مأساة روح {هالكه} في اوراق تائهه ~

السلام عليكم ..~

الجمعه العصر || 4\17\20 ..~

||

الاربعا اصحيت بدري من الوجع , بتوصل مراحل معي الوجع انو بخليني اصحى وبعرف حالي انو لازم اخد دوا لانو في اوكات بكدرش اتحمل , صاحيه عرقانه ومتوجعه والدنيا بتلف فيا , بعرف حالي صرت انام ع نكد واصحى ع نكد وحكي من الكل وعشان صرت ما احكي اشي اضل ساكته , صار يخليني احكي مع حالي اكتر لهيك اعصابي بتتوتر وبصيبني وجع راس مع وجع معده وهزلان , لهيك بس كنت بدي دوا وكهوه هاد اللي براسي , واتزكرت انو اختي الوسطى حكتلي انو بدها تطلع تتوحج الاربعا وبدها تاخدني معاها , قبل ما اكون من التخت سالتها اد بدها تطلع وهي كالعاده من النوع اللي بتردش وكت ما يكون في مصلحه , لهيك كومت من التخت اكلت خبز مشان ما اخد الدوا ع معده فاضيه وعملت كهوه وكنت كتير اشرب مي سخنه , بشوف المي السخنه مع العسل بتهدّي اعصابي بجسمي , وكنت اشرب بالكهوه وانا بفكر بالمشكل اللي صار امبارح لهيك اختي بتحكيش , اللي هينا اليوم الجمعه ولسا اختي الوسطى بتحكيش معي , مع اني ما عملتش اشي انا ولا حكيت لأ , بس امي هي اللي حكت لأ هاي المره , والكصه هي مشان كالعاده اختي بعتتلي شب وحكيت اه عشان ما اعمل مشاكل وعشان مش بإيدي احكي لأ , عشان بس انستر مع اختي , بس امي من مره ما عجبها الوضع وحكت لأ لهيك اختي حاربتنا , ما اصغر عقلها , بس بتعرفوا شو اريحلي والله ما تحكي معي لانو كل ما تحكي معي بتحكي حكي بسم البدن ولاني بمرحله بحياتي بدي يضل تمي ساكت وهاد اشي بمرضني من جوى , بس مش مشكل , بتعرفوا شو نفسي عنجد وبعرف انو يوم جمعه ومش لازم احكي , بس هيك لو انصاب بجلطه واموت واتراح لانو لما اروح عند ربنا راح يكون ارحم , ما بتتخيلوا الحكي اللي بسمعه منها ومن اختي التانيه ومن حبي ومن امي , كيف لو اني بشتغلش من عمر 19 سنه وبصرف عحالي وما بعمري طلبت مساعدتهم باشي , حتى مصاري دراستي رجعتهم لاهلي ولا احس بمره بحياتي انو حد عملي اشي , بتعرفوا شو كمان , شو نفسي يكون عندي دار الي عشان ما اوصل للمرحله اللي الكل يرميني , بس ما علينا , الله بعاود يهونها علينا كلنا عن كريب يا رب . او يمكن لأ ..~

ضليت متمدده ع الكنبه بالصاله لانو التدفئه فيها وبحب الدفى وانا مريضه لانو كل هالكصص بشوفها بتهدي اعصابي , وبنفس الوكت شوفت انو الدوا ما فاد , كنت عنجد متوجعه , عالظهر اتصلت عليا بنت اختي وحكتلي بدها تطلع من الشغل بدري وتجيب امها وتيجي عندي , بس بدها انا اللي احكي لامها , امها اللي هي اختي الكبيره , لما اتصلت عليها حكت بتعرفش وبتعرفش يعني لأ , بنت اختي زعلت , شهيره بضل تحكيلي " خالتي الكل بحكيلي لأ , شو ما اطلب منهم " لهيك لما هي تطلب مني اشي عطول بحكيلها اه حتى لو داخليا بديش , بس بحكي منيح جبر الخاطر , وكمان بعرف اختي الكبيره كديش حنونه عليا ع كد ما بترمي حكي وقاسيه , بس بعرف ولا مره طلبت منها طبخه نفسي فيها الا عملتلي اياها , لهيك لما طلعت شهيره من الشغل اتصلت عليا وحكتلي انو امها بدهاش تيجي , وانو اد انا بطلع معاها نشتري غدا وتيجي عندي ع الدار , مع اني كنت عنجد تعبانه ومريضه حكتلها اه تعي خديني , بعد الظهر بشوي اجت وانا اطلعت زي ما انا وهي لما شافتني حكتلي شو مريضه زي دايما , روحنا اشرينا غدا وارجعنا ع الدار وكعدنا نص ساعه واحنا نلف ع مكان تصف سيارتها , والحمد لله لكت وانزلنا اتغدينا واشربنا كهوه , وضليت انا متمدده وهي ع البلفون وحكتلي كديش الدار فيها هدوء , حكتلها شايفه لهيك بحب الدار , ضلت عندي لقبل المغرب بشوي .

بعدها انا مكانش في حيل اعمل اي اشي من مره , لما اجى اخوي انتقلت من الصاله لغرفتي مشان اتمدد ومشان اكمل مشاهده اللي كنت اشوف فيه ,وبعدين اجاني تلفون طويل مع امي , واجاني سهر الليل , ضليت للوحده ولما اجيت بدي اغفى , اجى بس يمكن شوفته قبل هالمره , بس اجى وضل ينادي ع ساده وبده يدخل ع البيت عند ساده , الدنيا نص ليل , وكد ما اطرد فيه مش راضي , ضل نص ساعه , بعدين انكلع بعد ما زاد من وجع راسي , وبعد ما جننلي ساده , ضليت بالتخت احاول انام وصارت الساعه تلات , معرفتش , شوفتلي كم فيديو بضحكوا غيروا نفسيتي ونمت بعدها .

