مأساة روح {هالكه} في اوراق تائهه ~

هديه من اختي فيث لما راحت على لاس فيغاس

||




العيديه 100$

السلام عليكم ..~





||

يوم الخميس 8\23\18 اشتريت هر من العيديه , واليوم حضرته بلّش يتأقلم ..~

ما لكيت اللون اللي بدي اياه , اللي هو يا كله اسود , يا كله رمادي ..~

وكان قرار صعب لاني حبيت كلهم وما اعرفتش مين اختار , وكالعاده برجع دايما عالخيار الاول ..~

غلبّني اليومين الماضيات , لا باكل ولا بشرب , وحزين وتحت التخت ..~

امبارح مزع الفرشه تبعت التخت ودخل جواها , واوصلت لمرحله بديش اياه ..~

انا بدي هر العب معه وانبسط والتهي , مش بدي مشكله جديده بحياتي من ايديا ..~

اتصلت عليهم للمحل اني بديش اياه , وكل كلامهم اعطيه وكت لسا صغير وبلاه بلاه ..~

انا بكدرش اتحمّل دعايه الخمس ثواني تبعت اليوتيوب , بدي اتحمل هر زنخ؟! ..~

واكيد صاحب البيت ما معه خبر لانو ممنوع يكون عندي حيوانات , فا لازم دايما اخبيّه عنه ..~(ساكنه في بيت اجار)

عشاني بمرحله كآبه من كلشي صعب معي , لازم الاكي اشي التهي فيه احسن ما اعمل شغلات مصيريه مش منيحه تخرب بيتي ..~

لهيك بدون تفكير حكيت لايمان خديني بدي اشتري هر , واكيد غلبّتهم !

كان سعره 150 $ , خبرت امي من جديد وحكتلي "اللي ببسطك ببسطني " لانو عند امي هدا اسمه قله عقل لانه غالي ولانه مش ببلاش , 150$ اشتري فيهم اشي ابدى ..~

بس لانو هالمره كتير حزنانه على سفر امي وكتير موحشه بدونها الدار , حتى لو صار الها شهر , لهيك اشتريته ..~

وطلبت اسامي من اخوتي وخواتي واهمهم اخوي واحد , حكالي " انتي بتحبي الكهوه سميه يا كافي او ايش رايك بساده ؟" وبالزبط عجبني اسم( ساده) , مع انه هو بده اسم لوز مش عارف ليش ؟شو اللي فيه بيجي على لوز ؟ ..~

السلام عليكم ..~

اليوم هو الثلاثاء 8\28\18 وعندي الساعه حوالي 3 العصر ..~

كان عليا شفت ليل متعب امبارح بالليل , ارجعت عالبيت نمت ساعتين واصحيت حوالي 11 الصبح , افطرت واجو عندي خواتي ملهومش كم دكيكه متسهلات , وحكيت امبارح ما اجيت عالمدونه , وعندي كم صوره لكم شغله بدي احكي عنهم ..~

||

عندي بهدا الوكت تلات شنتات بستخدمهم وكل فتره راح احكي عن واحده ..~

اليوم راح احكي عن اكتر واحده محببه عندي LeSportsac 75$ كاروهات ..~

خفيفه لانها قماش , وبتوسع كتير اغراض حتى لو بكون شكلها صغير , ومريحه جدا لا بتوقع ولا بتتحرك , ولا بتكسر الظهر او الكتف او الرقبه , عنجد من اريح الشنتات اللي مروا عليا !

بالعاده بستخدمها بالمشاوير الكصيره مع خواتي , او مشواير قريبه من البيت انو مش بحاجه اغراض كتير فيها ..~

||






نشوف ايش فيها ..~




من اليمين للشمال ..~

نظارات (راي بان) اللي حكيت عنهم اكبس هون

طاكيه وهاي اغلى واحده عندي اشتريتها حسب ما متزكر فوق 50$ , بحب الطواكي الرياضيه كتير وكتير بلبسها لاني بحبش الشمش .

