مأساة روح {هالكه} في اوراق تائهه ~

السلام عليكم ..~

اشتريت شويت اواعي بس مش متزكر اد قبل رمضان او في رمضان .. هم ابوات اللي هو جمع بوت اللي هو الحذاء .. احنا بنحكي عنه بوت , وانا صبيه بستهلك ابوات كتير وكتير بيخربوا .
وغير انه انصحت الحمد لله انا ,لانو امي هون ولانو بحب الاكل وبحب اكل حتى لو اني مريضه بس باكل غصب عني عشان من غير شر امي مش دايما هون تطبخلي , لهيك اشتريت كمان جينزات , واحد على ذوق امي وواحد على ذوقي ..~

؛



اكيد الورد ذوق امي والتطريز ذوقي , كل واحد من الجينز كان سعره 15$ لحاله ..~

بحب االجينز الخصر العالي لاني قصيره , وبحب الجينز القصير كمان , ولاني بعشق التطريز فا شوفت كلشي بدي اياه بهدا الجينز ومش ديّق كمان , وكتير البسته ومريح وعاجبني , ومنيح للشغل , بس مش اسم وانا بحب البس اسم لهيك اشتريت ليفايز بحكي عنهم بعدين ..~

اما بخصوص الورد هدا ذوق امي وامي بتعشق الورد وهي حكتلي اشتريه , ولحد الان بالخزانه ما البسته , مش لاشي , بس انا هيك صبيه بتحب تعشق وتدمن اشي لوكت ما يخرب , وبحبش انوّع بالاواعي كتير ..~

؛





مش كتير بحب سكتشيرز , مع انه خفاف ومريحات , بس بعرفش بعجبونيش , بس انقطعت من البوات ولفيت وما لكيت الا هدول اصلح اشي , وبعرفش يكون عندي بوت واحد بس , حتى اللالوان كمان مش عاجبيني , ولحد الان ما لكيت البوت اللي بدي اياه اخ بس ..~
اشتريت الواحد لحاله 25 $

السلام عليكم ...~

احكي شوي عن الفضه , بما انه امي جبتلي باكي الفضه تبعتي اللي كانت بالضفه لانو كانو ضايعين , وغير انه مرت اخوي كمان سرقت تبعاتي ولما انكلعت من الدار شوفتها مرجعتهم , عشان ما اظلمها هي مش سرقتهم , هم اخدوا غرفتي وانا كنت حاططهم بالغرفه , وحكتلها وحكيت لاخوي في عندي كم غرض ضلوا بالغرفه بدي اياهم , حكو فش , حكيت بعقلي ابصر لعاد وين حاططهم , ومع هيك كنت مكهوره عليهم لاني بعشق الفضه ولانو في هدايا ولانو فيه من امي , بس لما انكلعوا لكيتها حاطاهم بالبكيت مع كمان اواعي الي ولانها الحيوانه حاطهم ع بعض من فتره طويله في فضه لونها صاير اسود , ونصهم زي الحلّق ضايعين , انجنيت بزياده ..~

؛



هاي ساعه من ماركه southwest traditions , هاي الماركه عن حالي بعشقها وبعشق تصاميمهم بعتبرها اخت شلن , واول ما شوفت الموقع عالنت اضعفت , وحاولت اشتري اشي مش موجود عندي , لهيك شوفت الساعات وعجبتني الفكره , وحاولت كد ما اكدر اشتري من ارخص الانواع , لانو غالي كلشي عندهم ينعن شكلهم , حوالي سعرها اللي بتزكره 150$ او 200$ ..~

؛



لما البس اشي زهري احب البس هدا السنسال عشان الدهبي اللي عليه, كتير حلو وخفيف , بس مشكلته مرات بيلف على شعري ..ومش فضه اصلي ..~

؛



هدا الحلق كل ما البس فضه لونها على اسود بلبق عليه , خفيف جدا وعملي رهيب وناعم . فضه اصلي ..~

اما الاسواره هاي من امي وعندها اربعه , تنتين فضه وتنتين دهبي , الفضه مطليه بالفضه والدهب مطليه بالدهب, بس كتير خفاف , انا وفيث بنحب الفضه وامي واختي هوبز بحبوا الدهب ..~

؛



هدول كطعتين دايما بحب البسهم دايما , واللولو بكون نص لولو , يعني مش اصلي بس كمان مش رخيص , وهو فضه اصلي , وهدا الحلق عملّي رهيب بحب البسه مرات عالشغل شفتات الليل لانه مريح , ختى لو فيه خرز ضايع , حتى مرات بنام فيه لانو بحسش فيه ..~



