مأساة روح {هالكه} في اوراق تائهه ~

السلام عليكم ..~

اليوم الاربعا والساعه حوالي 11 ونص بالليل 9\12\18

؛

بعد تحويش شهرين وما اصرف ولا اشي لنفسي لانو (ساده) كسرني بالمصروف , لاجل اشتري توم رايدر !

||

اشتريت النسخه ستيلبوك , اللي هي بتعطيك مميزات وهي توصل عندك قبل من يومين من موعد اطلاقها , وعنا راح تنزل على 14 الشهر , وكود للملابس 3 انواع , وللاسلحه اظن كمان 3 انواع , وكود للاغنيه تحميلها , وكمان بوسترات صغيره لهدا الجزء والجزئين الكدام , كان سعرها بدون الضريبه 90$ اشريتها من الامازون ..~

||

اليوم بعد ما ارجعت من شفت الليل , ونقلت السياره عشان اليوم الاربعا وعفكره الهاند بريك في السياره خربان بده تصليح , لازم اخبّر اخوتي , وافطرت وحكيت مع امي تلفون , وشوفت حلقتين من كونان , حوالي ع العشره الصبح حطيت راسي ونمت , واصحيت حوالي 11 ونص الظهر , ضليت بالتخت على امل اني اكدر ارجع انام , بس عالفاضي , مع انه ليلتين ورى بعض شغلي كان , ونمت امبارح ساعتين وهي اليوم ساعه ونص , بس بعرفش جسمي بنامش بالنهار كتير , وجسمي اتعود على ثله النوم , اتفقدت البلفون اد اللعبه وصلت البيت ولا لأ , بس لسا ما وصلت , كومت اعمل كهوه واشوف ايش اطبخ , وحكيت لو خواتي بدهم يجيوا عندي كان خبروني , انا بحبش اطبخ واكره ما عليا كصص المطبخ , بحب حد يطبخلي , بالعاده لما يجيو خواتي هم بيطبخوا , بس من غير شر محدش جاي لهيك لازم ادبر اي شي اكل , بعدين بلشت اغسل ورديت الطبيخ وهو عملت منسف لانه سريع بالنسبه الي , وهو خلي اللحمه عالغاز ع راحتها , واللبن والرز بياخدش وكت , الا اللعبه واصله , بسرعه خلصت كلشي عالعصر حوالي 3 ونص , اتصل عليا اخوي وااحد وكان بده خدمه بسيطه , عملت الخدمه ولما يجي بتكون جاهزه , وبالعاده بموعد جينته انا بحب اعمل كهوه , كنت مجهز الكهوه والخدمه , وهو حكى معوش وكت ينزل من السياره , اعطيته الخدمه والكهوه وحكيت بعقلي احسن لاني بدي اروح العب , وارجعت ابلش باللعبه , العبت شوي الا امي بتتصل , حكيت اكسب الوكت وانا بحكي معاها خليني انشر الغسيل , وانا بنشر بالغسيل لفت الدنيا فيا واقعت , مسكت حبل الغسيل وانكطع واوقعت مع الغسيل والحبل طاخ , الله ستر بلفوني , امي حكت شو هاد وكنت احكي معاها عالسماعات , حكتلها سل الغسيل وكع, الحمد لله مصارش اشي , بعدها ارجعت ع اللعبه لحد الان , لولا انو بلشت ادوخ ولا كان نفسي اكمل لعب !

||

بخصوص توم رايدر هالسنه بالنسبه الي عاجبتني لحد الان , بس بكره كيف صايرين يبشعوا لارا غير شكل , شعرها كتير بكرهه , انا صبيه بحب الجمال بخصوص الشغلات اللي بتمر مرور الكرام , بحب يكون في جمال بالابطال , سواء الافلام والانمي الكصص المانعا , العاراضات , بحب الجمال وبحب الطبيعي كمان , بما انه احنا بزمن المكص , لانو فش تعامل وكله بالهوا بهمنيش عقلهم ,وكمان في نقظتين مش عاجبيني بهدا الجزء , اللي هو اولها كصه الدم وهو بدل ماهي تعبي دم من حالها , لازم انت اللي تعطيها الدم , ناسي شو بالجزء الكديم بس اللي بتزكره انو لو اخدت نفس بدون اي شي بيرجع الدم تبعها , واللي بكهر بتكدرش تعطيها الدم وهي بالنهر ,يعني لا بكدر اخد دم , ولا بكدر لما اتخبى دمها يرجعلها , يعني ميته ميته , والنكطه التانيه اللي هي جد كهرتني وبتمنى اكون انا اللي مش عارف ازبّط الضبط , بس هي كصه لما تحدد مكان عالخريطه وبدك تروح عليه , وانا الشغلات اللي بعشقها باللعبه هي تجميع الكنوز عشان افتح مهارات , بالجزء الكديم بتكبس على R3 بيطلع شعاع اصفر كبير وبتعرف وين هالاشي بعد ما تكون محدده عالخريطه وبكون اسهل واسرع , اما بهدا الجزء لازم تعطي حالك عشبه زي الدوا مشان هدا الاشي يورجيك وين الشغلات المهمه اللي حواليك , اللي بكهر انو ما بيطلع الشعاع تبعهم الا لما تكون كريب كتير , طب لشو المخسر يعني ينعن شكلهم , غير هيك , استمتعت باول 20% على الاخر من اللعبه , من كصه بالمكسيك وعيد الاموات , وكصه غابه البيرو , وكصه وهي طفله , ماظنش انه جزء محبب للشباب , لانو لحد الان مش هالاكشن , ومش هالالغاز , اغلبها كصه وحوارات , بساطه وسهوله حتى وهي على الهارد استغربت من حالي اني ما اتصعبت من اشي مع اني من مره بعرفش العب , ولما معرفش العب بالايام الجاي واتصعب يا سلام راح تاكل مسبات اللعبه مني عالاخر ..~



