مأساة روح {هالكه} في اوراق تائهه ~

السلام عليكم ..~

اليوم هو الثلاثاء والساعه هلكيت بدها تصير 6 المسا || 12\4\18

؛

اخر مره كنت فيها عالمدونه الاحد , امبارح الاثنين كتير ادخل المدونه لانو في شغله براسي مزعجاني , حكيت اجي احكي عنها , وكل مره ادخل بدي ابلّش احكي عنها , اشي جواي بيحكي لأ يا مير اضلكيش تفضحي حالك بالشغلات العاطله اللي فيكي , بعرفش اد مع الزمن ارجع احكي عنها , لاني شايفها مش غلط ووين الحرام فيها , بس بعرفش خايف الزمن يلّف فيّا وكل العاطل اللي فيّا والحقد يرجع عليّا , ومع هيك بكدرش بكل صراحه اني اكون مسامحه وطيبه , وبشوفش حالي اني بوكت اكدّر اغير من حالي للاحسن , بالعكس بشوف من كل مطّب بوكع فيه بضّل عالارض , ولما اصحى , بكون نار جواي وبدي احرق الكل , وبخليني احط حواليّا اسوار وقفول اني مستحيل ابدا ابدا اسمح لاشي بالدنيا يكسرّني , عم احكي اشي ما عم احكي عالم وناس لانو العالم والناس اننتهو من حياتي من زمان , بلّشت اخبّص بالحكي , لاني معنديش وكت لهيك بحكي كل شي بفكر فيه لانو لازم اطلع عالشغل ..~

؛

الاحد تأخرت تا نمت لاني معرفتش انام من مره , بس ضليت لبعد نص الليل بعملش اشي الا بس متممده بالعتمى وبفكّر , وكُنت اغصب عحالي النوم لانو لازم اصحى بدري .

اصحيت الاثنين حوالي 7 ونص وضليت حوالي نص ساعه بالتخت , يالله كديش بكره اصحى بدري , وكديش بكره اشتغل , جهزّت حالي , وحتى معنديش المزاج ادوّر على اواعي , لهيك اللي كنت لابسهم امبارح الاحد بالليل ارجعت البسهتم وجتى اخدت الشنته المحرزه معي ولا اهتميت اد بتنقحط بالباص , ولما شوفت في تطبيق الباص اللي عندي بالبلفون انو الباص بدّه عشر دكايك وانا لسا بالبيت , واللي بعده بدّه نص ساعه , حكيت بعقلي روحتي فيها اليوم يا مير , بتكدري بعشر دكايك توصلي الباص ؟ العشرين دكيكه المشي بتكدري تعمليهم بعشر دكايك وانتي فش فيكي حيل تركضي ؟ حكيت يلا الخدّ متعوّد ع اللطم وهو اني متعوّده ع انو الباص بثواني يسبقني , اطلعت من الدار وركاض بالشارع اني اد بكّدر اوصل الباص , ونفسي اتقطّع وحاله , مشيت اول تلات شوارع والشارع عن شارعين من كتر ما هو طويل , ولما اجيت اوصل الشارع التالت وشوفت ع التطبيق انو الباص بدّه بس دكيكتين , حكيت يالله هلكيت بوصله ,’ بعدين اتزكرت انو لأ لسا بدي كمان شارع ت اوصل موقف الباص , بلّشت اضحك مع حالي , وحكيت والله شو مستحيل اكدّر اوصل الشارع الرابع في دكيكتين , لهيك بلشت امشي بطيئ بالشارع الرابع , وانا امشي شوفت الباص من بعيد راح , اوصلت الموقف وكعدت استنى بالباص واتأخرت ع الشغل , ومع هيك حكيت بعقلي يا مير بحياتك تزعليش مش هالاشي المحرز , وعنجد كان من المرات اللي عنجد بزعلش ع اني اتاخرت وع انو الباص راح عليّا .

||

اوصلت الشغل وكان شغل خفيف , حكيت مع امي ومع ايمان , وامي لسا بالاردن , ومرات لما تحكي معي بتكون عند دار حُبي , لهيك لما حكت معي كانت تحكي بصوت واطي وتوشوش لانو حُبي كاين كاعد ع الدرج , واسمعوا انا بعرف حُبي وهو بكون يتنصّت كتير , لهيك بضّل احكي لاهلي تفتحوش كصص الجيزه والزواج وانتو في دارهم , بس ما حكتلهم لانو بتنصّت , وقبل بيومين ابوي فتح الكصه وكان حُبي عالدرج بس اهلي ما كانوا منتبهين , وفجأه سمعوا صوت الباب خبّط بصوت حامي وعالي , بس اهلي ما فهموا , بس انا افهمت , لهيك حكيت لامي لما يكون بالدار احكي معي بصوت واطي , حبي من الشباب اللي بدوا اياني غصب عن الكل وبحسّه بضّل يستدعي اني ما اتجوز ولا تفتح عليّا لانو عنجد كصه ارتباطي كتير صعبه , وبضّل يحكلي راح اضّل ادعي ع كل اي حد بيتقدّملك او بيطلبّك , وانك تتزوجي غيري هو حلم ابليس بالجنه , بديش اعبر بهيك كصص هلكيت , كله برجعله , وحكيت مع ايمان انو مش جايه اليوم عندي وانا داخليا انبسطت , حكيت يالله بروّح عالبيت برتاح .

||

اوصلت البيت , وعملت كم شغله مهمه بخصوص الدار , وحكيت مع امي وابوي , وبعدين اتمددت عالتخت اني انام ونمت حوالي نص ساعه , ولما بلّش الوكت يكرّب ع ميعاد شغلي , شفت الليل بلّشت النفسيه تصير زفت , وحكيت لو الوكّت يوّكف , جهزّت حالي وطلبت الاوبر واطلعت ع شفت الليل .