مفاتيح سياره اخوي

مفاتيح الدار

دزداني (ستيف مادن ) حكيت عنه اكبس هون

||



كصه مفتاح سياره اخوي , اول شي في مشكله مكان ما انا ساكنه في سانفرانسيسكو وهي موقف السياره , دايما بتكعد نص ساعه ت تلاكي مكان تصف سيارتك لانو فش مكان من كتر السيارات وكتر الناس لانها مدينه محرزه اخ بس , هاي اول نكطه , وفي نظام عندهم انو كل شارع يوم بالاسبوع بتيجي سياره تنظفه , ومكان منا ساكن في تلات شوارع بالاسبوع اللي هم اثنين واربعا وخميس , ولما ينظف الشارع ممنوع تكون حاطط السياره بمكان التنظيف , اد شافوا السياره بالاوقات المحدده راح يعطوك تكت , وعنا ينعن شكلهم اغلى تكت اللي هو 110 $ واد ما دفعته بزيد عليه كل ما تتأخر , اما احكي في مدينه تاني زي الدلي ستي اللي عايشين فيها خواتي عندهم التكت 35$ , شايفين الفرق بينا وبينهم ! طبعا للاسف معيش رخصه بامريكا مع انه معي تبعت الضفه , كانوا زمان اخوتي هم اللي ينقلوا السياره , لانو كل واحد فيهم اخد تكت مرتين يعني اربع مرات دفعوا تكوت , وسياره اخوي هاي هو ما بستخدمها بس مخلينها لانو ابوي لما يجي زياره عنا بسوقها وبدناش نبيعها عشانه لابوي , والسياره هي فورد باص صغير , يعني بحكوله فان فيه 7 كراسي , يعني طويله , وبدون هالواسطه فش مكان لتصف السياره الصغيره فكيف هي , وانا صبيه بعرفش اسوق السياره الكبيره الطويله , ولحد الان بعرفش من مره اصف بين سيارتين احشر حالي , ومره من المرات اخوتي الاتنين ما كدروا ينقلوا السياره , وحكولي جربي انك انتي يا مير تنقليها , حكتلهم اد محشوره مستحيل تزبط , بس الحمد لله زبطت , ومن بعدها اخوتي ركنوا عليا اني اللي دايما انقل السياره وبصراحه غلبه عليا كتير , لهيك صار المفتاح الاحتياطي معي , لان كل فتره لازم انقلها والله يستر لانو معيش رخصه .


لاني صبيه بتعشق الدناديش والمداليات فا لازم احط بمفتاح السياره وابلش من اليمين ..~

ما بعرف اد واضح بالصوره بس في زي اسواره خرز اللي هي مسبحه على شكل اسواره 33 حبه اجتني مع مسبحه الميه من العمره هديه , وبحب كتير اسبّح انا وبعشق المسابح

تعليقه سنسال على شكل قلب جواه حجر اسود , هديه على موقف صار مع حد وانو قلبي اسود وانبسطت عليه حتى لو مش حلو , ومن زمان عندي

اكيد مداليات البومه مليانه معي كمان هديه جديده هاي السنه

ما بعرف اد واضح في شكل مكعب فضي اللي هو شكل الكعبه كمان هديه

ريشه بتنحط بالشعر وكنت كتير احطها كأني زي الهنود الحمر او انو تطبيق المثل اللي هو (على راسي ريشه )

التطريز عندي من الشغلات اللي بعشقها , واخت مرت اخوي بتعمل هيك شغلات , وهاي المره بعتت ملان منهم مع امي وكتير كتير مبسوط عليهم

اخر شي هدا الازرق اللي هو حلق , بس ضاع اخوه ولاني بحبه حطيته في المفتاح

||




الشغلات اللي كانت بالشنته .. يمين للشمال ..~

وصول من البنك ومن محل الحيوانات اللي اشتريت (ساده) منهم

ملقط شعر وسنسال فضه وهدا من المفضلين عندي لانه اخضر مع زفير ابيض , وكنت لابسته يومها بس هيك فجاه وقع والله ستر اني شوفته , كان عنجد عملت حداد عليه لو ضاع

كريم ايدين اجاني من ابسي , منيح مش بطال بس ريحته فانيلا بتكتل ما بحبها من مره
عطر (Roses et Reines) اللي عنجد شو صاير احبه خاصه بالحر لان بعطي انتعاش
ايلانير من زمان بستخدمه وممحي اسمه , بس لحد الان بستخدمه ومنيح كتير
هدول كتير بتسخدمهم وبدمجهم مع بعض (bang) ملمع منيح لانه برطب الشفايف , اما (kokie) هاي الشركه استخدمت شغلتين منها وعنجد جوده شغلاتها رهيبه , اما بخصوص الروج الناشف هاد عنجد لونه بحبه عليا لان بفتّح عيوني , بس بكره الناشف انا وبكره هاللون بشكل عام , ومع هيك لانه حلو عليا بستخدمه كتير , وبطوّل على الشفايف وما بنشّف , فا هاي الشركه اد بوكع اشي تحت ايدي منها الا ما اجربه

اما لاني صبيه مريضه فا لازم كل شنته يكون فيها دوا , اللي هو معدا , ابروفين , ادفل !