؛




هاي الخرزه تبعت امي , مرات بلبسها ومرات هي بتلبسها , وهي فضه, ومع هيك بفضّل البس الزفير الابيض اللي من حبي اكتر ..~

؛



الكطع المميزه عندي .. الحلق الليره اللي من اجداد امي اللي حكيت عنه بمشاركات سابقه , اما هدا السنسال اللي اشتريته من الضفه بمبلغ مرتب لانو تكيل ولانه فضه اصلي كديمه , البسه بالمناسيات الكبيره لانه ملفت للانتباه ..~

حكيت عن الفضه اللي كنت البسها خلال هالشهرين وراح اكون كل فتره احكي عن الباكي ..~

.

السلام عليكم ..~

اليوم الخميس 7\5\18 وهلكيت الساعه بعد العشره ونص بالليل ..~

ومجرياته , كنت بالليل اضل اصحى اطمن على امي اد هي نايمه اد لسا متوجعه وكل هالكصص , واصحيت حوالي 8 الصبح لانو كان عليا شغل , بسرعه افطرت واشربت كهوه , وجهزت حالي واتسهلت عالشغل , وبعدين اجت اختي فيث تاخدني من الشغل وتوصلني عالبيت لانو امي كانت اليوم مريضه , وبعديت اجت اختي هوبز عنا وكانت التانيه مريضه , وبس ..~
هدا كان اغلب يومي , الكل مريض .
وانا زي عوايدي مش طايك حد وبحكيش مع حد وبتجنب الكل .

||



خايف من حالي على حالي .~

السلام عليكم ..~

عندي الساعه بعد 11 بالليل واليوم هو الجمعه 7\6\18,,~

مفش اشي محرز صار اليوم , بس زي عوايدي وهو اتقاتل مع اهلي , واليوم مقتل اخو شلن من الظهر , وكالعاده بصلّح الغلط بالغلط ..~



؛

مرات في ناس بتقعد ربع ساعه وهي typing لدرجه بتفكر انه راح يعترفلك بحبه , وبالاخر بكون كاتبلك "كياف حلك؟"

الحمد لله بخير الله ياخدك ..~

|

السلام عليكم..~

اليوم السبت والساعه شوي وبتصير 11 بالليل 7/7/18

بعرفش ليش لليوم بغلط بكتابه التاريخ ولسا بفكر انو احنا بشهر سته، انا هيني بالشغل شفت ليل، والله يهونها عليا.

اما بالنسبه لمجريات يومي فا الحمد لله امي اليوم كانت صحتها منيحة وهذا صار سبب كبير عنا انو المهم امي تكون صحتها منيحة، واجت عنا اختي هوبز وطول اليوم واحنا بالبيت مرتاحين وبنم عالناس، بالعاده الايام اللي بكون عندي شفتات ليل بحاول اضل بالبيت مرتاحه، ومع هيك لسا بمشاكل مع اهلي، ولما حكتلهم خلص "انا ازهكت"، اكلت كتله مرتبه منهم مع تسميع حكي انو" فش اشي الا زهكته، امي زهكته ، خواتي ازهكتهم، اخوتي ازهكتهم، اصحابي ازهكتهم، شغلي ازهكته، الا حبي " كال انا ما ازهكت حبي، دايما بكل مشكله وطوشه بينا بدخلوا اسم حبي بالنص، انو كل اللي يصير فيا منه، مرات بهونش عليا يسبوا عليه، ومرات بضل ساكته وبحكيلهم انو صحيح كلامكم، لانو عنجد كلامهم صحيح، الكصه انو انا بدي اتجوز ومش زابطه، بلوموا حبي انه بدعي عليا، لانو لما ارتبطت اول مره اجتني دعوه منه وهو دعائه العاطل بزبط، وتركت اللي ارتبطت فيه، وعا كد ما احنا بصير بينا حكي فش نصيب وافهم يا ابن العالم، لسا بدعي على أي واحد بدي اخده وحتى مرات عليا، مع انه هو كمل حياته، هاي انانيه الزلام، ولسا لليوم بضل يحكي انا نافسك لآخر يوم ومش مطلعك من نفسي، وبضل يتحلّف لما انزل عالضفه، بتمنى يكون كله حكي فاضي..