||

لما عبّرت عالشغل شوفت شب مرات بيجي بيشتغل وكت الطوارئ , يعني لما (دون) يكدرش يشتغل لحاله , لهيك بيجي بساعد دون , بس انا مكانش معي خبر , لما شوفته خوفت انو بده يشتغل معي بالليل , ووجهي اتغيّر وكنت بدي افكع , لاني حكيت لجينفر دايما انا بشتغلش مع شباب , وحتى لو انه من هدولاك , (دون) لما شاف كيف وجهي اجى يحكيلي انو كارمليتا بالطريك وانو هدا الشب اشتغل معه بالنهار , عطول نفسيتي ارتاحت , وعفكره اللي اكتشفته انو بيكرهوه , لانه فلبيني متلهم , وبحبوش يكونوا منهم هدولاك , لان كعدت تحكيلي كارمليتا (زوج بيستنى في زوج ) وبتضحك وبتظهر حالها انها بتضحكش .
كان شفت كتير صعب وصار مصيبه بالشغل , واجوا الاطفائيه والاسعاف , وصار هدا الاشي معي كمان قبل هالمره بس كنت لحالي , بس هاي المره الحمد لله انو كارمليتا معي , ونفس اللي اجو هديك المره اجو هاي المره , في شب منهم عنجد بحب شكله , متأكده انه ايطالي , وانا بحب اشكال الايطالين بس لو منخاريهم اصغر شوي , دحلنا في تحقيق وكصص , بس كله الحمد لله سهل لانو الحك مش علينا , بس الي اكتشفته انو عنجد الناس مش كد الثقه , بعرف انو الكل اللهم نفسه , بس بضل يعني محدش بده يتحمل المسؤوليه , يعني لما احكي لكارمليتا اشي تعمله , تروح تنقل الحكي وتحكي مهي مريم اللي حكتلي اعمله, ولا بدها تتحمل مسؤوليه اي اشي , وانا ما كان يهمني اني اتحمل المسؤوليه لاني لما احكي الها تعمل الشغله اكون متاكده لانو صارت معي قبل هالمره , بس هي ما كانت تثق باللي احكيه لهيك تحط اسمي بالنص , غريبين الامركان وبخافوا كتير , المهم الاطفائي الايطالي , بين كل الشقر والاجسام الحلوه , بضّل هو عندي احلى واحد فيهم , حتى حكيت لامي عنه قبل هالمره لما شوفته اول مره , واليوم كمان حكيت لامي " يما بتتزكري شب الاطفائيه الناعم الايطالي " حكتلي "الله يبعتلك احلى منه" .

||

اطلعت من الشغل عالموعد , ودون اجى وبلّش يتلفسف بجلطني بكلامه صاير , اخدت الباص , وصار كمان شغله بالباص , حد من الطافين المشردّين , جننا في الباص , يهجم عالناس , وفش فيه حيل يضّل واكف , ويوكع عالارض , واجت الشرطه طلّعته من الباص وحاله , اوصلت الدار وحكيت مع امي وافطرت وحكتلها بدي انام لهي اد اتصلتي وما ردّيت عليكي بكون نايمه ما تخافي فش اشي , لاني خلص صرت احط البلفون ع الصامت , لانو هدا الاسبوع عليا شغل كل ليله ومع شغل النهار ولازم اروح من شغل ليل لشغل نهار , الله يعيني على هدا الاسبوع مع هدا الجدول .

||

وهاي المره الحمد لله نمت , اصحيت حوالي 2 ونص العصر , ولما فتحت البلفون ملان متصلين عليا ومسجات من خواتي واخوتي , ارجعتلهم كنت نايمه .

||

لحد الان مش جاي عبالي اكل , ع وجبه الفطور , بس كنت اتحلى واشرب كهوه وهيني ..~

؛





كان لازم اكون القويه , بس اطلعت انت اقوى منّي ..~
؛



حتى لو اني كنت خايفه اخسرّك , تركتك زي هيك ..~



انا واحده لما تبلّش الشغلات والناس تجيب وجع راس بتركها ..~

||

يا سلام متكونش الصور كبيره , بعدين برجع ازبطّها اد كبيره .. كله من العجّله والسرعه ~~

السلام عليكم ..~

اليوم هو الخميس والساعه 10 بالليل || 12\6\18

؛

مهدوه وبدي ابلش احكي عن مجريات ايامي وانا عين مفتوحه وعين مغمضه , اخر مره كنت هون الثلاثاء , قبل ما اتسهّل عالشغل , واتسهلت وكان الشفت مع كارمليتا , وكان شفت صعب غير شكل , كارمليتا عصبّت عالاخر , واحب ما عليا اشوفهم بعصّبوا متلي , وينجنوا من الشغل متلي, عشان مش بس انا الوحيده اللي بعمل دراما بخصوص الشغل وانه صعب واحنا مظلومين , وانا ابعبش في بالبلفون لكيت مقتطفات صور مسروكه من المانغا اللي بعشقها عن الفصل الجاي , ولكطات رهيبه , وامبين انو بس ضايل كمان فصل او فصلين وبتنتهي المانغا , وبالعاده الفصل بياخد اشهر لوكت ما ينزل , بس المقتطفات رهيبه , والكل ببكي وبعيّط من ردت الفعل , لانو بموتوا الابطال امبين , يا ريت , يضّلوا ميتين يا ريت ,وما احلى الموت تبعهم , ما احلى المقتطفات اللي بتصير , ما احلى الغُل والحزن والمطر والدم اللي بالفصل , عطول اخدت الصور وحطيتهم خلفيات لبلفوني ..~