||

السلام عليكم ..~ الار

عندي الساعه حوالي سته ونص المغرب واليوم هو الجمعه 9\14\18

يوم الاربعا والخميس كانوا ايام عطلتي , ومن الليله ارجعت للشغل وفي عليا حرث ليوم الحرث لانو واحده من الصبايا اخدت اجاازه ولوكت ما يلاكوا بديل مكانها اتكسّم الشغل علينا , الخميس اصحيت بدري على امل اني اكمّل لعب ع توم رايدر , ضليت بالتخت والعبت حوالي ساعه او اكتر , اكلت وانا بالتخت وانا العب وحكيت مع امي وامي اتصلت عليا حوالي خمس مرات , عشان اضل اعمل كصص الها , وعشان مرات هي تنشغل , والاهم انو اختي ايمان كانت مختفيه يومين ورى بعض , لا تلفون ولا مسجات ولا اشي , بالنسبه الي عادي , لاني انا من هدا النوع اللي بحب اختفي , بس هي مش من هدا النوع , وهدا اشي اشغل اهلي , بس حكيت بلفونها يمكن خرب عالاخر , بعدها اتصلت عليا اختي اماني وحكتلي جهزي حالك راح اجي اخدك , لانو كمان اختي اماني الها فتره طويله مختفيه انا مش شايفها لانو كمان عندها كصص ومصايب , اولها داخليا انا ازعلت , لانو عنجد كنت بدي يكون يوم الخميس بس الي , يعني اضل عالبلستيشن , لا اطلع ولا اطبخ ولا اشتغل , حوالي قبل الظهر اختي اماني اجت اخدتني وحكتلي "طعميت اختك ايمان بهدله عشان بتحكيش مع حد فينا , حتى لو عندها مشاكل لازم تحكي وتفضض مش تخلي بقلبها تمرض " بتكصد باحنا اللي هي انا واماني , لانو احنا بالعاده اسرارنا عند بعض وبنحكيش لامي اسرارنا عشان ما نمرض امي , بس انا بصراحه بالنسبه الي بضل امي هي الصديقه المحببه اكتر وهي اللي بحكيلها اسراري اكتر من خواتي لانها منفتحه وبتفهمني اكتر منهم , بس هم اماني وايمان كتير شغلات بحكوا لعبض بحكوهاش الي , وبهمنيش خاصه مشاكلهم شخصيه وكصص وحاله , المهم اطلعت مع اماني وكتير حكي صار وافطرنا واشربنا كهوه , الا حضرت ايمان بتتصل بتحكي وين احنا مشان اتكرمت عشان تشوفنا , وكانت صايره معاها مشكل كبير كبير الله يحله من عنده لانو لحد الان المشكل , عن حالي اتفجأت انها هيك انصدمت بالكصه , مشكل اختي ايمان هي واخوي واحد دايما بخلوا سقف توقعاتهم عالي وانو كلشي بصير , هدا الاشي مش النا ومش عنا , بعرفش ليش بضلوا يوكعوا بنفس الكصه , انا واماني كنا متوقعين انو ما راح يصير اللي بتحلم فيه , بس هي كانت متاكده انو راح يصير , وحاولنا قبل الكصه نخلّي سقف توقعاتها واطي , بس هي ابدا ما ردت علينا , لهيك انصدمت من اللي صار معاها , بعدها ما طوّلنا مع بعض كتير , ارجعت عالبيت وما لحكت افتح باب الدار الا اخوي واحد بيتصل , وينك يلا تعي بدنا نطلع , حكتله تواتي , واطلعت مع اخوي وارجعت البيت حوالي خمسه العضر , وعطول ركاض على البلستشن وضليت العب لنص الليل , ووصلت 40% , بس اتعبت وانعست وكان نفسي اضل للصبح زي ايام زمان , بس صحتي ما بتساعد وبخاف امرض كتير وبديش اروح ع مستشفيات وبحبش امرض , لانو بعرف حالي لما امرض بمرض زياده .