فكّه وكاش ..~

||

وهدا شو بكون بالعاده بهاي الشنته المفضله عندي .

مره حكيت عن شنته وهي اكبس هون


||

الليله كمان عليا سهر والله يهونّها عليا ويسّهل امري , بدي اروح اكل واشوف اشي .. وبشوفكم

السلام عليكم ..~

اليوم هو الاربعا والساعه حوالي 10 بالليل 8\29\18 ..~

مجرياته كان عليا شفت ليل , اطلعت من الشغل ع 8 الصبح وانشليت انا وكارمليتا بالشغل , اجيت عالبيت في اوبر (تكسي) لانو فش فيّا حيل اخد باصات واكعد ساعتين بالطريك , اوصلت البيت حوالي 9 وكان عليا انو اشيل السياره من مكانها عشان في تنظيف الشارع , وكعدت استنى لوكت ما صارت الساعه 10 الصُبح , وكعدت بالزبط نص ساعه وانا ادوّر على مكان اصف واتغلبّت , بعدها لا افطرت ولا اشربت كهوه مع انه كان في موعد اتلاقى مع خواتي ,بس بنفس الوكت خواتي وخاصه ايمان مش بمواعيدها ابدا , لهيك اتمددت عالتخت وانا افكر بحال الدار , بدها ترتيب والجلي معبى المطبخ يومين مش جاليه وحاله , وكنت العب مع ساده , وتوب اغفيت وانا مش داري عن حالي , نمت يمكن حوالي نص ساعه , الا ع ا1 ونص اختي اماني بتتصل واصحيت ع صوت البلفون , عم تحكي " شو وصلك مسج من بنتي , اطلعتي من الدار ؟" بنفس الوكت اللي كنت احكي في معاها انتبهت انو جاي مسج واني لازم اكون استناهم بمكانّا المعهود راس الجبل , وانا وين وراس الجبل وين , حكتلها " كنت نايمه , هلكيت بطلع " كانت رده فعلها عاديه, بالاصل انا اغفيت وانا في اواعي الشغل , ومعيش وكت لانو بدي اقل شي 40 دكيكه لساعه لاوصل راس الجبل , كومت اخدت البلفون وحملت الشنته وحطيت الطاكيه ع راسي واطلعت من البيت , وجهي ما غسلّته , ومش كادر افتح عيوني , كنت سكرانه عالاخر ومسطوله لاني اصحيت من نومي وحاله , اول ما اوصلت راس الجبل فش عندي اي مقدره اني اتحمل وجع راسي والسطلان , دخلت ع محل اشتريت كهوه بارده من التلاجه , وهاي بحبها بس مش على معده فاضيه , وفش مقهى حواليا اشتري كهوه عادي سخنى , لهيك انغصبت اشرب بارده , ويا حبيبي شو معدتي اكلت هوا , ومع هيك لسا ضليت مسطوله , صار كتير تلفونات مين اللي بدها تاخدني من راس الجبل , مره ايمان بتتصل وبتحكي خلص انا باجي , ومره اماني بتتصل بتحكي انا باجي , ومره ايمان بتتصل بتحكي راح اتاخر , ومره اماني بتتصل بتحكي راح اتاخر , مع كل السطلان اللي فيا , مش مركزه معهم ومش هاممني مين اللي يجي او شو يعملوا , ومكنتش اخبّر التانيه شو الاولى بتحكي , على اساس انهم بيحكوا لبعض هيك كنت امفكر, اجت اماني بالاول واطلعت معاها , بعدين اجاني تلفون من ايمان انها في المكان بتستنى فيا , عنجد كلنا اهبل من بعض , دايما هيك بلخموني , بعدين اتفكنا على مكان نتلاقى , ومكنش عنا وكت عنجد , يعني بين كل الحكي اللي بينا من مجريات صارت خلال يوم واحد معانا, ومجريات عمى بالحياه وانو فش اشي نعمله لبعض الا انه كل واحده تهوّن على التانيه , لانو عنجد يالله شو الحياه صعبه , حتى هاي من المرات اللي ما كان عنا وكت حتى نشتري كهوه , وبعدها انتهى اللقاء وكل واحده اتسلهت على بيتها , اجيت عالبيت حوالي 4 العصر بعد ما قضيت كم شغله , وتعبانه ومش ماكله وحاله , اجيت بدي اعمل اكل الا اخوي واحد جاي , كعد حوالي ساعه عندي , وحكى التاني عن كصه عمى صارت معه وحاله , طلع من عندي حوالي 5 , عملت اكل واكلت , وبعدين كهوه امخمخ , وبعدين رتبت الدار وجليت الجلي , الا اخوي تلات بتصل انه هيه بالطريك , اجى اسهرت معه شوي , الا الساعه صارت 9 بالليل , امي بتتصل حكيت معها حوالي ساعه الا صارت الساعه 10 بالليل وهيني ..~