||

اصحيت الخميس ولسا متوجعه ومريضه , لكيت مسج من مديرتي بالشغل انو عليا امتحانات وتدريبات لازم اعملها ضروري ع بلفون الشغل , ومكانش نفسي اعملها , كومت وعملت الزوتين من خبز ومي سخنه مع عسل وكهوه وعليّت التدفئه ورميت حالي ع الكنبه , حكيت مع امي شوي , شافتني مش بمزاج احكي , وبلشت اعمل بالتدريبات وكل تدريب بدها 45 دقيقه ومعي بده ساعه واشي , كنت اعمل فيهم واشوف ع التلفزيون افلام طاكعه , خلصتهم بس لسا بدهم تأكيد لهيك بكرا ان شاء الله بعاود اتأكد ويا رب انو زابطين لانو مرات بزبطش يعني ما بنحفظ وعليك تعيدهم من اول وجديد بعرفش ليهك بصير معانا , وبالبريك بشغل شهيره بتتصل عليا , بتكون زهكانه من كلشي بجياتها , وبعد ما خلصت معاها اتصل عليا اخوي وحكى انو اتحوج اغراض للدار , وكان بالطريك , اجى وشافني لسا مريضه , وبحكيلي بصحى عليكي بالليل بالحمام بتسفترغي , بحكيله صابني برد من الاكل . بالعاده معدتي من التوتر بتتحملش اكل , لهيك بحب اعمل توست خبز , وبشرب جنجر بشوفه بشد معدتي او ميراميه او باكل بطاطا مشويه او مسلوقه , يعني بحاول ادير بالي شو بحطه فيها , مرات بشوف انو الكهوه بتزيد الدوخه والوجع بس مستحيل اتركها , بستمتع فيها وبعرف انا بشرب كتير , تلات الى اربع كاسات كهوه امركانيه سودا باليوم ومرات بشرب معاهم كاسه عربيه , الكهوه هي الاشي الوحيد اللي بخليني اتحمل حكي ووجع راس وكتير شغلات حواليا . بتزكر الشب الاسبنيولي لما كنت اشتغل بالكهوه , بشربش كهوه من مره , ومره حكى بده يجرب , حكتله راح اعملك اللي انا بشربها , واللي هي كهوه سودا ومعها شوت اسبريسو او دبل وعلى الوجه مكعبين تلج مشان تبرد شوي وتكدر تشربها , رجعلي بعد نص ساعه وحكى ايش هاي , غيرت مزاجي , انا بشوف دايما الناس بشربو الكهوه كلها حليب وكارميل عليها , حكتله اه هدولا الناس بس احنا بدنا كهوه تخلينا نتحمل الناس والشغل , مش خلتك تتحمل ؟! كان يضحكني ينعن شكله ..~
وضليت لل 3 الصبح من ارق الليل والتفكير وهالكصص ..~


||


اليوم الجمعه الحمد لله احسن صحتي , اللي بكهر انو بصحى بدري بين 7 و 8 الصبح وبعرفش ارجع انام ولاني مريضه يومين مكنتش ارتب البيت ولا اغسل , لهيك اليوم التهيت بالبيت

||

السلام عليكم ..~

ليله الاثنين 4\20\20 ..~


||

مفش اشي جديد , اجى عندي اليوم اختي هوبز الكبيره مع اولادها , وكمان اخوي واحد , وانبسطت انه اجى بدون مرته عشان ناخد راحتنا ..~

لسا اختي فيث بتحكيش معي وكديش بيني وبينكم مرتاحه , وحبي كمان بحكيش معي , بالاصل تركني , مكنتش بحياتي كلها اتخيل يجي يوم ويحكيلي كل واحد بطريك , يالله ينعن شكله حكى حكي قاسي كتير , حسيت بانو كل قسوتي عليه طول هالسنين رجعت عليا, بس وين يا روح امك , بتحلم! هو اسمعو معاه حك عشان انا بديش انزل لهيك خلص زهكني , بس بعرفش ليش من جواي بحكي هاد بس لانه باخر ايامه بدوش اياني احزن عليه , بده اني اكرهه وانو اكمل حياتي , بس كيف وهو حكالي بانو تحكيش معي الا اد بك تموتي وحتى لو متي بوصلني خبرك والله لا يرحمك , اااه ينعن ^$#% , ومع هيك مع هيك بحكيها بكل صراحه , هو الشخص اللي عنجد بكدرش اكرهه , صح زودها حكي كتير اشي هزني وخلاني اقشعر واستفرغ , بس بكدرش انسى كل المنيح تبعه معي بكدرش , بكدرش اشيله من جواي بكدرش , وكنت مستغربه من رده فعلي باني ما عصبت وما اغلطت عليه واني اجاوب بمحبه , اخ كديش اسمعت حكي صعب منه , بحياتي ما شوفته هيك معي , كم صارلنا ؟ بنعرف بعض من واحنا صغار , وانا بعمر 13 هو اعترفلي وكديش كنت مبسوطه انو كاين شايفني مش بس انا لحالي , ومن وكتها لهلكيت لعمر 29 محبيتش غيره ينعن شكله , ومن وكتها لهان تصير محاربات وكصص ونمشي بالدنيا , بس بحياتنا كلها ما حكينا لبعض "بكرهك " لانو عنجد كنا بس نزعل من المواقف ونحكي لبعض "مش طايكك " ومع هيك نراضي بعض بسرعه , الا اخر مره حكيت فيها معاه , حكالي " هالمره مش مش طايكك , هالمره بكرهككك " بس مع هيك نهايتها من ناحيتي كانت " مش تاركك " وبالزبط كل كم يوم ببعت مسج لو حتى نقطه وبس عليه يشوفها وما يرد , خايف يعمل بلوك ! سامحوني كتبت حكي ومسحته , يمكن مع الزمن اعاود اكتبه ,,~

||

اصحيت بدري اليوم لانو جارتنا حسن صبي جايبه حد ينظفلها الحوش ويكص الحشيش وصوت ماكينه الحشيش عالي , اشربت مي سخنه مع عسل وكنت بفكر بالبلستيشن , حكيت مع امي شوي , افطرت اشي خفيف , واعصابي كانوا مهترين , حكيت اخد شاور سخن قبل كلشي اريّح اعصابي , وكانت الدار مرتبه لاني نمت وكنت مرتب كلشي , بعدين عملت كهوه وحكيت مع امي كمان مره , وبلشت بدي العب بلستيشن , الا اخوي واحد بتصل وبحكي انو بالطريك عليا , قبل الظهر كان عندي , وبعد بشوي اجت اختي هوبز وضلوا للعصر , بعدها اجيت العب وتركت الدار مش مرتبه , لبكرا برتب , الا جاني تلفون طويل مع امي اتكاتلنا واتصالحنا وحتى حكيت سر من اسراري الها وخففت عليا ..~