||

بخصوص اليوم الجمعه , اصحيت ع التسعه , حكيت بدي اخلّص شغل البيت لانو كان عليا اكوام شغل لاني امبارح ما صبت اشي , انا بترك البيت وما برتبه وكت ما اكون تعبانه من الشغل , اما كصه اترك شغل البيت عشان اشوف فلم ولا العب بلستيشن , بعملهاش ! بس هيني عملتها وامبين راح اعملها بزياده , المهم بسرعه بلشت اني بدي ارتب , وخلصت غرفتي , بعدين اجاني تلفون من اماني انو عمللتي موعد لكصه بعدين بخبركم عنها , وموعدي ع 11 الصبح , يالله معيش وكت حكيت بعقلي , بسرعه اكلت نص ساندوش وجهزت حالي وعملت كهوه واخدتها معي , خلصت موعدي ع 1 الظهر , وايمان الصبح كمان اتصلت عليا وحكت بدها تطلع هي واماني اد بطلع معاهم , بصراحه مكانش نفسي اطلع , المهم بعد ما خلصت موعدي , بتصل على ايمان كتير وبتردش , روحت اتصل ع اماني , واسالها اد لسا عالموعد راح تطلعوا , ردت اماني وحكتلي هي بمشوار مع جوزها , حكيت لعاد بعقلي خليني ارجع عالبيت العب توم رايدر , لانو عنجد دايما هيك بصير فيا اني بدمن البلستيشن وبضل كل عقلي فيها , وانا بالاوبر , الا ايمان بتبعت مسج انو ويني وراح تيجي تاخدني , حكتلها خلص انا روحت عالدار , بعرفش اد هي زعلت , وداخليا بديش اطلع معاها لما تتحوج اواعي , كتير بتلف بالمحلات وبتعرفش ايش بدها وبنتعب وبالاخر الاشي اللي بتلاكيه يا بس تاخده عالدار بترجعه لانها غيرت تفكيرها , يا اما بس نوصل نحاسب الا هي غيرت رايها وبطلت بدها تشتريه , يعني كل الوكت والتعب عالفاضي, عنجد هي من الصبايا اللي بتنجلط وبتتعب لما تطلع معاهم تشتري اواعي , لهيك بحبش وبالعاده بحكيش لأ , بطلع معاها وعادي , بس لانو عليا جبد شغل معنديش وكت للبلستيشن وبدي اكسب هدا الوكت , مش كصه انو ابدى من اختي , كصه اختي ايمان بضيع وكتي عالفاضي , اجيت عالبيت ومكانش في اكل وبديش اطبخ , عطول اطلعت اشتريت اكل وارجعت وبلشت العب , يعني حوالي العبت اليوم من 2 لل 5 , بعدها الدار اللي تركتها الصبح والغسيل لازم اعمله لانو معنديش وكت بالايام الجايه وبكون مهدوده من الشغل , لهيك بسرعه رتبت وغسلت ونشرت الغسيل وجليت وخليت الدار مرتبه وفش اشي مش بمكانه , وحكيت خليني احكي عن المجريات احسن ما انسى , وقبل ما اتسهّل عالشغل , ووصلت باللعبه حوالي 50% , واخر 10 % كنت اقطع مراحل وما ابحث ع كنوز , تبا بس لانو معنديش وكت ..~


||





هاي اللكطه وانا بالاوبر في الفري واي , حكيت كتير عن هدا البرج وكديش بعشقه , بس حبيت اخد هالصوره مشان كان واضح بالطبيعه كيف الضباب بيجي وبحوّط البرج وبغطّي المدينه , يمكن تشوفوا خط ابيض على مستوى منتصف البرج , هدا هو الضباب .


ارجعيلي .

||

شغلات انا فاشله فيها :؟
اكون جذابه
اكون طبيعيه
العلاقات
الرد على المسجات
الرياضيات
الحياه
... الخ

||

عملت تسجيل صوتي بحكي فيه عن مجريات هاليومين اللي مروا , بس بطلت بدي احطه لانو مش عاجبني صوتي ..~

السلام عليكم ..~

اليوم الخميس وعندي الساعه حوالي9 بالليل 9\20\18

كالعاده , ما بين الشغل والحياه هيني , نفسي مره اغيب واجي عالمدونه ومعي خبر حلو , خبر مصيري حلو , اشي مش منيح كبير صار وبديش احكيه , المشكل انو رغرغت عيوني بس ما بكيت , واكره ما عليا ما ابكي واعيط , لانو بضرب عقلي وبتكون صدمه ,كنت مشغوله بتوم رايدر , ختمتها وهيني بعمل بالمهام الثانويه , مش عارف كان براسي ملان حكي بدي احكيه , واول ما اجيت عالمدونه عشان احكيه طار ..~