هاي كصه لما تحبي حد بايع حياته، تبع سجون، الله يحلها من عنده، عشان اريّح بال امي وخواتي لانو كتير مكهورات عليا وصاروا يتكاتلوا معاه بطرق غير مباشره وحاله.. وعندي امي أهم منه وصحتها كتير أهم.
بس كله بأثرش ع مشاعري، لان ع كد ما هو هيك موكّف بطريكي، لليوم هو احسن حد معي، بكل كرفي وعصبيتي ومزاجتي، ودايما بضحكني، وبخلي كلشي بسيط وسهل، وصاحب فعل باصعب اوقاتي، اخوتي ما بوكفوا معي متله.


كصه انو لما تكبر البكا ببطل يفش الغل لهيك بصير الواحد يضحك
اد رسبت بامتحان بتضحك، اد خسرت صاحب بتضحك، اد رسبت بالجامعه بتضحك، معكاش مصاري وطفران بتضحك، بلدك ماكل هوا بتضحك، مشاكل مع الناس بتضحك، وبالاخر بتكتشف انو عمرك كله ماوصل التلاتين.. بتموت من الضحك..~

السلام عليكم ..~

اليوم هو الثلاثاء || 7\10\18 || والساعه بعد التسعه وربع بالليل ...~

غيبت عن المدونه يوم الاحد والاثنين لانو كان عليا شفتات ليل , وكل ما بدي اكتب ما يصح , واكون كتير تعبانه , لاشوف شو بيطلع معي ومتزكره من مجريات صارت .