||

هلكيت ختمت لعبه إيركا كان سعرها 5$ لهيك اشتريتها واخدت البلاتينيوم , لعبه هي فلم رعب ساعه ونص , وابطال طبيعين وانت عليك تختار بين كل خيارين , وهو بحكي عن مستشفى مجانين وبنت الدكتور السابق اللي بدها تكتشف موت ابوها والسر اللي تحت مستشفى المجانين , مش رهيبه ولا بشعه , وبسرعه بتاخد البلاتينيوم , يعني نحكي نص يوم او يوم لتختمها , لانو يا بتقتل الكل وهاد كان شو انا , يا بتخلي الكل عايش , ومع التكرر تغير الاختيارات بتاخد كؤوس وانت مش داري عن حالك , البطله حلوه ينعن شكلها ! بنصحش فيها للعبه لانو يعني معروف شو هي وفش اشي جديد , يعني فلم رعب ممل ! بس اللي بده يضيع وكت ويضل يعيد بفلم رعب ليش لأ

||

هلكيت العبت كمان لعبه تانيه وختمتها كمان بس المشكله انو بتصدكوا بس اخدت اربع كؤوس !! بس اربعه !! شو هالخيارات التانيه اللي لازم اعملها مشان اخد كمان ؟! بس ايش هاللعبه عن حالي حبيتها بصراحه كتير , كنت انكز فيها , لانو ما اتوكعش يطلع اشي , وكان الرسوم جدا رهيبه والموسيقى والاسرار , اللي في سر من بدايه اللعبه واضح شو هو ,وبدها سرعه خاصه لما تختار الطرق المختصره , اشكال الابطال وشخصياتهم روعه , بس تافهين ! في شخصيات عنجد يكون نفسي اقتلهم بايدي من كتر ما هم زنخاااات , كمان لعبه خيارات رهيبه , حبيتها وبدي ابلش اعيدها من اول وجديد لانو عنجد كنت اضحك لما انكز من اللعبه , ويالله شو كنت احكي مع حالي بصوت عالي فيها , حمستني هاللعبه , كان اخوي تلات يسالني " بتلعبي مع حد " حكتله " لأ حالي " شوفته ما صدك لانو عنجد صوتي مع حالي اشي بضّحك . اسمها أنتيل داون , رعب خيارات بكصه روعه , البطل فيها تبع مستر روبوت المسلسل , في شخصيه استنى اللحظه اللي بدي اقتلها , ولما اجتني الفرصه وفكرتها ماتت طلعت لأ , انجنيت لما شوفتها عايشه وبعدين بالمراحل لما يجيها الخطر لا ارادي امشي باللعبه وانسى واضل عايشه , الحظ كان معاها, وبعدين وصلت مرحله انو عينك عينك اقتلها ؟ ما فكرت من مره عطول طخ بنص عينها ! بس انهيتها ونص الشخصيات عايشه ونص ميت , في شخصيات ماتت لانو كنت بطيء , اختار الطرق الطويله واوصل متأخر , لانو بعرف حالي بالعاب تانيه لما اخد الطرق المختصره اموت قبل ما اوصل لهيك ما كنت اغامر , وفي هاي اللعبه لما ما اغامر كمان حد يموت , كنت انانيه بحت باللعبه , بانو المهم عندي الشخصيه اللي بلعب فيها اد حبيتها المهم هي اللي تعيش , في شخصيه عنجد مكانش نفسي تموت , بس كنت بطيئه باستخدام الطخ وكتير ازعلت لما مات ’ بس كان عندي شخصه مفضله وخليتها عايشه وانبسطت , وحبيت المراحل اللي بمستشفى واللي بالمنجم . اه العبوها صح فيها كتير حكي وانا بكره الحكي والمحادثات الطويله بين الشخصيات وفش مجال تعمل تسريع يعني عينك عينك بده تحضر .

||

اما بالنسبه للافلام والمسلسلات ف اه بشوف , شوفت مسلسل ياباني ماخوذ من مانغا , وكتير عجبني بصراحه بس بعرفش اد راح اقرأ المانغا , بس لاني بحب ابطال المسلسل شوفته وما اندمتش من مره , كان البطل كل ما ينطرد من عند حبيبته ويمشي بالشارع وهو يعيط , مكدرش اوكف ضحك عليه .. جد كديش اضحكت ! نهايته يعني اظن هيك احسن حل ! بس كان نفسي اكتر ينرفض منها وينطرد , لو كتروا الحلقات لاني ما اظنش راح ازهك اشوفه كل حلقه بعيّط فيها .

شوفت كم فلم , وارجعت اشوف في انمي جوجو بس يا عمي مش عاجبني هاد الموسم بصراجه , شوفت كم حلقه من انمي ماغي كمان ما عجبني , لهيك ارجعت لاخر موسم من كونان لاني اوصلت عنده وما عجبوني الجلقات كمان , بعرفش شو بدي بصراحه ..~

||

بالنسبه للكتب لسا في كتاب الفقراء .. مش كل يوم بقرأ فيه من وكت ما ارجعت للبلسيتشن ادمنتها , واحلى ادمان ...~

||

نرجع لصحتي , احسن بس عيوني بضلوا حمر , يمكن من الاستفراغ , ولسا وجع الراس بس اخف الحمد لله ,, هلكيت صحيح , رمضان كريم .. الله يهونها علينا وكل هالكصص بتنتهي برمضان لانو الاجر فيه ما بينعاد بس كلشي تاني اه , الاشي الصعب اللي عنجد جد كهرني هو , راح يفتحوا محلات تانيه من شغلي , لاااااااااا , يعني الاثنين الجاي راح يفتحو المحل اللي جنب محلنا الاصلي , وراح نرجع نشتغل ,’ لااااا , لهيك بستدعي ربنا , هو بدي حاله هالمرض تروح , لانو عنجد الواحد ع اعصابه والله يحمي الجميع , بس اد بدهم يفتحو ما يطلبوني اشتغل , لو بس بعد رمضان لانو والله بحب اكعد رمضان بالبيت , وحتى عند اهلي الضفه الحاره فيها عالم مصابين بالمرض لهيك الله يحمي اهلي يا رب يا رب ..~

||

يبي شو حاكي يبي , هاد اضرار لما ما تشرب كهوه .. بشوفكم () رمضان كريم وعيد مبارك اد ما ارجعتش وانتو كمان ما ترجعو برمضان .. عندي هدف بالعاده برمضان بختم القران مره واحده الحمد لله .. بستدعي ربنا انو اختمه مرتين هالسنه , يا رب انا وانتو كمان , انتبهو عحالكم وع اهلكم , ما بحبكم بس بتمنالكم كل الخير من صمصومه قلبي , اشوفكم وبرجعلكم ع خير وسلامه وصحه وهداه بال ومصاري اكتر يا رب ..~

