مأساة روح {هالكه} في اوراق تائهه ~

السلام عليكم ..~


اليوم هو الاحد وعندي الساعه حوالي 10 ونص بالليل || 10\21\18

؛

امبارح بعد ما خلصت كتابه بالمدونه , حكيت مع امي وبعدين مع خواتي كميرا , وبعدين جهزت حالي واتسلهت عالشغل وكانت ليله صعبه , بس ما نمت طول الليل من كتر مهي صعبه مكدرتش اترك البنت لحالها (فرجينيا ) , وحوالي ع 7 ونص الصبح لما كان ضايل حوالي نص ساعه وبنتهي الشفت تبعي , كعدت شوي الا انا نايمه , ما اصحيت الا ع صوت شب الشفت الصباحي , حكيت اخلع ليش فرجينيا ما صحتني , هكليت بعمل فساد ومشاكل , بس يا رب لأ , بسرعه جهزت حالي بس ما مشطت شعري , حطيت هالطكيه ع راسي واطلعت , واتاخرت ع الباص الاول , والاوبر كان غالي , حكيت بديش اوبر , حوّلت طريكي لباص تاني والله هوّنها عليّا الحمد لله , وانا بالباص كنت احكي مع امي , وكنت اقرأ , واوصلت البيت حوالي 9 ونص الصبح , مكنتش جعانه ولاحتى نعسانه , بس كنت تعبانه اشي مش طبيعي , اجيت رميت حالي عالتخت وحضرت ساده بعيّط عشان محكيتش معه وكاعد بتحركش فيّا , عفكره جسمي كله مشطّب من حضرته , لانو بضل ينط عليا ويلعب معي وانا نايمه , او وانا اتحرك , او انا كاعده , المهم كل ما بشوفني الا ما يصحلّي خفشات منه , لانه زنخ اشي مش طبيعي صاير , واد محكيتش معه يضّل ينادي , بعدين اجاني تلفون من اختي اماني , اليوم كان حد من معارف اهلي بده يجي عنا , واتفكنا امبارح انو ما نعمل غدا اكل , هو انا اللي ضليت ورى الكل انو لشو نعمل اكل , لانو عنجد بديش اتعب واتعبهم والطبيخ في العزايم حاله وعجكه وانا بالاصل بكره حد يجي عندي , ف كيف اعمل طبيخ , لما اماني اتصلت حكتلي كال " طولي اللحمه من الفريزر بدنا نطبخ للضيف , وروحي شوفي المسج اللي امه الضيف باعتاه " حكيت طيب وانا مفكعه معي , طولت اللحمه وروحت اشوف المسج اللي امه باعتاه , ينعن شكلها امه , عنجد يعني اللي استحو ماتوا , كال بتحكي بالمسج انو نحترم ابنها وكل هالحكي الفاضي , انا لما قرأت المسج كنت بدي اكسر البلفون , والله ناس اخر زمن , هدا الناكص , حد يتفلسف علينا كيف نتعامل , والله شغله , طبعا ضل الحكي بتمي لوكت ما اجو عندي خواتي عالظهر , وخواتي حكو فش اشي بكلامها ؟ فش اشي ؟ لا حول ولا قوه الا بالله العلي العظيم , قبل ما يجيوا خواتي , ضليت عالتخت اتحرك واتكلّب لانامي وعالفاضي , وبعدين بحدود الظهر اجاني طلبيه من الامازون , وضل يرن بالجرس تبع البيت ينعن شكله , وسبحان الله كل شخص في رنه مميزه , يعني بعرف لما ايمان تيجي عندي من الرنه , وبعرف اخوي واحد , وبعرف لما تيجي اماني , لانو كل واحد برن شكل , بس هاي المره معرفترش مين , وطلع الامازون , اخدت الطلبيه , الا اختي اماني بتصل وبتحكي اطبخ اللحمه , حطيت اللحمه , وحكيت هلكيت بكدرش انام والغاز موّلع , بعدين اجاني تلفون من اخوي تلات انه بالطريك , اجى وبعد بشوي الا خواتي اجو , اجتمعنا وهم عملوا الاكل , وحضرت الضيوف شب مع مرته واولاده , وكان واعدنا ع 2 وبعدين اتصل وحكى ع 3 , وحضرته اجى ع 4 , يعني انا شوي بدي اقتله , لانه ربطنا , طيب كعدنا وملان حكي صار, بس انا صبيه عنجد بحبش اتعامل مع الناس لاني صريحه وبعجبهومش كلامي ودايما بالجلسات اللي بتصير بحكو عني كويه , كويه تطلع بعيونهم وارتاح منهم عمى يعميهم كلهم كلهم , لهيك بكون احكي لخواتي هي انتو موجودين ليش اطلع اسلّم واكون بالجلسه , بحكو لازم كال انا اغيّر من حالي , لازم اجامل وانافق واخفف من جواباتي , بديش .. لا اريد , عمى يعمي كل حد مش عاجبته ولعمره اعجبهم , هدا الناكص عشان امشي والكل يحكي عني منيحه لازم انافق , بديش ..~
بعدين خواتي اتسهلوا , وضلوا الضيوف حوالي كمان ساعتين بعد ما خواتي راحوا , انجلطت وانا كاعده معهم واخوي تلات , بس الاشي اللي عنجد ضحكني هو انو الشب بخاف من الهرر , ههههه , عنجد سامحوني بس اد كنت شب وتخاف من الهرر وصار موكف كدامي , انا عنجد مش راح اوكف ضحك عليك مين ما كنت , الشب وكف لما ساده اجى هيك ركاض عليه , اخ يا ربي كعدت اضحك وبصوت كمان .. وبعد ما راحوا , بتعرفوا العزايم جلي ليوم الجلي , الحمد لله اني الليله انا نايمه بالدار , وهيني ..~

||



؛



هدا هو الشط المفضل عندي لحد الان , وهو اول شط شوفته لما اجيت ع امريكا , وهو كان جمب بيتي الكديم اللي كنت مستأجره , كان بعيد بس عشر دكايك مشي وكنت دايما اروح عليه وخاصه لما اكون مدايكه , من فتره خواتي حكو بدهم يروحوا عليه وما صدكت وكديش انبسطت , في هدا الجبل بالصوره التانيه في مغاره صغيره بس مش مبيه وهي مكاني السرّي اللي دايما كنت اروح اكعد فيه وما بتسع الا اتنين , كتير كنت اتسلّق الجبال هاي وانزل عالشط لانو فش كتير عالم عليه هدا الشط , لانو لازم تتسلق الجبال , فش طريق سهله من مره , وكنت لما اوصل البيت اصحى تاني يوم مش كادره امشي لانو اجريّا راحين فيها واكل مسبات من امي ..~