اجى صُبح الاربعا , وبالعاده بيكون يوم عطلتي , بس في عنا مشاكل بالشغل , وفش حد موجود ليشتغل , لهيك انا اشتغلت غصب عنّي , اطلعت من الشغل واخدت الباص , اوصلت البيت وكان في كصه كبيره بخصوص اخوي تلات ويالله شو اتعقدت الكصه معي , كنت نعسانه وتعبانه وجعانه , ومع هيك كعدت ساعه وانا احاول احلّ الكصه وعالفاضي , وما حبيت احكي لحد عن الكصه لوكت ما احلّها عشان ما اعطي امل واعشّم حد , كنت عنجد مكهوره كتير , حاولت كلشي وعالفاضي , وبالاخر خبرّت الكل خلال نهار الاربعا مشان اشوف اد حد بيكدر يساعدني , بس محدش وحتى لليوم كمان بحاول احلها واخ يا ربي تفرجها يا رب , وانا اعمل بالكصه اتصلت عليا ايمان , وكنا متفكيّن انو نطلع ع ميعاد الها وميعاد الي بخصوص كصص عنايه وما عنايه , بس مكنتش امفكّر انو راح تيجي بدّري , حكيت يمكن انام ساعه قبل ما تيجي , بس ما لحكّت جهزت حالي , الا هي بتتصل وبتحكي هيها بتستنى بالسياره ع باب الدار ,شوفتها واطلعنا وكان يوم متعب غير شكل بالنسبه الي , لانو ضليت برى البيت من الصبح للعشا , من مكان لمكان لمكان , واتفكت مع زوج اختي اخد السياره , كال عشان يضّل عند كلمته , لهيك روحنا ع مكتب مشان اسجّل السياره باسمي , وكعدنا بالمكتب حوالي 3 ساعات , لانو هيك الدوائر الحكوميه بتاخد كل الوكت وانت تستنى وارجعت عالبيت فيها وكانت اول مره بسوكها وبالليل كمان , فا كنت كتير مركزه وشايفها صعبه بس الحمد لله الحمد لله اوصلت عالسلامه والحمد لله لكيت مكان اصف السياره مش على يوم التنظيف .

اوصلت البيت حوالي 6 ونص المسا ومكانش معي وكت لاي شي الا بس اعمل كاسه ليمون بسرعه لانو راسي كتير بوجع والفلونزه رجعتلي , عملتها وطلبت الاوبر واخدتها معي , وانا اركض بالكراج فلت البلفون مني وطار , ولما شوفت كيف البيت تبع البلفون طار بجهه والبلفون بجهه تانيه , ولما شوفت انو البلفون وكّع على الشاشه , ولما اسمعت الصوت , حكيت العوض عليكي يا مير , العوض عليكي , وكنت خايفه لما احمل البلفون واشوف كيف الكسّر , وحكيت لا حول ولا قوه الا بالله لسا ما انبسطت عالسياره , وكل تحويشت عُمري ومع الدين هلكيت دفعتهم مره واحده ,دايما الفرحه ما بتكمل معي , لهيك بحبش افرح وبخاف من الفرح , بس الحمد لله الحمد لله انو الكسر خفيف , او احكي اقل من ما كنت متوقع , صح تلات كسرات من فوق لتحت زي البرق , وطحن خفيف على الزاويه , بس بضل مش طحن وتفتفت بخوّف , يعني بصريح العباره بكدّر اتحمل هيك كسّر ومش راح اصلّحه .

اطلعت في الاوبر وكنت تعبانه ونعسانه ومفلوزه وحاله , اوصلت الشغل وكانت عنجد عنجد من كل النواحي ليله زفت واتكاتلت مع المسؤوله , بعرف حالي عشان بحكي الصراحه وبديش اكزب ولا اجامل وبحكي اللي بفكر فيه بعبر بمشاكل , لاني باللحظه اللي بسألني شخص اشي بحكي لحالي ما تكزبي ولا تخبّي , هي سألتني مالك وحكتلها مريضه , طلع مش لازم اشتغل وانا مريضه , او اني احكي عن حالي مش مريضه يعني اكزب , وكعدت تتفلسف ليش جايه اشتغل ومن كل هالحكي , وانا ضليت ساكته عشان ما احكيلها فش حد بده يشتغل عند عملاء انتي المسوؤله عنهم , وعشان ضليت ساكته عاودت رمت كمان كلام وهي لتروحي تمرضّي حد من العملاء , حكتلها مهي العميله تبعتك اللي مرضتّني وهي اتغيّر وجهها وصارت تضحك وحكتلي ضلك بعيده , الله ياخدها شو بكرهها وبكره العملاء من طرفها وبكره الشغل وبكره كلشي . وجينفر كمان بهدلتني وكارمليتا كمان انو مش لازم احكي هيك , ويمكن هلكيت هم يعبروا بمشاكل عشان خلوني اشتغل وانا مريضه , اي روحوا كلكم بدكم تطردوني من الشغل ؟ يا ريت تيجي منكم مش مني . زي ما انطردت من هديك الشركه عادي انطرد من هاي , وايش فيها يا ربي اكون فاشله واضل بالبيت ؟ لا شغل ولا ما يحزنون , وين الغلط ؟

اجى صبح الخميس واطلعت من الشغل وكان عليا اروح من شفت لشفت , وحكيت بعقلي اد شوفت حالي تعبانه كتير ما اروح عالشفت الصباحي , بعدين حكيت اشتغل احسن ما اجي عالبيت وتيجي ايمان وهي هي تروح عليا بدون نوم , وبالطريك بلشت اقرأ بالجزء التاني من الروايه اللي بقرأها وخلصت فصّل بس بصراحه ما اعطيت الفصل حقّه لاني كنت نعسانه , روحت عالشفت الصباحي وكان شفت حلو لطيف عكس شفتات الليل سبحان الله , وانا بالطريك حكيت مع امي حوالي نص ساعه , وانا بالشغل اتصلت عليا ايمان وحكتلي في ورق ناكص بخصوص السياره ولازم ارجع ع المكتب واسال , حكيت بعقلي عشان هيك بكره اخد اشي من اختي ايمان لانو دايما الشغلات ناكصه معاها وما بيرتكن عليها , حكتلها ماشي راح اعاود ارجع عالمكتب وبدي اقل شي ساعتين او تلات وانا استنى بميعادي اخ بس , ولما اطلعت من الشغل حكيت ينعن ابو كلشي , مش نايمه فوق اليومين , وكلشي صعب , بديش اروح عالمكتب , بدي اروح عالدار .