بالنسبه ليوم || السبت 1 || كان عليا شفت ليل وكان متعب كتير كالعاده , بعد ما خلصت الشفت يوم || الاحد 2 ا|| لصبح , اطلعت من الشغل وابدّر من وقتي بربع ساعه , من وكت ما شوفت اللي ببدّل الشفت معاه , وحكيت للصبيه اللي بشتغل معاها بالليل اني راح اطلع بدري , اللي بشتغل معاها بهاي الايام اسمها (روزي) وكتير بكره اشتغل معاها , لانها كتير ضعيفه وبتعرفش تعمل اشي , كلشي بترميه عليا , ليش اطلعت من الشغل ابدر؟ لانو عنجد كتير تعبانه وشوي بدي اوكع من التعب , اخدت اوبر (تكسي) ولانو كان يوم الاحد فكانت الشوارع فاضيه لانو يوم الاحد هون ولا يتشبّه متل يوم الجمعه عنا , بتكون العطله , لهيك ما كان في ازمه سير واقل من نص ساعه اوصلت البيت , عطول سلّمت ع امي واطمنت عليها , ورميت حالي عالتخت , نمت بس كنت اضل اصحى , حوالي الظهر اجو عنا خواتي واخوتي واجتمعنا , كالعاده بتيجي اختي فيث وبتخبّط عالباب جكر مشان تصحيني , لاني انا كتير بجننها , لهيك احب ما عليها تصحيني ,واصحيت وكعدنا وكتير حكي صار وصار , وكان عليا شفت ليل , لهيك المغرب جهزّت حالي واتسهلت عالشغل , وكانت || ليله الاحد || من الليالي اللي كتير كتير صعبه عليا بالشغل , مرات في ايام زفت بالشغل , وبيجي هيك ايام صعبه لدرجه بتحكي "مش راح يطلع الصبح والنهار" انا و(روزي) كتير كتير اتعبنا واتكسرنا , واللي بكهر انها من مره ما بتساعدني , ومع هيك طلع الصبح تبع يوم || الاثنين 3|| , و (دون) اللي بشتغل شفت النهار كمان اتأخر تا اجى , واللي بكهر اكتر اني عليا شفت نهار , يعني بعد شفت الليل هاد مش اني اروح عالبيت انام , لأ , كان عليا اطلع من شغل لشغل , وكنت مهدوده لدرجه يالله , درجه بمشي وبخبط بالحيطان وبمشّي حالي غصب عن حالي يا حالي , وفش معي كهوه , اجى (دون) ومكانش عندي طاكه احكي معه من التعب , لاني بالعاده بجب ادردش معه , لهيك سحبت حالي واطلعت من الشغل , واللي بكهر اكتر اني كنت مش شاريه بطاقه الباص , لاني ما كتير بستخدم الباص صايره عشان باخد الاوبر , واللي بكهر اكتر واكتر انو معيش فكّه , "شو اعمل ؟ شو اعمل يا مير ؟ ا" توكلت ع الله واطلعت بالباص بدون ما ادفع , وحكيت" الله يستر ما يجي شرطي وادفع مخالفه لما يشوفني مش دافع " , وعنا مخالفه الباص 200$ , ما صدكت انزل من الباص ع الموقف , وبنفس الوكت كان عندي هدا الشعور انها خربانه خربانه , يعني لو طلع شرطي , هدا اشي متوقع على نصيبي بالدنيا , انزلت من الباص على موقف القطار , لانو شغلي تبع شفت الليل في جهه من سانفرانسيسكو , والشغل التاني تبع النهار في جهه تاني من سانفرانسسيكو , بدي فوق الساعه ونص , طيب انزلت على المحطه تبعت القطار وبدي اقطع تكت , المكينه مش راضيه تقبل المصاري , جربت كل قطع المصاري اللي معي , وكل ما احط فيها , تعاود ترجعّه , واحكي بعقلي" يلا بديش القطار يروح عليا " , واطلّعت ع اللي جمبي اللي بقطع التكت في مكينه تانيه انها بتعمل معه نفس الشي بالمصاري , حكيت "خليني اجرّب بطاقه البنك " , والحمد لله زبطت بطاقه البنك وقطعت التكت , وبسرعه بدي الحك القطار , ولما اوصلت شوفت انو القطار اللي بالعاده باخده يعمل تصليحات , اخلّع هدا الناكص , اخدت قطار خط تاني , وكانوا بمرحله بجربوا قطارات جديده نازله , كنت متحمسه اركب فيها ولا مره صحلّي الا هدا اليوم , وكنت متوقعه انو قطار مريح , يا ريت ما اتوقعت , شو هالقطار الكراسيه بتكسّر الظهر , وبضّل الواحد يسحل منها لانها ناعمه , وهدا القطار بدي فوق النص ساعه فيه , والله اني لما اجيت انزل ظهري انشل , بالعاده انا باخد من شغل شفت الليل لهدا شغل شفت النهار باص وقطار واحد , بس لاني كنت ماكله روح الخل بشفت الليل ولانو كلشي مش زابط معي , ولانو لسا ببدايه يومي , معناتن راح اكل هوا طول النهار , ولانو عم يعملوا تصلحيات بخطوط القطارات يعني التعن اساسي, ولما اجيت انزل من القطار كان الباص تبعي اللي راح ياخدني عالشغل بده بس دقيقتين , وانا كنت بالقطار وبس عليه يطقع الاشاره وبنزل وبلحك الباص , بس لأ , لازم اتعب اكتر واكتر , حضرت الاشاره اتاخرت وراح عليا الباص , وخط هداا لباص مش متل الخطوط انو كل عشر دكايك او اقل , هدا بده كل نص ساعه , انزلت من القطار وبدي اقتل كل اللي قدامي من كتر منا مكهوره , اتاخرت عالشغل اتاخرت , وانا عندي شغله وهي اكره ما عليا اتاخر عالشغل او عالمواعيد , بالعاده بحب اكون قبل بربع ساعه , لهيك فكعت معي , وانا استنى بالباص حكيت " خليني اخد خط باص تاني " , اخدت خط باص تاني , حكيت بلكي يكون هدا الباص سريع والحك الباص تبع النص ساعه اللي راح , لانو في محطات باصات بلتقوا , وبكونوا في باصات بتاخد طرق مختصره , بس للاسف ما زبط اللي فكرت فيه , انا بالاصل مش لازم افكر او اعمل اشي , وبالاصل كمان مش لازم ازعل , وبالاصل لازم اكون زي هالشخص اللي كلشي عنده عادي , لا بنبسط ولا بزعل , ولا عنده اي رده فعل لاشي , ولا فاركه معه اي شي , الا وكت ما تصدف ويشوف هالصبيه واشوفه يبتسم وهي كمان ويحكوا كلمتين وبعدين كل واحد بطريك , نرجع للباصات , انزلت من الباص وكنت متاخر ولسا ما اوصلت لشغلي , لسا لازم استنى كمان باص , عطول اتصلت ع شغلي اني راح اتاخر نص ساعه , الحمد لله ما حكوا اشي , وبعد عشر دكايك اجى الباص , والشوفير هدا يالله حوالي تلات سنين بشوفه عنفس الخط , عنجد هدا الشوفير بس اشوفه بنبسط , شب اسمراني , حافظ وين بنزل على اي موقف , ومش عنصري , وبعدها انزلت من الباص ولازم امشي عشان اوصل مكان الشغل , واوصلت بعد شغلي بنص ساعه , وكنت مكهوره لاني اللي بشتغل معاها هاي عنجد بحبها وبحبش اتاخر عليها من كتر ما هي كتير منيحه معي , اول ما عبرت الشغل عطول عملت كهوه , وهاي بجيب دايما عندها كهوه عربيه وبحب نشرب مع بعض , لهيك عطول عملت كهوه لانو فش فيا حيل , وهدا اول ما حطيت الكهوه بتمي , يالله شو كان طعمها رهيب على جسم مهدود , يالله شو انبسطت , ووخلصت شغلي بخير , وعلى موعد خروجي كانت اختي فيث جايه مع امي وياخدوني , ومكانش فيا حيل , وصحيح كان يوم الاثنين هو عيد ميلاد اختي هوبز , لهيك روحنا اشترينا ورد هديه , وحتى ما شوفناها لانو اولادها عملولها عيد ميلاد بالبيت , ولانو بينا مشاكل مع اهل جوزها فا بنروحش ع بيتها انا وامي , لهيك بعتنا الورد مع فيث , ولما ارجعت عالبيت كانت نفسي مسكره عالاكل , كعدت شوي مع امي وبعدين حكيت" بدي اشوف اد بكدر انام لانو عندي شفت ليل" , والحمد لله اني نمت وبعد بساعه اصحيت ع صوت , وكان حضرته اخوي واحد جايب مرته عالدار , وانا متكاتل معاها وبحكيش معاها ولا بعترف عليها لاني حقوده , ولاني بنساش شو عملت ولا شو بتعمل , المهم اصحيت عالصوت وكعدت استنى بحضرتها تنكلع , لانو كان الاتفاك اد بتيجي عالدار بس وامي هان , وبس ما يكعدوا اكتر من عشر دكايك , وانا مستحيل اطلع اسلّم عليها , بعد بعشر دكايك انكلعت , بس طبعا كنت سامعه كلشي امي بتحكيه , وطبعا لاني بعتبرها عدوه عندي , مش لازم تعرف شغلات عننا , لانها حسوده غيوره , بعد ما انكلعت عطول كومت من التخت واتكاتلت مع امي , بحكيلكم الحلو بالنت انو محدش بيعرفك , والحلو اكتر اني بكتب مجرياتي وبحاول اني اكون صريحه , واطلع كلشي جواي , وارجع اقرأه واشوف وين اغطلت ووين ما اغلطت , شو ردات فعلي عكصص ,