||

مجريات يومي ..~

اصحيت بدري حوالي ع 8 عشان اختي ايمان ضلت تتصل عليا لوكت ما صحتني , مع انه الي تلات ايام مش نايمه , اوصلت لمرحله جسمي اتعود على قله النوم ,وامبارح حكتلها انو محدش يجي عليا يوم الخميس او انا بديش اطلع على مكان , لاني تعبانه من الشغل والدار بدها نفض وترتيب وبدي اغصب عحالي عالنوم وهو اخد المنوم , مع هيك هي حكتلي انها بدها تيجي تاخدني , لازم اجهز حالي , كان كنت مش طايك اترك التخت , واخدت وكت لكومت من التخت , ما الحكت البس الا هي بتتصل وبتحكي هيها عالباب , حكتلها استنى شوي عليا , وبصراحه استنت كتير , لاني كنت زومبي وانا اتحرك وانا اجهز حالي , اطلعت كملت لبسي وتجهيز حالي بسيارتها , عشان اختي في مشاكل بحياتها , بنضل نتلاكى عشان اخفف عليها , ومش كادر احكيلها بديش اشوفك لانو عارف مفش الها حد بالدنيا , واد انا مكنتش معاها بهدا الوكت لشو اكون معاها بوكت تاني , روحنا نفطر واجى عبالنا نروح عمطعم , ما بنجهز بالطاوله , انا غيبت شوي عنها روحت اجيب بلفونها من سيارتها , ارجعت بشوفها حاطه ايدها على عينها , بحكيلها ايش في ؟ بتحكي بالغلط بنتها الصغيره حطت اصبعها في عينها , حكينا يمكن اشي بسيط , وبلشنا نفطر واختي مش كادره تفتح عينها ولسا عينها بتوجع , بس الحمد لله ما بتنزل دم , بسرعه بسرعه افطرنا , وحكتلها استني اروح اشتري قطره عين بسرعه , روحت بسرعه اشتريت قطره , ارجعلتها وحطينا في عينها , ومع هيك اشتغربت من اختي انها كتير متوجعه , يالله انجنيت , بسرعه اتصلنا على بنتها اللي بالجامعه عشان تروح معاها عالمستشفى لانو عينها كل مالها بتوجع ,حكولها انو منيح انك اجيتي لانو عينك مجروحه جرح كبير , عطوها دوا ودهون , انا ارجعت عالدار ورتبتها , وشوفت كم حلقه , وفتحت البلستيشن , الا اخوي واحد جاي واطلعنا ع مشوار , وكان اخوي معصب وحاله ومنكد , يالله , بعدها ارجعت عالبيت , الا امي بتتصل , حكيت معاها الا اخوي تلات جاي , اتعشينا , وحكيت ارجع عالبلستيشن ولا اجي عالمودنه , لانو الليله انا بالبيت , ومن بكرا ببلش الحرث الله يعيني ..~

||



||

مش عارفه بين ارجع عالبلستيشن ولا اشوف فلم ,او حتى اقرأ , بطلت اقرأ بالليل لانو بضويش ضو الغرفه عشان حضره ساده خلع كلشي كان عالشبابيك , وانا صايره مكشوفه عفكره مشتاكه لامي ولحبي ولصوص حتى , كديش بكره فرك الوكت بيني وبينكم , لانو دايما بكون نفسي اتصل عليهم , بس عشان فرك الوكت بوكف , مع انه هم بيتصلوا عليا بوكت مش مناسب , معاهم حك , لانو باثرش عليا اشي انا , ومعنديش كصص الاحساس والكبر ..~

السلام عليكم ..~

اليوم السبت وعندي الساعه 5 المسا 9\22\18..~

من اخر مره حكيت فيها معكم , كان الخميس بالليل , العبت عالبلستيشن وبعد ما طفيت البلستيشن اظن ع نص الليل,كنت العب مع حد من الشباب , بنبسط باللعب معه من كتر ما هو طويل بالي عليا لاني بعرفش العب , اجاني تلفون من حبي زمان مش حاكين , مع اني كنت تعبانه ونفسيتي زفت , ضلينا نحكي لل 3 الصبح , كنت انا بفتره زنخه , لما اكون زنخه محدش راح يكدر يتحملني الا هو , بكون دايما اسال حالي " هو عنجد بحبني زي كل هالكصص الهبله اللي بشوفها بالافلام وبقراءها بالكتب " مرات بتمنى انو اه , ومرات بحكي , انا مش من النوع اللي بكدر ع هيك , مش من النوع اللي افضلك على حالي , مش من النوع اللي اسعدك وابسطك وبديش حمل تكيل عليا , كنت كتير تعبانه بس مكنتش نعسانه , طار النوم , حكتله " خليني اروح انام الي تلات ايام مش نايمه زي العالم والناس " وعشان انام زي العالم والناس روحت اشربت دوا كحا , بشوف مفعول دوا الكحه معي منيح للتنويم , وبشرب كتير , هدا سر مع حبوب المنوم اللي باخدها مرات , لاني صبيه بفكر كتير وبنامش وشغل الليل زاد من كل هالكصص , ضليت نايمه للظهر ليوم الجمعه

||

كديش انبسطت من حالي , كنت اصحى مرات من ساده الاهبل اللي بضل يلعب بشعري , وبنام على راسي وع شعري , وبصحى كأنه كاين في حجر على راسي , ساده هو الهر , وكنت اصحى ع تلفونات بس ما اردش عليها , الا امي حبيبه ئلبي , اد بتلاحظو كتبت كلمه (قلبي\ئلبئ) لانو امي بتحب اني احكي بهيك لهجه وانا بكرها للسما , كنت احكيها مرات تحديات من صاحباتي , بس بالعاده بحب احكي بلهجه امي وابوي , مش بلهجه الزمن هاد , حكتلها لسا نايمه , حكت خلص كملي نومي وبنحكي بعدين بس بدي اطمن عليكي , وارجعت للنوم واللي خلاني اترك التخت هو لازم اعمل اتصال مهم مع حد من معارف خالتي , ولازم اعمله كميرا كمان , عملت الاتصال وارتحت منه ,و قرأت شوي من كتاب وضايل فيه كم فصل وبينتهي وكديش مكتئبه عشان بدي اخلصه , عندي خوف صاعق لما بدي اخلص الكتاب , والعبت عالبلستيشن شوي , وشوفت كم حلقه , وجهزت حالي واطلعت الشغل , وكانت ليله صعب ..