وبالطريك عالبيت ارجعت اقرأ بالفصل اللي قرأته الصبح , ولما انزلت من الباص شوفت حالي جمب البنك وحكيت في شغله مهمه لازم اعملها , راح ادخل البنك واد شوفته فاضي بعمل الشغله , اما اد العكس بسحب حالي وباجي عالبيت , الحمد لله كان فاضي , ولكيت الصبيه اللي دايما بتساعدني فاضيه ومحدش عندها , دخلت ع مكتبها وسألتها السؤالين وعملت الشغله والحمد لله كلشي مشى بسرعه وبدون مشاكل , اجيت عالبيت , وكنت طول النهار بين تلفونات مع امي وابوي , ترتيب الدار وكصصها , واللعب مع ساده , والمشاهده , والسهر مع اخوي تلات , وهيني نايمه الليله بالبيت ياي ..~

||



؛



.

السلام عليكم ..~

اليوم هو الجمعه وهلكيت الساعه 4 ونص بالزبط || 12\7\18

اليوم عليا شفت ليل وراح ابلّش بدري لهيك معيش كتير وكت احكي بالمدونه , واليوم كان خفيف حلو لطيف , اصحيت ع جرس البيت حوالي 9 ونص الصبح وكانت ايمان , اكيد مهو اليوم الجمعه , روتينها الصباحي تيجي عندي , حكتلي عالباب انو زوجها بالبيت وهي بس اجت مرور مشان تجيبلي اكله بحبها وبحبها هي اللي تعملها , دايما بشوفها زاكيه من ايديها هي , اعطتني الاكل عالباب وحكتلي بشوفك ليوم تاني , وانا معرفتش ارجع انام لهيك افطرت واشربت كهوه واتصلت حوالي الظهر ع اختي اماني اشوفها اد بدها تيجي وحكت مش فاضيه , حكيت يا سلام , لهيك كان اليوم يوم لنفسي , حلو ولطيف , بين الاكل والشرب والقراءه والمشاهده والترتيب , ورميت كتير اواعي من حزانتي لاني بكرف الاشياء الكتيره , بحاول اخلّي حياتي بسيطه بالشغلات اللي حواليا , ما اتعاملت ولا مع اي حد حتى امي ما اتصلت عليا , يا حرام بتكون امفكره اني نايمه , واجاني تلفون العصر من جينفر انو دوامي اليوم قبل بساعتين عشان في ظرف طارئ وهيني . شوي وبتسّهل ويا رب تهونها عليا يا رب ..~

؛



؛



اخوي واحد هديك اليوم سألني " مير لما توصلي للشغله اللي طول الوكت بتستني فيها بطلّتي تنبسطي كتير عليها ؟ او بس ثواني وبعدها بترجعي لحالتك ؟ " اتبسّمت بوجهه وحكتله " لأ , امبلا بنبسط كتير " رجع حكالي " بلا كدب " . وبعدها سكتنّا احنا الاتنين , وفكرّت فيها واتزكرت الشغلات اللي مرّت عليا وهو كان معي بكل هالشغلات وكاين ملاحظ عليّا ,وطلع صحيح كلامه وهو الاشي اللي بضّل اتعب واحرث واركض وراه عشان اوصله , ولما اوصله بكون براسي " اه هلكيت انا برتاح " مش اه يالله شو مبسوطه عالشغله , لأنو صار بس اني بدي ارتاح من التعب والحرث والركاض وراه , فش حيل للانبساط , وااال .. هيك الحياه صارت ! هو انا بس الوحيده هيك ولا الكل متلي ؟ ما اظنتش .

||



؛



بالفتره هاي بحب الكهوه الامركانيه بس ساده سمرا , تكيله مُره , عشان اكدّر اعدّل مزاجي او امشي بيومي ..~

وكل سنه بموسم الكرسمس بنزّلوا نوع جديد من التشيز كيك , كان هديك السنه مانجا تشيز كيك , وهالسنه هاي , كانت فراوله مع توت ورهيبه ..~

؛

السلام عليكم ..~

اليوم هو السبت والساعه 5 المغرب || 12\8\18

؛

امبارح بعد ما كنت ع المدونه , عطول سكرّت اللاب توب وطلبت اوبر واطلعت عالشغل , بالطريك الاوبر مش عارف يسوك وبطيء , اتأخرت نص ساعه عن شغلي , ولا مره بحياتي اتأخرت هيك, فكعت معي وانا في الاوبر , وكانت امي معي عالخط نحكي عن كصصنا , اوصلت الشغل وكان شفت صعب غير شكل , انهديت واتعبت , واللي اكتشفته انو الحب اللي بيطلع ع وجهي من اسبابه كمان الشغل , لاني لما انضغط بالشغل بصبّح طالع على وجهي حب , وكان الشفت مع فرجينا , وانا بالشغل حوالي بنص الليل اتصلت احكي مع امي وحكينا شوي حوالي نص ساعه , وبعدين ارجعت عالشغل وضليت للصبح وانا وفرجينا اشكالنا تعبانه ومش عبعضنا من مره .

اجى الصبح وكان جاي شب جديد يشتغل مع فارهيليوا , لانو رجعوا يشتغلوا اتنين بالشفت الصباحي مش بس واحد , وهالشب لما شوفته اتزكرت شب كنت اشتغل معه زمان , مع بدايه شغلي من اربع سنين , واطلعت من شغلي واخدت الاوبر وطلع اللي بسوك واحد عربي , بس مكانش عبالي اتعرف عليه , واحنا نستنى بالشب التاني اللي بده يطلع معانا جننا وهو حضرته واكف ع الرصيف والشوفير العربي بنادي عليه وهو جحش , بالاخر الشوفير العربي نادى عليه بالعربي " خلصّني عاد " وانا داخليا اضحكت كتير بس مسكت حالي , واوصلت البيت .