المهم اتكاتلت مكتل كبير , وامي زعلت مني وارتفع عليها الضغظ , بديش ازعل امي , بس خلص بكدرش اطيكها وبديش اطيكها للبنت , وبديش اياها تعرف عنناا شي , وكتير بحكيلهم " ابعدوها عن خلكتي ما تخلوني اعرف انها اجت عالدار " , وجهزت حالي واطلعت عالشغل تبع شفت الليل اللي هو || ليل يوم الاثنين || , وكان يوم الاثنين يوم متعب شغل بس كله هان , وكانت الليله التالته من شفتات الليل اللي ورى بعض ,وكنت يالله شو تعبانه لاني بس نمت ساعه , بس كان يوم الاثنين في شفت الليل هو اليوم الاول اللي شوفت فيه (كارمليتا) اللي بشتغل بالعاده معاها شفتات الليل , بعد حوالي شهرين وعشر ايام مش شايفتها عشان العطله اللي كنت ماخدها , ويالله شو بحبها هالصبيه , ويالله شو بتخفف من الشغل معي لانها بضّل تتهزا معي ونتمسخر ونضحك , ولانو زمان مش شايفين بعض , يالله ما وكفنا ضحك وحكي عن كل مجريات حياتنا اللي صارت بالهشهرين , وحتى اعطينا بعض بريك لنرتاح شوي وهي شخص متلي جباره بالشغل وبتكدر عليه وبتساعدني رهيبه ., بعد ما خلّض الشفت واجى نهار|| يوم الثلاثاء 4||, واجى موعد الترويحه , اطلعت طلبت اوبر , بس قبل لما اجى (دون) دردشنا معه كتير , طلبت الاوبر واتصلت ع امي تعملي فطور , اوصلت البيت وكانت عامله الله يخليها فطور , افطرت بس كنت تعبانه , حكيت اعمل كهوه ولا انام ؟ حطيت عحالي الحرام اني اتدفى لانو صابتني هيك فتره برد , وحكيت اشوف اد بنام , بس معرفتش انام , كعدت ساعه وعالفاضي , لهيك كومت عملت كهوه واجيت بدي اشرب , الا جرس البيت برن وكانت اختي فيث , كعدت واشربنا كهوه مع بعض وبعدين اطلعنا , الي فتره بشوف بمسلسل مصري وكنت استناه ينزل على يوتيوب اسمه (ليالي اوجيني) ولاني بحب الاشي الكلاسيكي , من سيارات وملابس وحياه , وحتى خليت امي تشوفه معي , حكيت لاختي اد بتاخدنا على محل بنص البلد هو محل لهيك كصص , اللي هي زمن الحمسينات والاربعينات , يالله شو بحب هالمحل بس يالله شو غالي , يعني القطع عنده بالميات وبالالاف , لفينا فيه ولفينا بنص البلد , ولولا كان عندي موعد عند دكتور الاسنان عشان بحب كل فتره وفتره يعني كل كم شهر اعمل تنظيف , المهم لفينا بنص البلد ووكع بلفوني مع انه كان عليه البيت من كل الجهات بس الشاشه انكسرت تبعته ! بتصدكوا ؟ يالله لما شوفته هالكسر , عطول عملت حالي مصارش فيه اشي وخبيته عن امي , بس يالله الوكعه يالله ! يلا بعين الله , المهم بعد ما لفينا بنص البلد وصلتني اختي ع دكتور الاسنان , نظفتهم , وارجعت انا وامي عالبيت الحمد لله على خير وسلامه , كعدنا نشوف في المسلسل المصري , وندردش , وبعدين حكينا مع خواتي كميرا عالمسنجر , عنا عاده بين العصر والمغرب نحكي كميرا كل فتره وفتره هيك شو في شغلات صارت خاصه انو النا يومين مش شايفين اختي هوبز, وبعدها حكيت مع حبي وكتير حكي صار بينا وكصص وبلشت اسرح وافكر , وانا لما اسرح وافكر ببلش وجع الراس , خاصه انو زعلانه عليه وع كلشي بصير معاه, وكلشي بصير بينا , بكدرش اني اجرحه وبكدرش اجرح امي .. لهيك بحب اخد شاور وعنجد فش بعده , اخدت الشاور وهيني عندكم .. بدي اخلص كتابه واحط راسي وانام ..~