الى لقاء مؤقت للتواصل : [email protected]

السلام عليكم ...~

اييييييش اشتكتولي ؟! انا عنجد اشتكت اجي احكي كلشي بالمدونة , اليوم الاول من عيد الفطر وعندي الساعه حوالي المغرب , هاد عيد الفطر الاول اللي امي بتكونش عندي واللي بصوم رمضان من غير شر بدون ما تكون عندي ومع هيك ربنا هونها عليا الحمد لله دايما وابدا ..~

وهاي السنه الاولى بحياتي اللي بختم القرأن 3 مرات كديش كنت مبسوطه من حالي , اول اسبوع من رمضان اشتغلت فيه , واكلت روح الخل وانا اشتغل , طول النهار من 9 الصبح لل 7 في الشغل , بمكان بكرهه مع ناس بكرهم , ومكانش عندي اي صبر وانا صايمه ع اي حد , ودايما وجع الراس مرافقني ..~

نص الاسبوع التاني اشتغلنا فيه وبعدها انا وبنت اختي ازهكنا , وهي قررت انو ما نروح ع الشغل ونتحجج بكصه كورنا وزبطت معانا , لهيك بكل صراحه كانت حياتي بين القران وبين البلستيشن , ويومين بالاسبوع اطبخ , وباكي الايام خواتي وخاصه اختي الكبيره الله يعطيها الصحه تطبخلي وتبعتلي مع بنتها شهيره , لهيك كنت مرتاحه من الطبيخ , لهيك الحمد لله الحمد لله اني كنت اشبع نوم ومرتاحه والعب بلستيشن , حبيت هالشهر واحزنت عليه انو راح ..~

من بكرا راجعه عالشغل ( عم ابكي من جواي) بس فش مصاري يا صحابي , فلّست لانو اللي كنت حاططهم ع جنب دفعت مصاريف للدار , وغير انو المديره عم تستنى وعارفه امتى رمضان بخلص لهيك بتستنى فينا نرجع عالشغل ..~

خواتي ولا يوم اجو عندي لانو الكبيره اغلب رمضان مريضه من الشقيقه ومن انو الاولاد بالدار ازعاج وكصص والوسطى بحججها الفاضيه اللي عنجد ازهكت ومليت منها ومن جواي مش كتير بدي اشوفها , ازهكت كلامها وتصرفاتها لهيك مكنتش سائل , حتى اليوم العيد ما اجو كمان الا اخوي واحد وداخليا مكنتش نفسي يجي لاني بكره مرته , بس لانو اخوي تلات حكى لازم نصل رحم والدنيا عيد وشو بدنا في مرته ..~

الحلو كمان انو واخيرا واخيرا حبي رضي يصالحني , ومع هيك ينعن شكله لسا لئيم عليا , ومع هيك من جواي بستاهل لانو عنجد انا مزاجيه وما ببادر بالسؤال وبدي كلشي ع مهو معاه , مع اني والله مرات بببادر وبسال عنه وبحكي معه بس بغيب كتيير ..~

ابن الجيران كريس كعدت فتره اجيب روميو عندي وصرنا اصحاب وفجاه هو اجى ع البيت واتلاكينا وحكتله روميو عندي ولما اجى ياخد روميو ما رضي يروح معاه , وزي كانه موقف محرج صار لهيك بعدها صار كريس يلقط بابه وبطلت اشوف روميو ع الشباك يعني ما تيجي تعبري غرفتي وتاخدي روميو , من جواي ازعلت لاني عنجد حبيت روميو , بس هيك الدنيا انو لما تعملي منيح بيطلع ع راسك وهو انا بدي اونّس روميو ..~

هاد كلشي صار معي بالشهر اللي غيبت فيه عنكم ,, مع الوكت بحكيلكم عن الالعاب اللي العبتها ع البلستيشن .. راجعه لمجريات ايامي .. وكل سنه وانتو سالمين .. مع انو العيد هان بس عيد الصايم مفش اي بهجه لاي اشي ..~


||

السلام عليكم ..~

من نص ليل يوم الاثنين .. عوده للعمل !!

5\25\20 ..~

||

امبارح ما نمت منيح , لهيك اصحيت اليوم بديش اصحى , كديش اتغلبت اليوم لاصحى , وبلشت احكي مع حالي امتى بدي اصير غنيه ومش بحاجه المصاري لاشتغل , بلشت الكأبه من الصبح , ساعه كامله وانا صاحيه ومش صاحيه , وبتزكر كلام امي عشان اساعد حالي فيه لاصحى ولاداوم عالشغل , بعدها كعدت نص ساعه اجهز بحالي مع اني جهزت كلشي بالليل قبل ما انام , ومع هيك كنت بطيئ بلاوي اليوم الصبح , بعد ما انبسطت ع كاسه الكهوه وبلش مفعولها , انتبهت انو متاخره عالشغل , وانو لسا شهيره مش جايه تاخدني , حكيت امبين نستني وراحت عالشغل بدوني , اتصلت عليها عطول , وحكت راحت عليها نومه وهيها لسا بدها تجهز حالها , بعد هالاسبوعين وشوي اللي غيبنا عنهم عالشغل , بدنا نرجع عليهم متاخرين , اليوم مش يومنا , ملخومين ومتاخرين وبدناش نشتغل وحاله , لما اجت وشوفت كيف شكلها اضحكت كتير عحالها واشكالنا , وطارت بالسياره والله ستر ومع هيك اوصلنا متأخرين .