كالعاده ساده ركاض عليا وبنرمي حالنا عالارض , وبعطيه تسالي ياكله لاني هيك معوّدته , وبعدين الا امي بتتصل وحكيت معاها هي وابوي , وامي حكتلي بنفعش اخلّي ساده يضّل بالبيت محشور حرام , لهيك بعد ما خلصت تلفون مع امي , حكيت يا رب تستر وخلّص بدي ارجع اخليه يطلع يلعب برى بالحوش , طلّعته يلعب برى , وانا عملت فطور وكهوه ولفيت عالدار اشوف شو بدها ترتيب , وجهزت حالي لانو خواتي حكوا راح يجيوا عندي بعد الظهر يعملوا طبيخ , وانا بشوف بفلم وبستنى بخواتي , اسمعت صوت ساده بتكاتل مع هر تاني , وحكيت اكيد الهر تبعت حسن صبي ’, عملت حالي مش سامع وحكيت بدهم يقتلوا بعض الله لا يردهم الاتنين , وحتى لو اطلعت برى وانادي عليه مش راح يجي ويرد عليا بعرفه , بالاصل راح يشوف حاله ويتقاتل اكتر , لهيك ضليت بالغرفه اراقب فيه ليجي لحاله , وبالزبط بعد كم دكيكه جاي ونافش شعره انه منتصّر , ضربته كفيّن وحكتله مش وجهك وجه يطلع يلعب برى يا ابو المشاكل , حملته وحشرّته بالبيت وضّل يعيّط , بعدها اجوا خواتي وهو حِرد وضل تحت التخت .

اجتمعنا انا وخواتي والاولاد الصغار , ما اجى اخوي واحد ولا حتى اخوي تلات , ضلوا عندي لل 4 , من كصص وحكي واكل وشرب وطبيخ وكصص كبيره , بعد ما اتسهّلوا انا لفيت عالدار ترتيب وهيني ..~


؛



مش راح اكون هون اعمل اللي انت بدك اياني اعمله , فاهم !



كُل قلبك واحكيلي كيف طَعمه ؟

||

كل فتره بحكي عن الفضه اللي عندي , ومضلّش كتير مش حاكي عنه ..~

الفضّه والعنايه (كريمات وكصص) اكتر شغلتين بدّفع عليهم مصاري بحياتي بدون اي ندم !

؛

حكيت عن الفضّه بمشاركات كديمه واجدد مشاركه كانت هون

؛

هالفتره مش كتير كنت انوّع بس مع هيك ايش استخدمت خلال الشهر الماضي ..~



هدا مرسوم عليه هندي احمر راكب ع حصان لاني بحب الهنود الحمر , مريح وخفيف , بس اكيد راح دايما اضّل سامع صوت خرخشه , بلبسه لما اكون مش مرتبه بشوفه بيلبك .. فضه خفيفه ..~
في نكته وهي " بدي اروح اعيش عند الهنود الحمر لانو كل ليله سهر ورقص وكمان على راسي ريشه )

||




هاي الكطعه مش زوكي , هي زوك امي لان امي بتحب الزهري وبتحب البسه وبتحب الورد , لهيك لما اشتريته امي كانت معي , بلبسه مرات لما اشوف حالي انثويه زياده عن اللزوم ..تكيل ومش مريح , ومرات بتغيّر الوجه وانا اتحرك , ومرات بضّل ثابت ولحد الان مش عارف شو السر مشان يضّل ثابت .. فضه اصلي ..~


||



صدف بحر , وجديد اشتريته , يعني من سنه حوالي , واشتريت اتنين واحد إلي وواحد لملاكي لانو احنا التنتين بنخاف من الفراشه , بحب البسه كتير , لانه خفيف وملفت للانتباه , وبشوفه بيعطني فضى وبياض .. فضه اصلي ..~

||



كطعه مميزه عندي ومن المفضّلات , يعني هاي الكطه ما بعطيها لحد يلبسها مين ما كان , بالعاده الشخص الوحيد اللي بعطيه يلبس من الفضه تبعتي هو امي , من اتخن الكطع اللي عندي , اشتريتها مع تعليّقه بس بحب البسه بدونها , كتير ضليت لابسته هدا الشهر , والكل بحبهاش بيتخيلوا حيّه , بس هاي جد من الكطع تبعت تراثنا الفلسطيني لهيك بعشقها , رهيبه ! فضّه اصلي تكيل ..~

||



اخر كطعه لهدا الشهر , هدا السنسال كتير بلبسه بس بغيّر التعليقه , وهاي التعليقه من ال 5 المفضّلين عندي , ويمكن تكون رقم واحد عليهم كلهم , يعني في اشي مفضّل اعلى الهرم , اللي ولا بزهكه ولا بمل منه , وهي كمان من التراث , ويالله شو تكيله , بس بعشقها ! ..~ فضّه اصلي تكيل .~

؛

السلام عليكم ..~

هاي تالت مشاركه بكتبها اليوم , من كتر ما انا فاضيه , فش عليا سهر ومش عارف انام , الكهوه البارده جمبي , و ساده الهر كمان , وامي بتردش ع البلفون , وحبي في غيبوبه لما ينام , ملان بالجهاز افلام ومسلسلات بس مليش نفس اشوف اشي , ومليش نفس اقرأ حتى , بسمع اغاني , وهيني ..~

؛

|

؛

ايش اشتريت مع ايش استخدمت :~



هدا الشهر استخدمت هدول اللونين , وكتير لابكين ع بعض , اللون الكرزي كتير بحبه , وبخصوص اللون البصّلي اول تجربه وكان كتير رهيب من لون لثبات , يعني محدش بينتبه انو حاطط الواحد الا عن قريب كتير ..~

هدول من ابسي كانوا يجيبوا مع كل شهر ..~

؛



ايش الاشي اللي بستخدمه مشان احافظ على اظافري من المناكير , هدول مجموعه مع بعض من الامازون 30$ , ما لكيت كل علبه لحالها ,لهيك انغصبت اشتريهم مع بعض , من نوع تنظيف الاظافر قبل ما اعمل اي شي , بتكون ريحته قويه , والنوع التاني اللي بكون الاساس قبل ما احط المناكير واللي بالاصل اشتريت المجموعه عشانه , وهو كتير بحمّي الاظفر من المناكير لانه بيعمل طبقه عازله , ولما تشيلي المناكير ما بخلّي ولا اشي يضّل عالاظفر خاصه حوالينه عنجد رهيب , واخر نوع اللي هو المثبّت والملمّع اللي مش دايما بستخدمه , كد ما دوّرت عليه بالمحلات هون ما لكيتهم لهيك انغصبت اشتريه بهيك مبلغ ..~