||

اطلعت يوم السبت من الشغل واجيت عالبيت وما طلبت اوبر , روحت بالباص , واكيد بكون طاير النوم , لهيك اوصلت البيت وافطرت , وقرات شوي من المانغا , حكيت مع امي وابوي تلفون , الا اخوي تلات هو وبناته جايين , كان نفسي اكعد معهم زي هداك السبت , بس مش كادره راسي بوجع وبدي انام , كعدت شوي معهم , وروحت ع غرفتي وحاولت انام , اتغلبت , نمت يمكن بس ساعه او ساعه ونص , وكد ما حاولت اني ارجع انام مكدرتش , ارجعت اقرا بالمانغا وبسمع كصص اخوي وبناته وانا بغرفتي , بس محكيتش لحد اني صاحيه لانو بديش احكي مع حد , ضليت بالتحت الا اخوي واحد بيتصل وبده يشوف اد حد راح يجي عندي اليوم , حكتله ما اظنش , الحد بكصد فيه خواتي , وبعدها قرات كمان شوي من الكتاب واخ يا قلبي , وشغلت البستبشن واوصلت لعز وكل ما افكر كيف احله راسي بضرب عليا , طفيت البليتشن , وكعدت حوالي ساعه في حالي صافنه بس افكر وافكر , وحكيت احسن ما انجن من التفكير خليني اجي احكي معاكم احسن

||

السبب اللي صار وحكتلكم اني مش راح احكيه , امبلا راح احكيه , وهو حد من الشباب اللي بعرفهم اتوفى , الله يرحمه ويرحم جميع اموات المسلمين , بديش احكي كيف اتوفى , بس اللي جد كاهرني امه , هو الشب الصالح اللي في البيت , لا ابوه او اخوته او خواته سائلين عنه , ولا كانه اتوفى الله يرحمه , بس امه , امي حكتلي يمكن امه ما تكمل , يالله صغير عمره 25 سنه , ويالله كديش كان يضحكني , مره من المرات اجى عنا وبحكيلي " مريم شوفي حواجبي " كان حالق نص حواجبه وشكلهم زي حواجب الانيمي عشانهم صاروا خط متسقيم عريض على شكل مربع .
لما اسمعت الخبر , اخوي واحد بعت الرابط على جروب العايله , وكانت وكتها اختي ايمان عندي , وانا عم بقرا وبشوف بصورته , ضليت احكي انه مش هو , مش هو , ضليت دكايك بقرأ وبعيد بالاسم وبتمعن بالصوره عشان اتاكد انه مش هو , بس اختي تحكيلي ولك امبلا هو , كنت اتجادل معها , وضليت احكي لحالي مش هو , عطول اتصلت على اهلي بالضفه على امي وابوي ع تلفون الدار , ومحدش بيرد عليا , ارجعت اتصل على بلفون امي ما بترد , بعتت مسج لمرت اخوي اسالها اد اهلي نايمن او صاحين , حكتلي بتعرفش بس تروح تشوف ؟ , حكتلها لأ خلص , اتصلت على بلفون ابوي واخيرا رد وحكتله " يابا روح ع التلفون الارضي " وسكرت الخط , كنت ملخومه باشي بخوف , ارجعت اتصل ع التلفون الارضي رد عليا اخوي اربعه وحكالي انو اهلي مش هون طالعين , كانت عندهم نص ليل , كلشي حوالي بيحكي انه اتوفى , بس كان في امل صغير ينعن ابوه هالامل , ارجعت اتصلت ع ابوي وحكى كنت بدي احكيلك بس انتي سكرت التلفون , واه الحكي صحيح , وانا وامك واخوكي اتنين عندهم , الله يصبر اهله بعدين بنحكي " ..~