عبرنا الشغل وملان وجوه بنعرفهاش جاي تشتغل , بس الحلو شوفنا جولان واخيرا رجع , كعدنا نحكي شوي وكال طارق الكسول كاين يشتغل برمضان , مستحيل كزاب هاد , بالاصل الاسبوع الاول من رمضان ما اجى عالشغل لما كنا احنا نشتغل , وشوي خلّو جولان يروح ع البيت , لهيك ما خلصنا حكينا معاه , ضلينا نشتغل طول النهار , وعن حالي صابني صداع بخوف اليوم , صارلي زمان مش متعامل مع ناس ومش موجعه راسي , وغير انو اليوم كتير شوب كتير , وكلنا داخليا بدنا نرجع ع المحلات الرئيشه تبعتني , محدش بده يشتغل بهاد المحل , كتير احراج بين ناس بتشتغل معاهم وبتعرفش اسمائهم , ومع هيك اليوم ربنا هونها علينا .

كتير كنت احكي مع حبي ومع خواتي وانا بالشغل لانو واتزاعلوا خواتي مع بعض , معروف الوسطى طاكعه , بتفهمش وبتعرفش كيف تتصرف , المهم عندها انانيتها ومصلحتها واهل زوجها , ومع هيك حكيت للكبيره انو هيك هي الوسطى والكل عنده ظروف ومن جواي بعترفش بهاد الحكي , كتير اشربت كهوه اليوم بالشغل وبالبيت , عشان افطار بس بحلم بالكهوه مشان تخفف وجع الراس , وحتى في البريك تبعنا مشينا 45 دكيكه انا وشهيره , ومن الشوب صابني تان اشي مش طبيعي كديش بكره التان من الشمس , اتعرفت ع صبيه بالشغل كتير عجبتني لطيفه وحلوه , ما عجبني الشغل والزباين الحمير اللي بنحكيله حمار بيحكي بيحلبوه , دايما انا وشهيره الزباين هم اعطل زباين معانا , لا بفهمو بالحكي ولا بالمنيح , وبيعملوا وجع راس اشي مش طبيعي .

خلصنا الشغل غ خير واوصلت البيت عخير , اشتكت لساده , اكلت وخلصت كم شغله بالبيت وشوفت كم حلقه من دراما يابانيه اسمها " معا في السراء والضراء " كان نفسي تكون احلى بس مع هيك لانها بطيئه وبسيطه والحلقه نص ساعه وبتعملش وجع راس , حلو تنشاف بعد يوم متعب من الشغل , بس عملت من روتيني الكريمات بدون قناع , واجيت ع المدونه وبدي احاول انام لانو بكرا عليا دوام.


اليوم الصحه الجسديه الحمد لله منيحه وجع الراس مش هالاشي , والنفسيه كمان منيحه الحمد لله حتى لو بديش اشتغل واتعبت مع الزباين اليوم , بس في كم شغله براسي بفكر فيها بتخليني اتناسى , ما عملت اشي كبير وما صار اشي مهم , ارجعت للسناب ..~

||



عم تحكي انها " مش ذكيه وما عندها احلام واهداف وبديش اشي بالدنيا " وانا متلها بالزبط .

وهو عم يحكي " مش راح اكدر اساعدك باشي انا هربت منه " وانا متلك بكدرش اساعد بشغلات انا بالاصل هربانه منا .

السلام عليكم ..~

العصر من يوم الاربعاء .. اللي هو يوم عطلتي .. 5\27\10 ..~

||

امبارح التلاتاء كان يوم نكد كتير , ما نمتش بالليل منيح , اصحيت ع 4 الصبح وما اعرفتش ارجع انام , اغفيت حوالي ع 6 الصبح لاني لمحت الساعه قبل ما اغفى واصحيت ع منبه الساعه 7 , كنت نعسانه وتعبانه ومعدتي بتوجع , جهزت حالي وافطرت واشربت كهوه وشوفت الحلقه التامنه من مسلسل بالسراء والضراء وانسيت حالي وانتبهت ع الساعه الا احنا متاخرين وشهيره لسا مش جاييه , اتصلت عليها وطلعت نايمه ورايحه عليها نومه , حكتلها وبعدين يا بنت ؟! عشر دكايك الا هي كانت عندي وكان شكلها بضّحك , وبعدها اتسلهنا ع الشغل .

اوصلنا متاخرين ومع هيك مكانش كتير ناس جوى , حكيت بعقلي شو كمان هم متاخرين ؟ طلع بس حوالي خمس راح نشتغل اليوم , بدون المدراء , اتنكدت داخليا لانو كلشي علينا راح يصير , وبالزبط طوال يوم الشغل زباين مش مناح , وراسي ومعدتي كانوا يوجعوا , وكان السستم تبع التابلت وكلشي بالمحل مش زابط , يعني كل ما نحط معلومات بنمحو ولازم نبلش من اول وجديد وزي كانه بنعمله قصد او انو بنعرفش نشتغل , بعدها اخدنا اول بريك , روحنا نتمشى فيه , بكون ربع ساعه , ارجعنا ع زباين كمان مش مناح , واخدنا تاني بريك اللي هو الغدا وبكون ساعه كامله , روحنا اتغدينا واشربنا كهوه , وروحنا ع البنك عم احاول احسبها بخصوص الاجار , وراجعنا ع الشغل مع زبايين كمان مش مناح , بخصوص الزبايين من جواي بكونش متنكده منهم , بالعكس بحاول دايما الفها انو الحك مش علينا وانو الحك عليكم انتم لانو هاد الصحيح , وانو كمان احنا بنشتغل بالشركه ما النا دخل شو قوانينهم وشو انظمتهم , بس صار اشي نكد عليا امبارح , راح نرجع نسكّر ع 8 وبنت اختي بدهاش تسكّر بدها تفتح وانا بدخل بكصه بكدرش اروح واجي عشان سيارتي وانو امي بتزعل وكصص كتير دخلت بعقلي , الاشي لما يكون صعب عليك , بكون صعب , بس من جواك بتتفاهم مع عقلك وبتوصل لمكان انو تتعود انو هاد نصيبك بالدنيا وانو فش اشي بزبط وانو الحياه صعبه لازم امشي بالصخر , وببتوصل للمكان وبتتأقلم , بس اللي بصعّب الاشي عليك هو الناس اللي حواليك , الناس اللي حواليك زي متلا امي , بتشوف كديش هاد اشي صعب عليا وكديش راح اتغلب اد راح اروج واجي بسيارتي , وبحسسني انو انا سبب المشكله هاي وانو بكدر الاكي حل باني ما اروح بسيارتي واغلّب غيري ياخدني ويجيبني , وبديش هاد الاشي , انا صبيه بديش حد يعملي اشي , بديش اربط وكت حد مع وكتي , وراضيه بهاد الاشي , فهون بصير الصعوبه والنكد , لهيك لما شوفت انو راح اغلّب بنت اختي لان كل واحد وكته لحاله , وانو ممكن اغلّب اخوي معي , حكيت يمكن خلص اترك الشغل , لما سالتها حكتلي اه يخالتي انا مش شايفتك مبسوطه بالشغل ولا مستمتعه ودايما متوتره , لهيك عالاغلب بيني وبينكم يمكن اترك الشغل , خلصنا شغلنا واجيت ع البيت ..~