؛



اشتريته 10 $ ع ما اظن مش اغلى , وهو مُنعش ومرطب بنفس الوكت للوجه , واشتريته مشان استخدمه بالشغل لانو بالشغل من التعب وجهي بصير متل البندوره لهيك حكيت اجربّه ,ليش وجهي بصير بندوره لاني بعصّب ولانو في تدفئه وحاله , وحبيت اختار فش كحول فيه , عشان وجهي حساس , ومع هيك يالله شو طلّع حب ع وجهي من اول استعمال , وطلّع حب كتير اشي مش طبيعي , يعني بس بعد ساعتين من لما رشيته ع وجهي , وحكيت يمكن مش المشكل منه لهيك جربّته مرتين خلال يومين , وبالزبط كل مره استخدمه يطلع حب ع وجهي كتير كتير , لهيك وكفّته ع الوجه , بس مشان ما ارميه بستخدمه لاديا ولاجريا كتير كتير ..~

؛

لاني هاي الفتره من شهرين وصيّت ع كريم للعيون , وما لكيته كمان بالمحلات , وحتى بالامازون بياخد وكت ليوصل , ولحد الان مش واصل , ولاني صبيه شغلي شفتات ليل , فا انا من عائله الباندا صايره , والكريم اللي عندي مش نافع , لهيك انغصبت اشتري اقنعه للعيون , وراح احكي عن النوعين بشكل عام , ما شوفت اي اختلاف بين النوعين , يعني مش واحد احسن من واحد , الاتنين بالزبط بيعطوا نفس النتيجه , وهو عنجد بيقضوا ع التنفخ تحت العيون , بس بخصوص السواد ما بيقضوا عليه بس بخففوا منه , اما بخصوص التجاعيد تحت العيون من مره ما بساعد , كمان صرت عجوز من السهر , وبالعاده بستخدم واحد كل ليله شغل عليا , وبستخدمه قبل ما اطلع عالشغل مشان يعطي نتيجه تاني يوم وهو الافضل هيك بشوف , بحب افاجئ جسمي بالوقايه قبل ما يصيبني التنفخ تحت العيون ..~



14 $ من الامازون , وكال كان 50 $ !! بس عملوا تخفيظات عليه



17 $ من الامازون

؛





اما بخصوص هدا الكريم او القناع للوجه , الكل بشكر منه وانه رهيب وحاله , وهدا النوع بستخدمه بالعاده في الليالي اللي بنام فيها بالدار وفش عليا شغل بس , اول شي شو بكره فيه , ريحته , هدا ريحه البرتقال اللي عنجد بدوخ وبتقلب معدتي منها , وكمان عشانه قناع فهو قناع دهني ولما احطّه عطول بصير وجهي مزيّت ولونه اسمر , عنجد بشوف وجهي كأنه مدهون سمن , عنجد مش عاجبني كل هالكصص فيه , وما بشوف هالاختلاف لما اصحى تاني يوم , ما بشوف النضاره او البياض او الراحه ع وجهي , بشوف وجهي اسود مزعج ومش مريح , لازم اغسل وجهي عطول ومع هيك ما بشوف اي فرق من مره , عنجد بكره هدا الكريم ولولا سعره فا بستخدمه ..~ 35$ الامازون , اما عشان وجهي حساس , الاشي المنيح فيه انه ما بيطلع حب وبحس مرات انو بخففه بس مش متاكده ..~

؛

حاولت كد ما اكدر اكون صريحه مشان اد في صبايا بقرئوا واد حبّوا يجربوا , في عندي كمان مرطب بحكي عنه ما الايام الجايه اللي هو عنجد عاجبني بالوكت هاد ..~

السلام عليكم ..~

اليوم هو الاحد والساعه 9 واشي بالليل || 12\9\18 ..~

من الايام اللي لنفسي , خفيف لطيف , كله بين النوم والاكل والمشاهده والقراءه والبلستيشن, لا شوفت حد ولا حكيت مع حد , فكّرت اطلع مشان اشوف الكميرا اللي بدي اشتريها لنفسي , بعدين حكيت خليني ارتاح .. كنت اصحى وانام لحدود الساعه 11 الصبح , اصحى اشوف اد في مسجات , في كصص من اهلي وارد عليهم وارجع انام , ولما اصحيت افطرت واشربت كهوه وحكيت دكيكتين مع امي , بعدها هي راحت تنام وانا بلشت اقرأ واشوف في دراما , الحمد لله ع هيك ايام , ايام كسل وراحه ..~!

توم رايدر ختمتها اليوم 100% لانو انجنيت من شغله واحده من زمان بلف عليها ما لكيتها , عنجد ايأست منها لدرجه روحت عاليوتيوب وغشيت ~~ بعد ما بتختمها 100% بعطوك خيار لعبه جديده بس اسمها بلس وحطيتها ع الصعب كتير , ومكنتش متوقع انو لما اموت بدي ابلش من بدايه بعيده بعيده , حكيت يمكن في غلط , ومتت مره تانيه وطلع كل تعبي بالمشي بالمراحل بخليني ارجع , لهيك حردت وازعلت وطفيت البلستيشن ..~

من بكرا ببلش النكد .

؛



الله يخليكي في حالك خالتو .

؛



كديش صعب لما بدي اصحى بدري وبيجي وانا لسا مش نايمه !

؛



بستغرب من الناس اللي الرومنسيه اشي كبير عندهم , امبين ما جربّوا الشيك وفش دوام !

؛



يبي ما احلاها لما نعرف اختيار الواحد الصحيح !

؛



سامحوني لاني صعبه والمشي معي صعب ومزاجي صعب وكلامي صعب !