هي شغله خفيفه بعرفش اد في اغلاط املائيه معنديش الوكت اراجع لاني نعشانه ولاني كل ما اكتب الا ما يجيني تلفون وكصص اختي فيث الهبله , وكمان شكرا لكل حد قرا من بدايه المشاركه لاخرها لانو عن حالي اتعبت وانا اكتب , بس بدي اكتب , بديش اخلّي اي سموم جواي , وبدي اجرأ حالي ..~

السلام عليكم ..~

اليوم هو الخميس || والساعه شوي وبتصير عشره بالليل || 7\12\18 ..~

امبارح االاربعا كان من انكد ايام حياتي , لاني اتكاتلت مع اختي فيث , بالعاده مش اشي جديد محنا دايما بنتكاتل وبنتزاعل وبعدين بنضحك عبعض وعادي ولا كانه صار اشي وكله بصير بعشر دكايك , بس امبارح كان ولا كل الايام من الكرف , وانا اكره ما عليا اتزاعل مع اهلي حتى لو دايما بنتزاعل , بس امبارح اصحيت على تلفون اختي انو هيها عند باب البيت واتاكد من موقف السياره , لانو في عنا جاره بتكره كل الناس واد شافت حد مقرّب من باب بيتها بتتصل على الشرطه وبيجوا بعطوا مخالفه , لهيك كل الجيران عنا بالحاره عرفوها ومحدش بيقرب من باب بيتها , بس لانو عنا في المدينه دايما في مشكله الموقف للسيارات , خواتي بيتغلبوا كل ما يجيوا عنا , اطلعت اشوف اختي ونزلوا بناتها , وجابت سيره اشي ما عجبني , بعد ما افطرنا واشربنا كهوه الا اتكاتلنا مكتل كبير , زي مكتل صار السنه الماضيه , وانا عنجد ازعلت , لانو نفس الكصه بس كل مالها عم تكبر وتكبر , غلطت عليا وامي كانت كاعده , سحبت حالي وما حكيت معاها وعبرت الغرفه وسكّرت على حالي الباب , لانو الحديث معاها عالفاضي , لما عبرت الغرفه لا راضيت ولا حد راضاني , بهديك الوكت , حكيت بعقلي " وين بدي اروح ؟" معنديش صاحبه اروح عليها , وبحبش اطلع اشوف العالم وانا مكهوره , وين انناس . ووين صوص ؟! على زمان وانا في الضفه كنت لما هيك اتنكد وازعل اتصل على واحده فيهم , انناس جارتي اسحب حالي واروح عندها واطلع كلشي جواي , كانت تفرد كل الشكلاطه اللي عندها وتعمل ازكى كاسه نسكافيه بعد امي , وصوص اخد مفاتيح السياره واحكيلهم "نازله عند صوص " واضل رايحه عندها عطول , و كديش كنت اسحب دخان عندها , لما دخلت الغرفه بلشت انخنّك لهيك اطلعت من الغرفه ع الحوش بين الورد والشجر والسما , وبلّش مزاجي يتغيّر , بلّش وجهي يذوب , فش ملامح , بلشت اصفن , واسرح , ضليت حوالي ساعه واشي , الا اختي عم تخبط عالباب تبع الغرفه وتكاتل وتسال عن اشي , بالعاده كل ما يجيوا عنا , عشان الحمد لله في كتير صغار , في كتير شغلات بضيّع , وعشان ما اشي مهم يضيع , بخبيّه بغرفتي لانو عندي ممنوع حد يعبر غرفتي , ولما فتحتلها كملّت الغلط عليا واخدت الاشي وطلعت من الدار , وشوي الا امي جايه وكمان بتغلط عليا وانو " انتي لازم تحترمي اختك عشانها اكبر منك " كعدت اطلّع ع امي انو امتى اغلطت عليها او ققلت احترامها , وارجعت رميت حالي بالتخت وما رديت عليها , لاني بعرف حالي جارحه بالحكي , لاني اللي بلبسش نظاره عن الحقيقه ومش عايش بخيال او امل , وكنت بالتخت بدون ملامح , بعد بساعه اختي هوبز عم تتصل وتحكي "شو في شو اللي صار " حكيت معاها شوي واعطيت البلفون لامي وارجعت اتمدد , حكت اختي هوبز " راح تيجي عنا وتاخدنا على مشوار عشان امي , اخدت اختي هوبز حوالي ساعه حتى اجت , وخلال هاي الساعه امي كل شوي تيجي تحكي معي , انو "كومي , ليش بالتخت ؟" حكتلها بكل برود " مش جاي عبالي " وضليت بالتخت لوكت ما اجت اختي هوبز , عطول عملت كهوه , وكعدنا وبلشوا يحكوا ويحكوا وانا مش موجوده معهم , بعرفش مالي كنت هيك ضعيفه , كنت هيك لا مبالايه عن شو كلامهم , كنت ميته , بعدين صار لازم يطلعوا ع المشوار , حكتلهم بديش اروح معهم , مليش نفس , وعالفاضي سحبوني معهم , كنت معهم مش مير اللي متعودين عليها , لا بتتسمخر ولا صوت ضحكتي برن ولا اشي , خلصوا المشوار وارجعنا عالبيت انا وامي , وارجعت رميت حالي بالتخت , فكرّت احكي مع فد , بس اتراجعت, اتزكرت انها حتى هي ما بيطلع منها كلام يأثر عليا , ولما دخل المغرب علينا , بلشت تصيبني حمى وانا بالتخت , اجت امي تحكي معي وشافت كيف وجهي , حطت ايدها على وجهي وانجنت , وشافتني برجف , وخافت عليا , وعطول كومتني اغسل وجهي , وحكت انها " حلمت حلم مش منيح " وبصراحه انا كنت حاسه من الكهر اني راح انام بدون ما اصحى , وبلشت تتصل على خواتي مشان يحكوا معي , وانا بعرفش مالي مكنتش طايك احكي ولا حكيت معهم , ما شوفتها الا جايه وتحكي هي ابوكي ع البلفون احكي معه , وكعد ابوي يحكي معي وطلّعت كلشي جواي , وبلشوا دموعي ينزلوا بدون ما احس , وابوي الله يطوّل بعمره ويعطيه الصحه والعافيه ويباركله ربنا فيها ولا يحرمنا منه , ولا يحرم حد من ابوه , كتير خففها عليا وكوّاني , وارجعت اتمددت عالتخت وامي حطيت كتير عليا اتدفى , بس معرفتش انام , ضليت لنص الليل وبعدين نمت .. وهيك خلّص يوم الاربعا ! بعرفش ليش هيك ازعلت مع انه مش هالاشي اللي لما فكرت فيه , بس بكدرش اعيش بدون اهلي , وبكدرش يكونوا زعلانين مني او انا زعلانه منهم , كنت مكهوره ع نصيبي بالدنيا ..~