مبسوطه من ساده , بلش يجي عندي , وينام ع التخت , ويكعد معانا بالصاله , بس لسا مش زي ما بدي , بدي اياه يكون اكتر لزكه ..~

من الشغلات المحرزه اللي اشتريتها وحكتلكم راح احكي عنها ..~ اكبس

||





اكتر بوت بحبه بحياتي وطول عمري من اول ما اوعيت على حالي هو all star , اسود , ابيض , كحلي , احمر , هدول طول عمري بلبسهم , بس هاي المره اتغلبت غير شكل انو ما لكيت احجام , لانو الاشي اللي بيعجبني بيكون في قسم الرجالي , ودايما الحجم اكبر , من هدا البوت كان في اسود وكان في ابيض , وهدا المشوش , كان نفسي اشتري التلات , بس ما لكيت حجمي من الابيض او الاسود, كلهم مبيوعين كهر, عنجد انكهرت لانو الابيض منه رهيب كتير كان , وهاي اول مره بشتري جلد all star , طول عمري بشتري قماش , لانه عملي , لانه بينغسل بالغساله , بس هاي المره جلد وما حد بلاحظ الا لما تقرّب , بس مشكله جلد بانه اي اصابه راح ينكحط , اكيد بحب النعل العالي لاني قصيره , وعنجد وقعت بغرام الركبه والميلان اللي فيها من فوق , اخدته حسب ما انا متزكره عالتخفيظات اظن 70$ او 80$ , مش متاكده لانو الوصل مش معي لاتاكد ضايع , وكتير مبسوطه عليه ..~

السلام عليكم ..~

عندي الساعه حوالي 3 العصر واليوم الاحد 9\2\18

هاليومين اللي مرّوا كان عليا شغل زياده وهو بالعاده مش بالجدول تبعي , بس لانو الصبيه مرضت لهيك اشتغلت مكانها , وكنت تعبانه ما بين سهر الليل بالشفتات وما بين ما انامش الا ساعتين تلات بالنهار , وما بين التزامات الدار , والمصايب اللي الله ببعتها , فكنت مش شايفه الفضى , ولسا بكرا كمان بدي ارجع عالشغل , يعني بس طلع الي يوم واحد اجازه , حتى من زمان شايفه فلم زي العالم والناس ..~

مجريات صعبه والحمد لله , ومرض والحمد لله , ومع هيك هينا عايشين !


||


من فتره صورت الشنته اللي باخدها معي عالشغل ونشوف ايش فيها ! اشتريتها 60$ عالتخفيظات وحكيت شوي عنا هون اكبس

في الاول ع كد ما كنت مبسوط عليها اول ما اشتريتها , وع كد ما بحب تصاميم ستيف مادن , بس بالنسبه لهيك نوع من الشناتي من مره كان اختيار غلط بعد تجريبتها لفتره طويله ! عم استنى فيها لتخرب عشان اشتري غيرها , لانو لحد الان مش صاير فيها اشي , وبحبش انا انّوع الشناتي عشان ما تصير لخبطه بين الاغراض ويضيع وينتسى ..~
مشاكلها تكيله وهي فاضيه ولما تحطي الاغراض فيها بتصير اتكل بكتير وبتكسر الظهر او الكتف , وغير انو الها ادين واحده كصيره وبتكدر تغيّر حجمها , لانها غليضه بضّل كل شوي تسهل وتكع من الكتف ,وواحده طويله وعالفاضي لما تحطي الشنته جنابي , بضّل كصيره وبتكسر ظهري وركبتي وبصير امشي اعوج ..~

||





||


ابلّش في الجيبه البرى , يمين لشمال ..~




ماسكارا WANDER $25 ؛ مش بطّاله بس مش رهيبه , الحلو فيها العلبه تبعتها انو بتكدر تكبس عليها وتدعس عليها وهيك بتحط ماسكارا اكتر ع الفرشاه , وكمان الرهيب فيها انو ما بتنشّف الرموش او بتعمل على انهم بلاستيك , لهيك بعد ما تحطها وتلمس رموشك بكونوا مش يابسين .