؛



يا رب تغفرلي لاني بحبك بقلبي مش بفعلي , يا رب تهديني .


||

يا ريتك مش رايح

السلام عليكم ...~

ايييش زمان والله , امبين مدونتي انضربت بالعين , اي عين على اساس فيها اشي محرز , امشو معي لتعرفوا كديش بلاوي صارت معي هالاسبوعين , عنجد آخر هالسنه علينا كلنا كان صعب , وكمان كنت اشتغل كل ليله من 10 الشهر , معدا امبارح الاربعا كان عطلتي خلال عشر ايام , عنجد انهديت , ومرات اجي ادخل المدونه وابلش اكتب واشوف انو معيش وكت عشان اكتب زي العالم والناس واحكي بديش احسب على حالي مشاركات واختصر كصص , مع انه اليوم اظن راح اختصر كصص كمان لانو عليا شغل ولاني ناسي , بس راح احكي عن الشغلات الكبيره ..~

اليوم هو الخميس والساعه 3 واشي العصر | 12\20\18

كنت اشتغل بالليل كل ليله , وبالنهار ملتهيه بالكصص .:~

بالنسبه للاسبوع الماضي .~

منها يومين نهارين كاملين راحوا وانا اطارد على ترخيص السياره في الدوائر الحكوميه , ومع تأمين السياره لانو هون ممنوع تسوك سياره مش مأمن عليها , لو لا سمح الله الشرطي وكّفني راح يسأل عنه , واد ما شافه معي راح يسحب السياره منّي . والتأمين راح ادفع عليه شهري الله ينعن شكلهم مصروف زياده .

يومين ونص بالمستشفى مع اختي الكبيره اماني , كنت اخلّص شغلي واطلع منه الصبح اميّل عليها في المستشفى اضّل معاها للمغرب , لانو ابنها الكبيره الفكّ تبع تمّه كان مشعور من مكانين وكان لازم يعمل عمليه , مع انو العلاقات بين زوجها وبيني مكطوعه , بس بهيك شغلات مكدرتش اتركها لحالها , وكنت اتخبّى لما اعرف انو زوجها جاي , اختي ايمان بنتها الصغيره كتير بتجننها بالمستشفى , لهيك مكناتش اضّل كتير , ويالله شو اختي اماني كانت على اعصابها , بس الحمد لله عمل العمليه ونجحت بس رابطين سنانه وبكدرش يأكل او يحرّك الفك , بس بشرب بالمصاصه , راح يضل هيك حوالي شهر .

اخوي واحد مرته ولدت بعمليه وانا بحكيش معاها وبكرها للسما , اول يوم ما روحت لاني اعرفت متأخره عشاني بالشغل , واماني ميّلت من المستشفى بعد ما طلّعت ابنها وراحت عليهم , وايمان راحت لحالها بدون ما تحكيلي , مع انه ايمان وين ما تروح بتحكيلي عشان اروح معاها , ودايما المشاوير عشان مصلحتها دايما , بس هاي المره ما حكتلي واتكالت معاها غير شكل , لاني اوصلت لمرحله ايمان دايما بتظهر كدام اخوي انها احسن واحده فينا معاه وانو كل العاطل اللي مرته بتعمله عادي عشان بدهاش تزعله وهي وراه بتحكي عليه , وهاي الكصه اكبر اثبات تظهره انو اه انا العاطله وما روحت سلّمت على مرته , عالاقل اه بحكي عليها وعليه بالعاطل كدامه , هون راح احكي الحقيقه , اه حكيت الحقيقه لحبي بس , اللي صار زي ما حكيت بالاول بعتوا المسجات خواتي واخوي واحد على الجروب تبع العايله ع المسنجر , وانا صبيه بحبش احط التبيهات , اد بدي اشوف شو بيحكوا بعبّر المسنجر وبعبّر المحادثه بس , فا عشان كنت مشغوله بالشغل ما عبرت , ومعروف اد في اشي مهم بتصلوا عليا , محدش اتصل , بعد بحوالي اربع ساعات عبرت المحادثه وانا اقرأ شوفت انو اه مرته ولدت , واهلي بيعرفوا اني بحكيش مع مرته لاخوي , بس عشان الاصول والاحترام , طول الاسبوع قبل ما تولد كانوا يضّلوا يحكولي لازم تروحي تسلمي عليها لما تولد وبلاه بلاه بلاه , وانا بديش اروح لحالي عشاني دايما عندهم عاطله ودايما بعمل مشاكل ,وعشان يكون في شهود على العاطل تبعي , لهيك اتصلت ع ايمان اشوف امتى بدها تروح ؟! اللي هي بتحكي " اانها عندهم " بعرفش ليش ازعلت انها ما اخدتني , وحكتلها " ليش ما اخدتني معاكي ؟" كال حكتلي كلمه واحده اللي هي " انسيت " ضليت ساكته ولما شافتني ما حكيت اشي , صارت تضحك وحكتلي " تعالي " حكتلها " بديش " وسكّرت البلفون بوجهها , ولما سكّرته ما بتتخيلوا الابتسامه الصفرا اللي على وجهي , اني ارتحت من المشوار واني بديش اروح اسلّم عليها وانو الحك مش عليا , الحك ع اختي ايمان ما اخدتني معاها , لانو معروف اماني بالمستشفى ومش مضمون تطلع ولا لأ , بس الحمد لله طلعت وراحت مع ابنها بنفس اللحظه , بس عملت حالي اني زعلانه , بس مع هيك انغصبت تاني يوم اروح عليها عالمستشفى , لاني ابوي اتصل عليا وحكى معي لازم اني اروح والولد بكون ابن اخوي وبلاه بلاه بلاه , ضليت ساكته وانغصبت اروح مع خواتي , بس كلمتين حكيت معاها هو " الحمد لله ع سلامتك " وما طولنا لاني وصيت خواتي انو ما انطوّل .