السلام عليكم , عندي الساعه 6 ونص المغرب , 9\26\18

مش جاي عبالي احكي اشي هلكيت , وكمان بديش اهجر المدونه , لهيك راح احط صور واحكي عنهم ..~

||



بالعاده في عندي صور مفضله كتير وما بزهكها , لانو بشوف فيها كتير شغلات شخصيه , لهيك هاي الخلفيه القفل للاب توب , من حوالي سنه شوفتها بمدونه مصور آسوي مفضل عندي , واغلب صوره اد مش كلهم بس ابيض واسود , بحب تصويره عالاخر , دايما عارضاته خلفيات بلفوني , وفيها كلشي شخصي لهيك من وكتها للان مش مغييرها ومش زهكانها , لما كنت ايام اشبك اللاب توب على تلفزيون الصاله وامي هون , كانت امي تشوفها للخلفيه وتحكي "زينّا "..~ ( بما انه وجهها مش واضح وكلشي مستور مشوفتش اني مخالفه قوانين القسم )

||

الكاسه زي ما حكيت كتير وهو انا بعشق التطزير , اجتني هديه مع كاسه تانيه جمجمه من اخوي وحبي , اخوي حكى انه اختار التطريز وحبي حكى اختار الجمجمه , ولاني كتير حبيت كاسه التطريز ولانها عجبت الكل , المره التانيه امي لما اجت جابت للكل وحتى فناجين كهوه ..~

||

وبالعاده دايما لازم يكون عندي ورد وين مكان , ولما اشتري ضّمه لازم اخد منها ورد واوزعه وين مكان بالغرفه , وكانت هاي الضُمه هي ذوق اختي ايمان ..~

||

واكيد البلستيشن وانا حاطط تجليد عليها (هارلي كوين) لاني كنت اعشقها لما كنت اشوفها بالانميشن الكارتون باتمان زمان ..~

؛؛؛



هدا ساده صوره كديمه , بضله عالشباك , وشايفين كيف الشباك كبير وكاشف لهيك دايما انا مكشوفه عشان حضرته , بس الحلو هان محدش بتّطلع ع حد او بيسأل عن حد .

؛؛؛




الساعه اللي ورى اجتني هديه من حد بشتغل معه بدون مناسبه بش عشان عرفت اني بحب الانتيكه , مع مرايه وشمعه ومع مخده تطريز كمان , حبيتها بس مشكلتها صوتها عالي ومزعج عالاخر , لهيك مخليتها منظر بس .

||

بخصوص الشمع , هاي الشركه عنجد الشمع تبعهم رهيب , ريحته , وشكله ,زما بخلص بسرعه , بس مشكلته انه غالي , بين 15 و 25 $ الوحده سعرها , اسمها bridge water .

؛؛؛





وهاي الشمعه الهديه , ريحتها باخور بس مش كويه وما كعدت ساعتين الا هي مخلصه

السلام عليكم ..~

اليوم هو الخميس وعندي الساعه حوالي سبعه ونص المغرب , 9\27\18

؛

كالعاده كل ما بدي اجي افضفض بالمدونه بيجيني تلفون , بفضفض فيه , الساعه هلكيت صارت 8بالليل ..

الاشي اللي عنجد بدي احكيه مشان ما انسى , الا ما اكون حكيت عن صاحبتي فد , فد هي من اول صاحبتي وانا صغيره , وكانت مراهقتنا مع بعض , عندي نسبه من حالي محدش بيعرفها الا هي , وهي النسبه الغلط اللي موجوده فيا , بظهرهاش لحد الا هي , يمكن مرات اظهرها بالمدونه لانو بعرفش حد , بس هي بظهرها كدامها وبكون مش سائله لانها بتحكمش عليا , والاشي الاحلى فيها اني بغيب وهي كمان بتغيب , بالاصل هي ما بتيجي تحكي معي , بس اللي جد بحبه فيها , اني بوصل لمرحله الاشي الخانكني فش حد احكيله , بس بروح عليها وبحكيه , وامبارح كنت مخنوكه من اشي ومش كادر احكيه لحد , عطول كتبت فقره عنه وعن شو رأي وكل هالكصص اللي مش لازم تنحكى , انبسطت انها حكتلي " عفكره كتير بشتاقلك " .

الاشي التاني الحلو هو اشتريت لعبه 4 God of A war اللي هي اللعبه المفضله عند اخوي واحد , لاني مشتاكه اشوف اخوي يلعب , وكل ما يجي عندي ساعه بلعب عليها , ويالله شو مبسوطه ومستمتعه وانا بشوفه بلعب , الحلو بده اياني اشاركه باللعب , وحكتله بعرفش , وخلاني غصب عني , بس عنجد مر شريط كدامي لما كان اخوي وحبي يلعبوا الاجزاء الكديمه , وانا اضل اضحك عليهم واتمسخر واخليهم يأسوا من اللعب وانو اللعبه صعبه وبلاه بلاه .

؛

انا بفتره عشق القرأه , ادمنت المانغا , واصناف مش اصنافي بس صرت اعشقها واعيد الفصول وحاله .

وتوم ريدر وصلت لنسبه 96 % وكله من لعبي وكديش مبسوطه من حالي . وراح احاول اختمها من لعبي بدون اي مساعده اوغش لانو يالله كديش حلو هيك لعب .

وراح ابلش بكتاب جديد وصارله سنه عندي , وكديش متحمسه .