روج OFRA verona 20$ لون على درجات البنّي , وبعكس عالسواد اللي في العين والرموش , كأنك حاطط كحله , وبيضّل وكت كمان على الشفايف , كنت احبه على امي , حبيته .

ايلانير بنّي 5$ متله متل الكحله , وكنت احب احطه ايلانير خفيف فوق العين بدون ما ارسم الدنب

علبه تعبايه للعطر اشريتها من الامازون واتوقع سعرها حوالي 10$ ,لاني باخدش علبه كامله معي عالشغل بخاف تنكسر , لاني وانا رايحه عالشغل بكون اتفشش وحاله , وكان فيها عطر DKNY

قلابه رموش bobbi brown 40$ , لاني بعشق الرموش فا لازم يكون عندي قلابه قبل ما احط المسكارا , ولانهم رموش فا مستحيل اشتري اشي رخيص وهاي الها عندي سنين , بس بغيّر الجلده , وكتير مبسوط عليها وما عنديش اي مشكل

سيروم truskin tea tree 25$ , هدا لحد الان افضل سيروم بخصوص الحب الحراره اللي بيطلع عالوجه , كتير خفف من الحب , بش مشكلته انه بسمّر وريحته بتكتل , ومع هيك عندي منه علبتين واحده بالبيت وواحده بشنتت الشغل لاني بستخدمه وانا بالشغل , ودايما راح اشتري منه

زيت اظافر CND وعنجد فش بعده بتبيض الاظافر الا الليمون , بيحكو انه بقوي الاظافر , بس انا لاني صحتي بالارض لهيك ما فاد بالقوة , فاد بالبياض وانا اكره ما عليا الاظافر الصُفر , اظن كان سعره حوالي 10$

كريم عيون , بنتزكروا لما روحت على تبعت العنايه , نصحتني بهدا الكريم لتحت العيون , كان منيح , بس اكتشفت الفرق وكت ما استخدمه , ما اظن راح اشتريه لانو ما خفف السواد , بس خفف التجاعيد تحت العيون لاني صرت ختياره , وكمان على كد ما بستحدمه لسا فيه .

سماعات الايفون , وع كصتهم , هدول تالت سماعات خلال شهرين , بعرفش وين بضيعوا , بس انا متاكده اني بنساهم بالشغل وحد بيسرقهم , ومع اني بحط عليهم مناكير عشان يتميزوا عن كل السماعات التانيات , ولما ضاعوا رقم اتنين , انجنيت بالشغل وسألت كل اللي بيشتغلوا شفتات ليل او شفتات نهار اد حد شافهم , ولسا من يومين ضاعوا هدول , وبكل صراحه فكعت معي , ولما روحت عالشغل اسال عنهم , حد فيهم اعطاني اياهم , يمكن خافوا لانو بوجهي الشر , وبحكيلكم انا مش الصبيه اللي عندها بال اضلّها تفك التشبّك بالمساعات , مش مهم ملخبطين مع بعض , الا لما اوصل لمرحله انو ما في مساحه بين السماعه وبين البلفون لهيك ببلش افك فيهم .

بكله , زي توفي على مسكه ع ابصر ايش , اشتريته من محل ياباني ,لزكات جروح لاني صبيه بتشوفش كدامها وبضّل اتجرّح واكل خبطات وانا معيش خبر .


بحبش المكياج لهيك كطع شوي بستخدمه , ولانو بهديك الفتره كانت اواعي بنّي اغلبهم .

||

للجيبه الصغيره الداخليه الشنته ..~




اكيد كلها دوا لانو صاحبتكم مريضه وكل السبب من السهر , اخ بس ..~

B12 16$ بيعطي طاكه ومزاج وخايف يكون نوع من انوع المخدرات , لسا ما سالت عنه بس لسا باخده لاني صبيه مناعتي بالارض , وهو من النوع اللي بينحط تحت اللسان وبذوب

مالاتونين اللي هو منوّم , لاني بنامش عشان كتير بشتغل وكل شغلي سهر , فا جسمي اتعود على قله النوم , لهيك مرات بتغلّب لانام في النهار , ولازم انام مشان بكون عليا كمان سهر , ولما كعدت يومين ورى بعض ما انام واكتر من مره , صابني وجع راس وفقدت شهيه الاكل لهيك اشتريت منوم , بساعد ع النوم وفش فيه اي نوع مخدرات , ما باخده الا اد شوفت حالي مش عارفه انام