بالنسبه للاسبوع هاد .~

كمان يومين مع اختي ايمان بالمستشفى , كنت بالزبط اعمل متل ما كنت اعمل مع اختي اماني وهو اميّل من الشغل عليها الصبح , بس ايمان كنت اضّل معاها للعصر , انو بنتها الصغيره مرضت وصابتها حمى وخاف الدكتور على اعضائها الداخليه , لهيك ضلت يومين ونص بالمستشفى .

واختي اماني ضاعوا اولادها الصغار , وهاي الاخت بتحب اولادها لدرجه مش طبيعيه , يالله بديش اتزكر شو صار كصص وشو حالتها , وكيف انا مش عارف شو اعمل عشان اخفف عليها , يا رب تنزكر وما تنعاد وما حد يدوكها , بس الحمد لله طلعوا رايحين عند ايمان , وهاي اول مره بيطلعوا من المدرسه لحالهم وبروّحوا لحالهم ومشي , لانو معروف اماني بتاخدهم وبتجيبهم بالسياره , واماني كنت انا معاها في موعد دكتور , وهي اتصلت ع واحده من بناتها الكبار مشان تروح تجيب الاولاد , وبنتها اتأخرت عليهم , لهيك هم سحبوا حالهم وراحوا , وايمان اقسم بالله بتجلط , كديش كنا نتصل عليها , طول النص ساعه نتصل عليها وما ترد ع بلفونها , حتى بجوز ساعه الا اشي ,روحنا ع الدار ع المدرسه ونلف بالشوارع وحكينا للشرطه ووحاله , واخر اشي بنت ايمان الكبيره بتتصل من حالها على اماني وبتحكي انو الاولاد عندهم , وايمان لما عرفت حكت , "سامحوني كنت مروحه من المستشفى ولما شوفت اولادك فكرت معاكي خبر وكل هالكصص "

اتكالت مع واحده بالشغل , وغلطت عليّا وسمتنّي " اميره الظلام" حكتلها " بعرف وفخوره بهدا الاشي " ولما بلّشت بدها تغلط على اصلي اني فلسطينيه , طار عقلي اد بالاصل عندي عقل , وصارت تحكي " انتي من وين جايه , من وين جايه " ولما اسمعت هيك حكتلها " من الجحيم " يالله بعرفش ليش هيك حكيت , يمكن عشان حكتلي اميره الظلام عطول راح عقلي على الجحيم , وكانت كارمليتا وفرجينا موجودين حتى , والحيوانه لما سمعتني بحكي هيك , ابتسمت ولفت راسها وراحت وتركتني , وانا وجهي بدها يفكع , وانا لم اطلّعت ع كارمليتا وفرجينا شوفتهم بيضحوا , وصرت اضحك معاهم بعرفش ليش هيك , وكنت امفكّر اني انطرد , بس بعرف الرئيس تبع الشغل اد بوصله خبر حد بغلط على اصلي ما بسكت .

وساده كتير بضّل يعيّط عشان اطلعه برى , ولما اكون احكي مع امي بتشفق عليه وبتحكي طلعيه برى , بحكيلها مطر , بتحكي مهو راح يشرد من المطر , روحت رديت عليها وطلّعته , ولا اعتبر المطر , ضل يلعب برى وراح ع الجاج وما شافهم برى , خليته حوالي ساعه بعدين خوفت يمرض , ولما مسكته وكله مبلول وبنقط مي , حكيت عنجد انك مجنون زي صاحبتك .

هد المختصر المفيد عن مجريات العشر ايام اللي غيبتهم

؛


؛



؛




؛




كيف بنكدر نحطّم الناس الحيوانه بدون ما نصير زيّهم ؟

السلام عليكم ..~

كل يوم بكون استنى امتى يجي يوم هادي واسبوع هادي عليا بحياتي , راحت كل هالسنه وانا بستنى , عنجد كتير تعبانه , ما بين الشغل وكصص الدنيا , حتى صرت هاليومين اهرب ع البلستيشن واعيد في توم رايدر , كل اسبوع في كصص , كتير بصير حكي بيني وبين خواتي واهلي , وكتير صرت اشوف التطليعات عليا اني الغلطانه ,كله عشاني بسامحش , وكله عشان بديش اعمل منيح مع حد غلط عليا , الكل بحكي لازم اسامح , طيب انا مين بده يسامحني؟ , ليش لما احاول ادافع عنهم بطلع انا الغلطانه والعاطله ؟ ليش الكل بظلمني وبغلط عليا وبقل من قيمتي ولما ادافع عن حالي باني بديش تعامل تاني معاه بطلع الحك عليا ؟ ليش محدش بحكي الحك عليه ؟ ليش عشان المستقبل والخوف من ربنا , طيب هم بخافوش من ربنا وحياتهم يا محلاها , ليش بشوفني شو بلبس وبصرف مصاري وبيجوا يحكوا انو محدش بيكدر عليا لهيك الكل ببعد عني ؟ ليش لما اشوف بنات عرب بالشارع والاسواق وبدي اروح اتعرف عليهم بطلعوا عليا وبكرهوني وانا مش عامله اشي , كله عشان بشعري ؟ ولا عشاني بلبس ؟ ولا عشاني بضحك ؟ بعرفوش اشي اسمه اقنعه ؟ بعرفوش انو الواحد بكون هو لما يكون لحاله , الكل بلومني على حياتي , كانه النصيب في ايدي ولا بشطارتي , بعرف اني لسا احسن من كتير غيري , والله اني بحمد الله , بضحكوني لما يجيوا يحكي لسا عندك صحه ؟ اي صحه ؟ هو الواحد لازم يكون لا سمح الله ع كرسي عشان تكون صحته بالارض ؟ ولا لازم افضح حالي والدنيا عن الليالي اللي بنامش فيها من الوجع , لا الاكل بتهنى عليه الواحد ولا النوم , والاهل بعاد , والشغل صعب , وفش اصحاب ولحاله وبيجوا بيحكوا عايشه , يا عمي راضيه والله راضيه , بس هم اللي مش راضين بالنصيب , يمكن مليش نصيب , يمكن نصيبي امي وابوي لانو محدش مطلّع عليهم . عنجد بهيك اوكات بشتاك لفد ..~

؛