسا تعبانه، بزعل من حالي لما اكعد يومين ولا تلات بدون نوم، او انطارت اناملي كلهم عبعض ساعتين، حكت معي فيث وسألت اد بكدر اطلع معاها لو مش تعبانه من الشغل، حكتلها (والله تعبانه وماكله روح الخل ومكسور عليا النوم ومع هيك اكيد بدي اطلع معك بس اخلص من كصة البنك) وبالزبط خلصت كصة البنك وانا بالطريك عالبيت اتصل عليا صاحبي "فيس تايم" كلهم نفس الكصة وهو لما يحلكوا شعرهم بيتصلوا كميرا، عساس يعني راح يحلها، او عاساس بهمني كيف مناظرهم، المهم عشان كنت احكي معه حبيت اروّح عالبيت مشي وما اركب الباص عشان اخد راحتي لان بالشارع احسن عندي من الباص، وغير انه البنك مش بعيد من البيت، واوصلت البيت وحكينا شوي وحكتله (خلص بدي اطلع) وعاودت اطلعت عشان اتلاكا مع فيث عند راس الجبل، اشتريت ضُمة ورد لفيث هيك بدون مناسبه، من المحل اللي كنت استنى فيه، الضُمة اغرتني واشتريتها، واجت واخيرا لانها دايما بتجييش بمواعيدها، وطلعنا وكان كتير في حكينا بينا وكصص وضليت معاها للاربعه العصر، اجيت عالبيت اكلت ورتبت البيت الا صارت المسا، ولاني كتير تعبانه واعصابي مشدوده، روحت اتحممت، ما اطلعت الا مروّح اخوي تلات من الشغل ومكانش فيا حيل اسمع كصصه بس ضليت متمدده ع الكنبة بالصالة لوكت ما اتصلت فيث عليا، وحكتلي انو اتزاعلت مع امي وشو رأي امي بكصة مهمه نفسي انا اعملها، وانو امي مش موافكه بالمره وحكت مستحيل انها توافك لو شو ما صار، وهاي الكصة من حوالي تلات أسابيع، وهاي الكصة عملت فجوة بيني وبين امي لدرجة بطلت احكي كتير معاها، وحتى يوميتها يعني الصبح لما حكت معي امي سألتني ( انتي مرتاحة وكيف نفسيتك ومبسوطة) فطست ضحك عليه وحكتلها (شو هالسؤال يما) وغيرت الموضوع، يمكن عشان لماشوفت ايمان حكيت حكي ما لازم ينحكى من كتر ما كانت امفكعه معي، راحت التانيه حضرتها تحكي مع امي وما طلع معاها نتيجه، بس انا جد لما اسمعت شو حكتلي ايمان وشو صار بينها وبين امي ، راسي كان يوجع وصار يضرب عليا بزيادة وصرت ما افهمش شو فيث بتحكي، لهيك حكيت لفيث خلص بحكي معك بكرا مش كادره، وانا ازعلت بصراحة من امي، سحبت حالي ورنيت ع امي وحكتلها اني نعسانه تعبانه بدي انام ما ترجعي تتصلي عليا، وعملت حالي معيش خبر شو صار بينها وبين فيث، وليش اتصلت عليها لان بعرف هذا موعدها لتحكي معي وبديش احكي لهيك سبكتها، وحكيت لاخوي تصبح عخير، خبطت هالباب وطفيت الضو وبعتت مسج لصاحب انو ما يتصل عليا الليله لاني وعدته احكي معه، في عندي اصحاب بيتصلوا عليا بس حكي سريع وفي منهم حكي طويل خاصه انو اغلبهم عندهم كصص ازفت من بعض، ولاني بحب اسمعلهم لهيك ماخذين راحتهم يحكوا وكت ما بدهم ، وهاي المره بسرعه نمت وكنت مكهوره، بس اول ما اتغطيت بالحرام كانت ريحته عطر اخوي واحد، لان الليله الماضيه كمان ناموا بالصالة عنفس الكصة بس انا كنت بالشغل شفت ليل، فا اخوي أخذ حرامي من غرفتي ولاني منمتش بالنهار فا معرفتش انو الحرام ريحته عطر ، ايش المشكله بانو ريحته عطر؟ انو عطره وعطر حبي نفس الشي وانا بضعف وبكدرش اقاوم الريحة، بس لاني كنت تعبانه كتير نمت بسرعه واللي بكهر اني احلمت بحبي ينعن شكله بس وبابتسامته الصفرا الخبيثه، بنص الليل مش عارف اي ساعه اصحيت عالبلفون برن، ولاني كنت تعبانه فا اتأخرت تا انتبهت انو البلفون برن، وحتى بلفوني كان تحت أجريا، مش عارفه كيف كنت شايطته غاد، لهيك اخدت وكت وانا ادور عليه عشان ارد، وعم احاول كد ما اكدر اني اركز عالاسم ت بالاخر شوفته ورديت، لان مرات الاسم بفرق من حد لحد، يعني في تلفونات برد وتلفونات لا، مع انه حكى بدوش يتصل وانو من حقي انام لان هي هالليله اللي بكونش فيها عليا شفت ليل من طول هالاسبوع، واتصل!كان صوتي مختفي وبلش هو بكلامه اللي بخليني اكشعر، وبلشت اسمعله، انتبهت ع ضو المطبخ مضوي، كومت اطفيه، ما فتحت باب غرفتي الا اخوي ومرته نايمين بالصالة، حكيت بعكلي اخلع مش وكته، كيف بدي احكي مع صاحبي ولازم احكي بكدرش اتركه بهيك وكت، ليش هم نايمين بالصالة؟ لانو في فار بغرفتهم ومرته بتخاف بلاوي ومستحيل تعبرها الهبله، لهيك اجو ينامو بالصالة، وعاملين ضو المطبخ زي نواااسه، حكيت مش مهم اد اخوي بسمعني بس بديش مرته تسمعني، لان ياما اخوي كان بسمعني، ومع هيك ضليت احكي مع صاحبي لوكت ما هو حكالي روحي نامي وبرجعلك، وبالزبط بعد حوالي ساعتين رجعلي وهاي المره فيس تايم، عشان طلع النهار عندي، يعني مش نايمة من يوم الأحد، ووجهي منّفخ وحالتي حاله، ومش مغسله وجهي كمان وبتصل كميرا ، ومع هيك حكيت يا بنت، ردي وانسي، مش لهدرجة اكون ماخده ع اصحابي، مش لازم هيك، بس بعرفش مرات خلص بتعوّد عليهم وبهمنيش كيف يشوفوني، حكينا حوالي نص ساعه واتسهل، وكنت بستنى باختي هوبز لان كانت بدها تيجي عندي، وفيث اتصلت عليا لتتطمن عليا انو كيفني ونفسيتي، المهم اجت هوبز حوالي الظهر حكتلها انو ايش رايك نطلع مليش نفس اضل بالدار، واطلعنا وكتير حكينا وكتير نصحتني بالكصة ومع هيك بهاي الكصة انا مش عارفه افكر منيح وصلاه الاستخارة مش زابطة استغفر الله، وارجعت عالبيت وكملت تنظيف البيت وما كعدت الا حد من اصحابي بيتصل، حكينا شوي ومتأكده انه كان شارب بس عمل معوش خبر وكان مخنوك، صرت احكي بعكلي شو احكي انا، وهيني بالطريك عالشغل شفت ليل والله يهونها، ومتأكده راح تكون صعبه.