بالنسبه ليوم الخميس كان عليا شفت نهار كصير , اصحيت وانا مكسّره ومهدوه وتعبانه , مكنتش كادر اكوم من التخت , كومت غصب عني , وكان معي بس عشر دكايك اجهّز حالي واطلع لاتأخر , بس بدل العشر دكايك اخدت ربع ساعه , وطلبت الاوبر , واطلعت من البيت بدون ما احكي مع امي , بعرفش ليش كنت هيك , بعرفش مالي ؟ انا بالعاده زعلي خفيف بسيط من اهلي , وبياخدش دكايك , بس هاي المره غير , هاي المره زي كل مره بتصير بالسنه , حتى لانو كان وجهي مش مريح اليوم حطيت ايلانير لاخفي الذوابان اللي فيه , اطلعت بالاوبر واوصلت متأخر خمس دكايك , وكنت لا مفطره ولا شاربه كهوه , وكنت لسا زعلانه , واللي اكتشفته اني مش منهم زعلانه , زعلانه من الدنيا وحالي , هيك بتيجي للواحد مرات بنكّد وكانت هالمره , ولهيك عملت كهوه , ولا حسبت حساب اني اشربها على معده فاضيه , اشربت بدل الفنجان اتنين , وكان ضايل عشر دكايك وبخلّص شغلي , الا امي بتتصل وبتحكي انو " هينا بنستناكي ع باب الشغل " اتفاجأت , واطلعت من الشغل وانا لسا منكده , ولما عبرت السياره كعدوا يحكوا معي , وشوفت ورد , حكوا " هاد الك لنراضيكي مع كاسه الكهوه " يالله ما بتتخيلوا كديش انبسطت مكنتش متوقع هالاشي , وبيحكولي الناس "ليش بتحبي اهلك؟" , يا رب تخليلي اهلي وتخليهم الي , وتبارك فيهم وفي اولادهم وصحتهم وهداه بالهم , تحمينا يا رب ودايما جامعنا , تسعدنا وتسعد الكل , ونخلي الاهل لاولادهم واولادهم لاهلهم .. لانهم بيعرفوني بحب الورد , وبيعرفوا نوع الكهوه اللي جابوه هو اكتر كهوه بحبها وما الها فروع وين مكان , يعني مكان بعيد ليجيبوها , وبلشت افرد وجهي وبلّش الذوبان يشد من على وجهي , وبلش الحكي , بس لسا مرجعتش مير , لسا كان قلبي يوجع , اخدوني فطّروني على برجر كينك , وبعدين روحنا على تارجيت اتحوجنا , واجتمعنا شوي , وارجعنا عالبيت انا وامي , اكلنا واتحلينا واشربنا كهوه , اجى اخوي تلات واسهرنا , وهيهم نايمين وانا عالمدونه ..~

||

السلام عليكم ..~

في ايام عيد الفطر , روحت ع الملاهي وانبسطت بس مرضت من كتر ما العبت , روحت على بحيرات فيها بط وحمام ووز , روحت اكيد ع شط البسيفكا اللي هي مدينتي المفضله اللي حلمي اسكن فيها , وروحت كمان على نهر وهم بيصنعوا المي اللي بنشربها منه ..~




||



||



||



||





||



||



||

انا لما اشوف زحمه على اشي , بحس اني بكره هالاشي ولا بكرّب عليه , اد كانت اغنيه او كتاب او مكان او شخص ..~

..~

السلام عليكم ..~

ااه والله زمن يا مدونه , ومكنتش اشتاكلك كمان , بس كنت ادخل مرات بدي اكتب , وبعدين احكي لأ , اسحبي حالك واطلعي , بس ليش اليوم ضليت لاكتب ؟ يمكن لانو عم بسمع بالاغنيه اللي الي زمن مش سامعها وزكرتني بمدونتي الكديمه وبدياتي مع عالم النت , زكرتني لما كنت هبله وطيبه وبشوشه وتحب الدنيا , كصه هالاغنيه هي حفله اظن بسمعها من 2010 , تصويرها بالابيض والاسود والمده تبعتها نص ساعه , هالباند بس بحب اسمعهم حفلات , بحبش اغانيها المسجله, بعد عذاب اني الاقيها عالنت , اخوي واحد اليوم لقاها موجوده باللاب توب تبعه وجابها عالفلاشه .. واخ شو انبسطت ع هيك اشي اهبل , عم بشرب الكهوه وهي بارده ومليش نفس اعمل غيرها , مجريات كتير مش منيحه صارت معي وبديش اكتبها عشان بديش اتزكرها , ومعنديش مجريات حلوه , حتى انقطعت عن التصوير وانقطعت عن الكل , معنديش اشي مفرح ابلّش فيه المدونه بعد هالزمن , من امتى انا بحكي اشي مفرح بالاصل ؟وحتى وانا عم اكتب معنديش هالراحه الداخليه اللي كنت مرات اجي على هالمدونه بس لاحس فيها , امبين زمني انتهى .. اوفت ..~

||



||



||