ابروفين الزهري , لانو مرات وعالاغلب ظهري بوجع لهيك بكدرش اتحرك بوجّع الظهر
دوا المعده الاصفر ,عنا الجو دايما بارد فا دايما بصيب معدتي برد وبستفرغ
دوا حلق الاحمر , بتصيبي كحه بالليل
والعلبه الصفرا فيها دوا راس ادفل

هدا الدزدان الازرق الصغير لامي وحبيت اخده منها زكرى , بكون فيه فكه وكاش مصاري

نكاشه سنان طويله بيضا , ومعالق للاكل

اما بخصوص الزهري الطويل , هدا وصله شعر , لاني بفتره ما بحب اضبغ شعري , لون شعري عاجبني , بس بحب احط متل الهيبّز وهو وصلات ملونه بالشعر , عندي تلات وهاي المفضله , بس مشكلته انو بعقّد الشعر , بس عنجد بحبه كتير

||

شو بالشنته بشكل عام



شاحن الايفون , وشاحن التعبايه RAVPower 16750 mAh 35$ لانو بكونش دايما جمب الابريز , لهيك بستخدمه كتير , وبيكعد معي يومين لتلات , وسريع بالشحن

مي , اقلام , ودفاتر التقويم والملاحظات

نظارات see دايما بستخدمهم بالشغل , خاصه لما اطلع الصبح وبكون وجهي تعبان ومنفّخ لهيك بغطّي على وجهي

مشط شعر وبحب استخدم بس خشب لانو عنجد رهيب
كريم للحب الحراره من الدكتوره وصتني عليه وعنجد بساعد على انو الحب يموت بسرعه
كريم ايدين vitella 10$ انا صبيه من النوع اللي اديا كتير بنشفوا ودايما , حتى لو بضل احط مرطب , واسمعت انو هدا الكريم منيح , ما شوفت اختلاف , وبكره ملمسه لانه زي الزيت باشي بشع من ريحه ومن كلشي , ومع هيك بستخدمه بالشغل كتير عشان بستحدم كفوف كتير ومتاكده انو النشفان منهم
زيت شامبو ناشف للشعر , كتير بستخدم شغلات لشعري لانه طويل وبحب دايما يكون منفول بدون اي حراره .

||

ما راح تشوفوا الدزدان والمفاتيح لاني بوكتها كنت استخدم شنته تاني , وبكون عندي كمان شنته صغيره بخليها دايما موجوده بالشغل فيها من فرشاه الاسنان وهيك كصص عشان بديش اضل احملهم بالشنته ...~

السلام عليكم ..~

عندي اليوم الاربعا وحوالي الساعه 8 المغرب 9\5\18 ..~

امبارح صارت مصيبه كبيره بالشغل , وكنت انا و(كارمليتا) , واستغربت من (كارمليتا) انها كتير خافت , مع انه دايما بنوقع بمصايب , وضلت طول الشفت وهي مش عبعضها , بعرفش ليش انا كنت مش سائله , بس كنت كتير تعبانه ومهدوده وما مصدكه اخلّص الشفت , بس انتهى الشفت على سلامه ومحدش عرف بالمصيبه , لما اجى (دون) اللي بيشتغل بشفت النهار , كنت بدي اقتله , لان صارله فتره يتأخر على تسليم الشفت , وحكتله اكتر من مره تتأخرش , الشفت تبعي ببلش من ثمنيه باليل وبينتهي ع ثمنيه الصبح , وعلينا نكون بالشغل قبل موعد بدايه الشفت , يعني انا لازم اكون قبل الثمنيه بالليل وهو لازم يكون قبل ال ثمنيه الصبح , بس حضرته بكون ع الثمنيه وعشر دكايك او 8 وربع , وممكن انه بتفرقش , بس لأ بتفرق ونص معي , مع هيك شغل متعب , ومدينه ملانه ازمه سير , بتفرق خمس دكايك بين ازمه سير او بدون ازمه سير , وبين سعر الاوبر من رخيص لغالي , واللي اكتشفته بالصدفه انو بيجي عالموعد بس بضل بالسياره بدوش يجي عالشغل , يعني هو بيتاخر كصد مش عشاني , عشان محدش بده يشتغل , عنا الشغل من كتر مهو متعب محد بده يشتغل , يعني بنشتغل غصب عننا , ولما شوفته هيك بتأخر كصد , فكعت معي , ولما اجى كنت لاوي بوزي وهو بضحك وبمزح زي عوايده وانا مش طايكته , وهو لاحظ , وكان يحكي مع قرايبه مسنجر كميرا ويحكيلي "احكي معهم ", حكتله "بديش" , واخدت الشنته وسحبت حالي واطلعت , بكره اللي بيستهبلني , هدول لما تعمل منيح واضلك تحكي لحالك "مش مشكل عادي لو اتاخر مره , عادي لو اتاخر مرتين عنا دايما ازمه سير , عادي لو اتاخر عشر مرات " بس هو زادها عنجد زادها وفكروني طيبه وهبله , يمكن اكون محترمه بشغلات عشان الواحد من نفسه يتأدب ويفهم , بس هو ما فهم , لعمره وستين عمره يفهم , لهيك حكيت للسكرتيره انه بضل يتاخر , وحكتلها كمان انا بكون قبل موعد بدايه الشفت , ليش هو بيتاخر عليّنا , لاشوف بالايام الجايه شو بده يعمل .