؛

نحكي عن باكي الشغلات اللي اشتريتها ..~

البيت تبع بلفوني هو من كات سبيد كان سعره 80$ واكيد من بعده مستحيل اشتري بيت رخيص لانه لحد الان الجلد الخارجي رهيب وزي كأنه جديد !








||

الاشي اللي عنجد مستغربه منه انو الكل بسألني " راح تشتري ايفون الاكس الجديد ؟" مين حكى راح اشتريه ؟ هو صح انا دفيعت مصاري بس مش شايفه الايفون تبعي بده تبديل , ولا يعني عشان اشتريته اول ما نزل ؟ طب منا اشتريته لانو بلفوني الكديم سحبه المحيط وراح !

هون عن كصه المحيط , وهون عن بلفوني وبيته الكديم .

السلام عليكم ..~

اليوم هو السبت وعندي الساعه حوالي سته ونص المغرب 9\29\18

ومعيش وكت عليا شغل بس حكيت عندي هالصور من زمان خليني احكي عنهم ..~

||

ايش في شنتيتي ال كوتش تبعتي اللي ما بستخدمها الا في المشاوير المحرزه , وحبي لهاي الشركه بس عشان وانا صغيره كنت اشوف امي عندها متلها وكان حلمي بس اكبر اشتري متلها , ولما اشتريتها ما عجبني الا هاي المديل والحجم الصغير , وطلعت اخر اشي نازل عندهم بالمحل وكانت غاليه ومش عالتخفيظات , ولما سألت امي ما اعترضت من مره وحكتلي " اللي نفسك فيه اشتريه " وكان سعرها 400 $ بدون الضريبه .

||









||

باخدش كتير شغلات الا اللي بستخدمهم , وعفكره بدي تجديد علّاقه المفاتيح لانو بضلوا يوكعوا المفاتيح منها , والدزدان (ستيف مادن) لانو شايفته كبير وانهرى واتوسخ , حتى نفسي في نظاره جديده , بس هدا الشهر ما حوشت للالتزام تبعي واشتريت تلات سيدهات بلستيشن يعني فوق 200 $ بس للبلستيشن , وصرفت حوالي 200 $ على اواعي الي ولاختي ايمان هديه الها , عشان كانت نفسيتها مش منيحه وبعرفها بتحب تتسوق وتشتري اواعي لما تكون متحطمه وما خليتها تدفع مصاري , فا يعني كل القبضه راحت وهي احنا قرب بدايه الشهر وعليا فواتير ومعيش مصاري ملان عليا التزامات ..~

السلام عليكم ..~

اليوم هو الاحد والساعه 6 واشي المسا , 9\30\18

؛

شايفين ما احلى الصوره الرمزيه تبعتي ؟ لانو عنجد سنديلا لازم تقتل حالها لانها اوهمت البنات الفقيرات بانو راح يجي فارس غني وكل هالهبل , ومع هيك بحكيلكم بعشق كصص الانتحار بعرفش ليش صايره زياده , وبكصد كصص الانتحار بالافلام والمسلسلات والكتب والمانغا مش عالواقع الا اد كان كافر ف اه مع انو ينتحر , سفدر في الكتاب اللي كنت اقراه انتحر وكديش حبيت قوته ولامبلاته بالانتحار , حتى خلفيه المكتب تبعتي هي اخر مقطع بمانغا من كم يوم قرأتها , الصبيه اللي عشقت شخصيتها بايك , حملت حبل في ايدها بستخدم امان للاغراض والصناديق وقت السفر , وهاي البنت طول المانغا بضل تفكر تقتل حالها , اخر لكطه مسكت الحبل وحكت بعقلها " ما احلى الحبل لو يلتف على رقبتي , اكيد راح ياخد حياتي " وسالت حد اد بده الحبل , وكانت عيونها انها حازمه يعني اكيد راح تقتل حالها حتى لو النهايه مفتوحه , غصب عن اللي بده واللي ما بده ...~

؛

هدا الاسبوع والاسبوع الجاي في كصتين مهمتين بالنسبه الي , بالنسبه للاولى يا رب تزبط يا رب , كتير بفكر فيها , وعارف مش راح تزبط لانو بعرف لما ارتكب اثام الشغلات بتزبطش عقاب من ربنا , وحكيت لاهلي انو ما تتوقعوا انها تزبط , بس راح اعمل كل اللي بكدر عليه ويا رب يجي النصيب معي وتزبط , اما الشغله التانيه فهي من الشغلات اللي ياما اجت عليا وياما اتزاعلت مع اهلي عشانها وصارللها اشهر , ومع هيك بدي اشي جديد بحياتي فا بعرفش بهاي الكصه , لانو دايما بهيك كصص بستدعي المناسب ومن ربنا احسن ما استدعي بالزبط ايش بدي لانو دايما الاشي اللي بدي اياه بالاخر بطلع مش منيح , لهيك بترك الشغله لربنا بالكصه المهمه التانيه ويا رب كل خير ..~