مكانش نفسي اعمل اي اشي , اتمددت عالتخت وشوفت حلقه واحد من مسلسل المملكه كوري , وضليت متمدده عالتخت وباب الحوش مفتوح عليا وصافن بالحوش وبالورد والسما لليل , اجى اخوي , وكان جايب الجاج المفضل عندي هو جاج ببباي , انفتحت نفسي عليه , اكلت وعملت بس عنايه لوجهي , اجيت ع المدونه اني ابلش احكي عن يومي , بس كنت في عين ونص من التعب والنعس والنكد , لهيك نمت ..~


||

اصحيت حوالي ع 8 اليوم , وكنت لسا متنكده كتير , خواتي حكو بدهم يجيو عندي اليوم , افطرت واشربت كهوه ورتبت البيت لاني امبارح ما عملت اشي بالبيت حتى الجلي ما جليته , بعدها كان عليا اخر حلقتين من مسلسل لبناني كنت اشوفه برمضان اسمه بالقلب , بحب ساره لهيك شوفته وحاطط ببالي اشوف مسلسلها التاني , وصارت الساعه حوالي 11 الا خواتي جاييات عندي , وملان حكي حكيناه , ومن شوي اتسهلو وهيني , اشتريت اشي للعصافير اللي بيجو ع الحوش عندي , وكعدت ساعه وانا ازبط فيه , بس ارجع ع الحوش بصوّره لانو بديش ازعل ساده كمان مره , ساده بزعل لما بشوفني بالحوش لانو بده هو كمان يطلع وبكدرش عشان جاج الجيران .

حكيت مع حبي بس مش عاجبني لا امبارح ولا اليوم , عم يختصرني !
امي رجعت مع كصص الجيزه , وداخليا بديش اوجع راسي واتنكد فوك ما انا متنكده ..~
راح يرجعوا يفتحو شويت محلات بالبلد عنا بس مش محل الشغل تبعنا الله ياخدهم .

؛

صور يوم التلاتاء ..~




صباح يوم التلاتاء , هاد الاسبوع شوووب , محدش ناوي يصوم فيه .السطول الملونه بعيد عنكم هدول سطول الزباله , ازرق اعاده تدوير , اخضر للاكل وللحشيش , اسود للزباله .

؛




جوى شغلي ,بكدرش اصوّر , دايما لما بدي اصوّر لازم اظهر كأني بدي اصور شهيره , لانو ممنوع , في كصص كتيره بتصير بالمحل وممنوع تطلع برى وخاصه هاي الايام , وخاصه هاد المحل لانو المدراء مش هم المدراء الاصليين , وهاد المحل ع ايام العز تصير فيه سرقات وكصص , لهيك محدش بحب يشتغل بهاد المحل . احكي عن الطاوله اللي ع الباب , كل فتره نحكي كل ساعه او كل ما يجي زبون وبده وكت وهو نحكي بده يشتري بندخله جوى , ولانو اغلب الزباين مشاكل فاضيه , يعني دفع فواتير , مشاكل ايميلات وبلفونات خربانه , وهدول لانو ما راح يعملوا اي مصلحه للشغل وللمحل بنخليهم برى , مين اللي كاعد غاد ؟! ابو الازرق ع اليمين انسيت اسمه اسمه صعب , من اصحاب المحل , بمعنى انو هاد المحل الاصلي تبعه اللي بشتغل فيه شاطر بالشغل ومنيح يعني لما صدفت اجى الوكت نكون مع بعض عالطاوله ساعدني , اللي جنبه شو احكي عن اللي جنبه اسمه كيفن , كمان من اصحاب المحل , بس مسميته كفن , هاد طول الوكت وهو محشش , ريحته وعيونه , وكسووووول اشي فوك العاده , يعني كانت تيجي ايام ما يشتغل طول النهار ولا يساعد ولا زبون , بالاخر المدراء زهكو منه وسمعوه حكي , ومع هيك لانو طافي ف بضّحك , لما اشوفه بضحك , ولما اشوفه كيف بتعامل مع الزباين وماخدهم ع كد عكلهم كمان بضحك , وهو بكون حبيب جيسكا اللي كانت تشتغل معانا بالمحل الرئيسي , بس بكرهنا واحنا بنركهه ع هوى كرهنا لجيسكا وكرها النا , جيسكا وشهيره بحبوش بعض , بتعرفوا كيف غيره البنات وغير انه باخر فترات كانت تعمل مشاكل الي ولشهيره مشان بنضل مع بعض , هي هلكيت حامل لهيك ما بتيجي عالشغل .

||




الوكت اللي اسمعت فيه عن كصه شفت مسائي وشفت صباحي واتنكدت بالشغل , لهيك لما اخدنا البريك التاني فش بعد الكهوه هيك تحسن مزاجي , بالعاده شو بشرب , من اكتر اشي لاقل اشي . دبل شوت او تربل شوت , هي الوحيده اللي بتعدّل مزاجي , وباليوم بالعاده بشرب 4 شوت, كل دبل كل ساعتين واشي , غير الكهوه اللي بشربها الصبح بالبيت , او بالليل بالبيت , بشرب بلاوي كهوه بلاوي . فش عليها ولا اشي مرات بطلب مكعب تلج واحد اد كانت كتير سخنه وفش وكت استنى لتبرد لاشربها , ومرات بطلب كهوه سمرا فيها شوت واحد وكاسه صغيره , بس بشوفش مفعولها قوي , ومرات اد كنت مش بحاجه ضربه من الكهوه لاصحى , شوفوا صعوبت طلبي بحبش الحليب بالكهوه من مره وبحبش الحلاوه كمان , وبحبش الرغوه كمان , بس عشان هيك احكي تحلايه بطلب كارميل ماكياروا بس مع زياده شوت , يعني دبل شوت وفش الا نكطه كارميل عليها وفش رغوه ومع حليب اللوز , ف بصير اكتر من نصهها شوت وشوي حليب مع شوي كارميل .