||

اطلعت من الشفت واجيت عالدار في اوبر , يبي وانا عم اكتب بدوخ , لاني منمتش , اجيت عالبيت وكان عليا اشيل السياره من المكان لمكان تاني لانو في تنظيف للشارع , والله بحبني لكيت مكان , حتى كنت احكي مع امي وابوي عالبلفون , وسالتني امي اد بدي انام او لأ عشان اختي ايمان يمكن تيجي عندي , حكتله بدها تيجي تيجي , شلت السياره وهاي اول مره بصفّها بمكان من اول مره , بالعاده بتغلّب , يمكن اهلي استدعولي , اجيت عالبيت وافطرت والعبت شوي مع ساده , ووصلني مسج من اختي ايمان اد بتكدر تيجي عندي , حكتلها اه , وبعدين صارت تلفونات بيني وبين اهلي عشان بنت اخوي اللي بالضفه مريضه , وهاي البنت بتحب تحكي عالتلفون وحد ينادي على اسمها , كعدت حوالي عشر دكايك وانا احكي معاها , وبعدين بلشت اشوف بمسلسل الا شوفت حالي الا نايمه , نمت حوالي نص ساعه , الا اصحيت على البلفون برن وكانت ايمان , حكتلي "وين مكان في تنظيف الشوارع , فش مكان اصف السياره , تطلعي ", حكتلها "اه استني بس اغيّر اواعيا ", وبسرعه غيرت واطلعت بدون ما اغسل وجهي او امشط شعري , اطلعنا اتحوجنا واشربنا كهوه , ورجعت وصلتني عالبيت .

||

اجيت عالبيت حوالي تنتين العصر , وكانت الدار كايمه كاعده من ساده , ساده بضل يلعب كتير , وينط وياخد الاعراض من مكان ويكونوا في مكان تاني , ويمزع المحارم , وحاله ! يعني الدار بدها شفط السجاد كل ما يعلب , والي يومين مش شافط السجاد لانو عنجد بكونش عندي وكت , رتبت الدار وغسلت وشفطت , ورتبت المطبخ بس ضايل عليا الجلي , ما لحكت اجلي الجلي لانو اخوي واحد اجى واخدني نروح ننظف السياره , وبحب هدا مكان تنظيف السياره لانه رخيص ولانو بتنظف في ايدك بس بمكينات حلوه , كانك بتلعب بمسدس مي ومسدس صابون .