؛

ايش مجريات يومي بشكل سريع ..~

اجيت عالبيت حوالي الساعه 9 ونص الصبح لانو كان عليا شفت ليل , وكانت ليله صعبه جدا جدا جدا , ما صدكت يطلع الصبح , بالطريك عالبيت بالعاده بحب اتصل على اهلي اطمن عليهم وخاصه امي , وصارلي فتره باجي عالبيت في الباص الا يوم التنظيف للشارع عشان انقل السياره , بس عشاني بحاجه مصاري واكتشفت انو الاوبر بصرف حوالي 500$ بالشهر انجلطت , وفي باص لازم يمر من منطقه بكررها , وعشان اليوم الاحد ما بكون في شرطه تعطي مخالفات للناس اللي بتطلع بالباص بدون ما تدفع , لهيك بكونوا كل المشردين بالباص نايمين وريحه الباص يا سلااام , زمان كنت اخاف منهم عشانهم بيتعاطوا , بس مع الزمن اكتشفت بعملوش اشي الا بس بناموا بالباص لانو فش مكان يناموا فيه , بس مشكله واحده وهي الريحه بتقتل , ف اتصلت ع اهلي على تلفون الدار , هلكيت اهلي عشان اغلب اولادهم هون فا عندهم تلفون اسمه اوما زي ماجيك جاك او هاي الكطع اللي بدها نت وبتكدر تعمل رقم امريكي , لانو امي وابوي مش تبعون البلفونات والنت والتطبيقات , بحبوا تلفون ارضي مريح وسهل وليش لأ , بدفع عليها شهري 20$ وبكدروا يحكوا مع اي حد بامريكا وكد ما بدهم بدون حساب عالدكيكه , كل ما اتصل عطول تعطيني انو التلفون مغلق , وانا عشاني بنت كتير متعلقه باهلي واحنا النوع اللي المشاكل دايما حوالينا فا بخاف من هيك كصص , لهيك بالخط تبع بلفوني فاتحه يتصل دولي على الشرق الاوسط , بدفع شهري 15$ بس فتح خط , ومحسوب على كل دكيكه لهيك بتكطون فاتوره بلفوني مرات فيها زياده غير شغل , وفتحت هاي الخدمه عشان هيك اوكات , وعشان حبي بيدخل السجن كتير , وعشان قرايبي وهيك كصص , لما اتصلت عليهم بيحكوا اهلي " انو خطوط التلفونات بالحاره خربانين وبدهم اقل شي تلات ايام ليزبط كلشي " يا سلام محدش بيكدر , بس الله يعينا ويعين امي اللي عنجد بتعرفش تكعد بدون التلفون ..~

اوصلت البيت افطرت كان اخوي تلات عامل ساندوش جاج كديش انبسطت لما شوفته , والله كنت اكل وانا نايمه بالتخت ومتمدده ومش سائله اد الاكل بوكع عالتخت , عيوني مغمضه ومتممده وساده الزنخ بلعب بشعري وحاله , حاولت اغصب عحالي النوم , لاني صارلي شهر بعرفش انام بالنهار صايره انا , والحمد لله نمت , اصحيت حوالي الظهر على تلفون من اختي ايمان , بتحكي هينا عالباب افتحيه , اد انتبهتو ما كنت اجيب سيرة اختي اماني خلال الاسبوع الماضي عشانها كانت مسافره على ولايه تانيه , ورجعت عالسلامه , ولسا لليوم لاخوتي لما شافوها , اليوم الحمد لله اجتمعنا كلنا , طبخوا خواتي طبختين الله يخليهم لانو عارفين انا طل هدا الاسبوع شغل ورى بعض وكصص مهمه عليا , وكانت اختي جايبه معاها خلويات عربيه وكصص لانو الولايه اللي راحت عليها فيها عرب اكتر من عنا هون , بالاصل معبيه عرب , انبسطنا مع بعض وحوالي العصر روحوا ..~

كانت الدار كايمه كاعده , بسرعه رتبت اللي بكدر عليه , واهم اشي عندي كان المطبخ لانو منظره بخوف مكدرتش اتركه , واطلعت عالحوش لاني بحبش اغيب عن الورد اللي بالحوش وخاصه هاليومين عنا الدنيا طالعه الشمس , لفيت كم لفه اخلع الحشيش وازرع واسقي , وهان التراب تبعهم اسود او احكي بني غامق ودايما اظافري بتوسخو وانا لابسه كفتات , اخدت شاور , بعدين اتغديت وشوفت فلم ياباني كديش انبسطت فيه , بس للاسف بيحكيش عن الانتحار , بس بحكي عن شغله تانيه بحبها اللي هي الخيانه وانو نهايته مش لبعض وبموتوا يالله شو حلوه نهايته ..~

؛

||



بعرفش اد حطيتها قبل هالمره , بس هدا الوكت بزكرني برمضان , هدا شباك المطبخ , وكتير اكون صافنه فيه وامي تكون تشتغل بالمطبخ لهيك بحبها هاللكطه ..~

السلام عليكم ..~

واخيرا اجاني المزاج والوكت لاجي عالمدونه , زي ما حكتلكم اخر مره انو كان عليا اسبوع بكصص كتير , الحمد لله انو شغله حلوه واخيرا صارت معي , والليله واخيرا انا بدي انام بالدار , انهديت بالسهر وشفتات الليل , والعبت شوي على توم رايدر , وبلشت ارجع للدراما الآسويه والمسلسلات الاجنبيه , ومبسوطه اني لسا متابعه بالقرأه ..~