السلام عليكم ..~

من عصر يوم السبت || 5\30\20 ..~



بالعاده زي هاد اليوم بكون اشتغل , بس لاني كرفانه الشغل طلبت من شهيره انو ما نروح عالشغل اليوم واستغربت انها وافكت , لهيك اليوم انا بالبيت ومن شوي اختي الكبيره مع اولادها كانوا عندي وانبسطت كتير معاهم .

نرجع لاخر يوم كنت فيه بالمدونه , ارجعت اغيب مع انو كانت نيتي اكون متواجد كل يوم , بس مزاجي ما بسمح من مره , خاصه لما اكون راجعه من الشغل مكهوره وتعبانه , بكونش بدي الا بس ارمي حالي عالتخت واشوف بمسلسل شو مكان , المهم التهي فيه وما افكر بالشغل حتى لو بيدخل مجريات الشغل معاه .

بعد ما كنت ع المدونه الاربعا اسهرت شوي , وما شوفت الا بلفوني برن , وحكيت بعقلي اخ يا ربي مين المزعج اللي بتصل بديش احكي مع حد , ما صدكت لما شوفت الاسم وعطول رديت , كديش انبسطت وكديش استغربت لانو مستحيل هالشخص يتصل عليا مستحيل لهيك وكفت اني استناه يتصل , وبعده هالتلفون رجع اختفى .~


يوم الخميس كان من اسوء ايام الشغل , مع زباين حمير , ومع نفس الكصه انو السستم ما بيزبط معي والتابلت بخرب , ودايما بطلع في سواد الوجه اني بعرفش اشي , هو صح بعرفش شغلات كتيره , بس بنفس الوكت اللي كاعده بعمل فيه بعرف شو هو , ومع هيك بزبطش معي , لهيك بكرهه الشغل وبكره اروح ع الشغل , اللي بكهر كمان انو محدش بيجي يشتغل الا انا وشهيره وكم واحد وكل المدراء , لهيك كلشي عليا وع شهيره , وعلينا ملان تدريبات نعملها وفش وكت نعملها ولما نعملها بيظهر انو ما عملناها ولازم نرجع نعملها .

اندمت انو ما صومت الخميس لانو كان الجو حلو , واخدت بس نص البريك مع شهيره لانو فش شغال لهيك بنفعش اتنين ياخدوا البريم مع بعض , واحنا كل ما ناخد بريك بنحب نتمشى كتير حتى واحنا ناكل , وما صدكت يخلص يوم الخميس بالشغل , لهيك اجيت عالبيت مكتئبه من اليوم , ورميت حالي وما عملت اشي الا اني حتى نمت بدري من النكد والنعس .

صور يوم الخميس :~



كان يوم الخميس ضباب وانا بحب الضباب .



ع باب المحل , مرات بزهك اكعد ع الطاوله اللي ع الباب , لهيك بحب اطلع برى ع الباب




بطريك الترويحه , اللي غاد مش غيم هاد ضباب , لانو محل ما بنشتغل بتكونش ضباب , بس مكان بيتنا في ضباب , لهيك بكون الضباب يمشي من المحيط واحنا رايحين ع البيت .

الاشي اللي عنجد بهوّن عليا الحمد لله انو انا ساكنه بمنطقه ضباب وبمنطقه كريب ع المحيط , شوفتهم بتبسطني
||

يوم الجمعه , اصحيت ابدر مشان نمت بدري وكنت ناويه اعمل شوي من روتين الجمعه قبل ما اطلع عالشغل , وبنفس الوكت مكانش نفسي اروح ع الشغل , بس فش فيها مجبوره اروح , عملت شوي من الروتين , وبالعاده بايام الشغل بفطر اوتميل بعملها ليكفيني كم يوم في الاسبوع الاسبوع , وبشرب كهوه بتكون جاهزه , اخوي بيعملها قبل ما يتسهل ع شغله , وهاي الكصص بتساعدني لانو بكونش بوكت وبكونش بمزاج اعمل فطور او كهوه , كنت شوي مرتاحه لانو حكيت مع جولان من يومين وسالته امتى راجع عالشغل وحكى الجمعه , لهيك لما يكون جولان معي الشغل بكون اهون عليا كتير لانو بساعدني كتير .

اوصلنا الشغل وما شوفتش جولان , ومكانش بالاصل حد الا المدراء . ايش الكصه ينعن شكلهم كلهم محدش بيجي عالشغل محدش !! احنا اللي فتحنا وكل زبون احيوّن من التاني وحاله حاله , اخ يا ربي , والله اشي بضّحك , كديش كان اليوم طويل ونكد , وفوك كل هاد من مره ما اخدنا البريم مع بعض , انا بس روحت اخد البريك ووشوفتها عشان احكيلها يالله ارجعي عالشغل , اخدنا بس اخر 15 مع بعض , وحكتلها ايش رايك ما نروح عالشغل بكرا عن اليوم , وحكت بتفكر وقررت انو اه , وغير انه واخيرا وصلني الاواعي اللي طلبتهم للشغل , ولماا رجعت ع البيت كانت نفسيتي منيحه مشان بديش اشتغل اليوم , بس كانت الدار كايمه كاعده والجلي بالمجلى , لهيك رتبت كلشي وحتى نمت بدري لانو عنجد كنت تعبانه .