||

وبعدها اجيت عالدار وكانت حوالي الساعه خمسه ونص , وكان عليا انشر الغسيل , وما اجيت اكعد الا الساعه 6 ونص واجى اخوي تلات , وعملنا عشا , الا خواتي بيتصلوا علينا كميرا , واتكاتلت معهم ! هلكيت انا ارتبطت بحياتي مره , وكان الحك عليه , بس كمان انا ما حبيت اطلع من الكصه ببلاش , لهيك حاولت اطلع باشي , وهالاشي خسرّني عمري , وصحتي , وخواتي , يعني كتير خسرت عشان هالاشي , ومكنتش متوقع هيك يصير , لاني تركت اول مره , الكل باخد عني فكره غلط , بهمنيش الكل بالهدنيا انا , بهمني اهلي , بس لما من فتره وامي هان اختي ايمان بضل ترمي حكي , وكنت مرات مكدرش ابلعه , بس هاي المره اختي اماني , رمت كلمه , ولما اهلك يشوفوا الاشي اللي بشوفوه الكل وهو مش موجود , بتسقط الدنيا من نفسك , حكتلهم" انا ازعلت منكم وبديش احكي معكم يلا سلام "وسكرت البلفون , انا بنت صريحه لابعد الحدود , وما بخبّي شو بأثر عليا , ومش كصه تقل او كصه كرامه , كصه الصراحه , وكصه كلشي عبلاطه , وكصه ابعد عن الخبث , بحبك او بكرهك او بعزّك وعملت اشي انا حبيته او كرهته راح اخبرك بنفس اللحظه وما راح اخبّي او اتخابث , لانو بديش وجع راس , بعدها يضلوا يتصلوا خافوا عليا لاني بكهر حالي , ( ارجعتلهم بمسج بكرا بحكي معكم ) بحيكلكم وهدا اشي بحكهوش لناس بعرفهم , انا بحب اهلي لدرجه بتخوف , ومن تجارب مش من حكي , بعمل شغلات كبيره لاجلهم ومن نيه صافيه , وبالهدنيا ما بهمني حد الا هم , وبحب اسعدهم وافرحهم واساعدهم وكلشي بكدر عليه وحتى اللي ما بكدر عليه بعمله , عندي الدنيا اهلي , وبضحي بحالي عشانهم وببديهم على نفسي , ومحدش بيعرف هدا الاشي , يمكن مرات هم بحسو او بيعرفوا شغلات بسيطه , بس انا من كل قلبي وعقلي وربنا شاهد اني بحبهم كتير , ولهيك اد هم واقفوا ضدي بالهدينا او ازعلوني بكصد او بدون , انا بتحطم , بحس انو الريشه اللي معلقتني بالدنيا طارت والدنيا ما بتهمني , الاشي اللي بيزعلي هم ! لهيك هم بيعرفوا اني عنجد بنكهر وبمرض ! لهيك ضلوا يتصلوا عليا وبعدها حتى اتصلوا ع اخوي تلات وحكوله خليها ما تكهر حالها , والدنيا اخد وعطى ..~

وهيني , بدي اروح احكي مع امي وابوي واصبّح عليهم ..~

السلام عليكم ..~

كمان من الشغلات اللي اشتريتها , هو جينز ليفايز ..~

اشتريت كمان واحد معه بس لسا ما البسته ..


||






||

بحب الخصر العالي لاني قصيره , بس كمان بحب القصير عشاني كمان قصيره , هدا النوع كان خصر عالي بس مكانش قصير , لاني ملكيتش نفس القماشه ونفس التصميم قصير , وحتى النمره تبعتي بالعاده 29\ الخصر على 29 الطول .. , بس متعوده اني دايما ما الاكي الحجم تبعي .

كان سعره 90$ بدون الضريبه ,, وكتير بحبه , مريح وحلو وليفايز , بلبسه على مشاوير مرتبه ! , ولسا ما غسلته ولا غسله , عم احاول انه يضل نظيف .

||

بيحكي سفدر ص 340 س20 " مصير اخيك ومصير امك بين يديك .. اما انا فسأظل عبدك المطيع .. ما حييت .. وسأظل انتظرك هنا "

في بحيانتا ناس هيك ؟

||


هدا الفصل صارلي شهر بعيد فيه وخايف ابلّش باللي وراه , وكل ما اكون بقمه اليأس , بدل ما اروح اقرأ قرأن , بروح اقرأ هالفصل , كال ليش حياتي من سيء لاسوء

||

اما قصه البورش الصفرا , كانت رفيقتي طول شفت الليل , واستنيت للصبح لاشوف مين اللي بسوقها , ما صحلّي للأسف ..~

السلام عليكم ..~




شايفين كيف البيوت بسانفراسيسكو ؟ متل كرتونه الكبريت , جمب بعض الحيط عالحيط والغرف صغيره وفش تهويه لشمس وهوا وبتسمع جارك كأنه في بيتك , عشان بالمدينه وملان شغل لهيك ملان عالم تعيش فيها , هاي اللقظه على اشهر الشوارع اللي هو شارع المعرجات بيحكلوه لامبورد اظن صورته وحكيت عنه قبل هالمره , مش متاكده .. ومع هيك المدينه ملانه ترفيه ومناظر واشياء بتفتج النفس ..~

؛



في سحابه صيف لحالها لهيك اخدت الصوره , بس الغيمه مش مبينه , احسن ..~


؛

انتي نسيتي ! كيف انا ما انسى ..~