اليوم اصحيت حوالي 9 الصبح , وافطرت واشربت كهوه وكملت ترتيب اللي عليا من امبارح وخاصه الغسيل , بس صار اشي , شوفت روميو ع الشباك , من اخر مره صار الموكف ما شوفته , بس اليوم شوفته , وكديش كنت متوجعه من جواي انو مش كادر افتحله واخده , اخ يا قلبي , واجت عندي الكبيره وانبسطنا وهيني ..~

||

صور يوم الجمعه :~





كانت السما يوم الجمعه حلوه



من روسومات الصبيه عنا بالشغل



اواعي الشغل واخيرا

||

خلصت الكوري المملكه الموسم الاول وبلشت بالتاني بعرفش ليش بشوفهم اجزاء مش مواسم
بلشت بمسلسل عربي كل اسبوع في يوم جمعه منيح لحد الان
وبلشت في مسلسل عربي لو ما التقينا بس بعرفش مش متحمسه
وشوفت صوره مسرّبه من مانغا المفضله , راح يلتقوا ؟ ولا حلم ؟
وارجعت لكتاب الفقراء
وعندي لعبتين اشتريتهم ع البلستيشن بس لسا ما العبت فيهم , بالاول لازم احكي عن اللي العبتهم

بشوفكم ع خير ()

السلام عليكم ..~

نص ليل من يوم التلاتاء داخل ع يوم الاربعا ..~

بكرا عطله لهيك لو اتاخرت بالكومه الصبح فش مشكل ..~

||

احد كان يوم عطلتي , اصحيت متاخره , وخواتي كانوا يحكو انهم راح يجيو عندي , داخليا مكنتش بدي , كنت ماله وزهكانه , والدار مرتبه , حكيت اد بيجيو الدار بتخرب وبكرا عليا شغل , بديش اشتغل جوى الدار برى , بس عشان كصص المظاهرات اللي صايره بالبلد عنا خواتي ما اجو عندي , الاشي الحلو اللي صار انو شوفت روميو , السبت شوفته ع الشباك بس مكدرتش اجيبه عندي لانو بديش يصير اي احراج مع صاحبه كريس , وكنت من جواي متوجعه , كتير بحب روميو عفكره , الاحد بعد الظهر , ما شوفت الا روميو جاي لحاله عليا , بالعاده انا صبيه بخلي باب البيت مفتوح مشان يتهوى البيت ومشان ساده اد بده يطلع ع الكراج , كتير بسمع حكي من امي انو انتبهي , بس خلص متوكله ع الله ليحيني ويحمينا كلنا , ف متل ما حكتلكم شوفت روميو عابر ع البيت عندي , كديش انبسطت من جواي كتير واخيرا , بعد بتواني اجى كريس بدق عالباب , وبحكي روميو طلع من غرفته وبده يتاكد اد اجى عندي , حكتله اه هلكيت بجيبه , حكى لا خليه بس بدي اطمن , بالزبط ضل عندي روميو وكان يروح ويجي من بيتي لعند كريس وكان كديش مبسوط وانا كمان , هاللي صار خفف عليا من اللي بفكر فيه .

||

يوم الاثنين كان يوم سيء جدا بالشغل , الزباين حمير , وضليت واكف ع اجريا , وفلسفه المدراء , وحياه الله كلشي ما بزبط معي كلشي , بكون زابط ولما اجي انا بخرب , بزكرني بكل شغل ابلش يخرب كلشي فيه , كلها دلائل اترك الشغل , كان يوم طوييييل , بس الحلو انو واخيرا اجى جولان , جولان رهيب , بضّحكني , وبساعدني , وحياته كلها معامرات , والحكي معه حلو كتير , حبيت انو اخدنا البريك مع بعض , وكنا نتمشى مع بعض , ما صدكت اوصل البيت , وكعدنا نعمل عشا انا واخوي ومكنتش كادر افتخ عيوني ولا اوكّف بالمطبخ , بس اتحملت لوكت العشى , اكلت شوي , وعطول ع التخت وما عملت اشي , كنت تعبانه كتير , النفسيه عندي بتهد جسمي , يعني بشوف انو الهم والغم بتعب جسمي , وانا من جوي مهمومه عشان شغلي واللي جاي فيه انو راح اتاخر بالليل وفش سياره وحظر التجوال وحاله , وهم مش مكدرين اللي بصير فيا حتى لو حكتلهم , نمت بدري قبل صلاه العشا , اصحيت ع بلفوني برن بعد نص الليل , وامبين ما اسمعت المره الاولى وهو يرن , وضل يرن لوكت ما اصحيت وشوفت الاسم , حكيت بعقلي سامحني مش كادره اكون معك هالليله , بعرف انو بدك حد تحكي , بس انا كمان بدي حالي يرتاح , بالعاده بعمل وضع طيران بس من وكت ما ارجعت عالشغل والاوضاع دايما تلفونات ومسجات من الشغل بتوصلنا , وزي اليوم بتروح عليا نومه ولازم حد يتصل يصحيني , ضليت اصحى كتير بالليل وكوابيس صعبه وحاله , اصحيت اليوم التلاتاء ع 4 الصبح ومعرفتش ارجع انام الا ائن 6 ونص , ولما رن المنبه طفيته وارجعت نمت , لولا بنت اختي بتتصل اول ما طلعت من دارها انها بالطريك , راحت عليا نومه اخت شلن اليوم ..~

ما اشربت كهوه بالدار اخدت تفاحه واطلعت بسرعه الا هي جايه , اوصلنا الشغل واشترينا كهوه لاني بعرفش اصحى بدونها وبلش شغل اليوم , اخ يبي ع يوم التلاتاء , اليوم ينزكر وما ينعاد , ال 4 مايكنات بس معاي انا خربوا , كل ما اجرب مكينه مع اي زبون ما تشتغل اروح ع مكينه تانيه كمان ما تشتغل , جربت اليوم كل المكينات وكلهم خربوا معي , وزبون اشتري اغراض وكل شوي وهو راجع بده يرجعهم مش مره تلات مرات , والتابلت مش شغال ولا حتى المكينه ولازم اكتب الارقام الطويله يدوي وحاله , وكل مره المكينه تخرب , اكون معصبه وبنفس الوكت اكعد اضحك ع نصيبي , واضحك مع حالي , وفش مدير الا اجى ويسالني كلشي تمام مريم ؟ لانو امبين ولا اشي تمام , وشهيره تيجي تسالني خالتي كل شي تمام ؟ ودايما جوابي اه , لانو والله انا عارفه المشكله وعارفه الحل بس التابلت مش راضي يزبط معي مش راضي , بالاخر بعد ما خلصت مع هالزبون , شفك عليا واحد من المدراء واعطاني التابلت تبعه , وحكتله , انا بعرف حالي اني بعرفش ولا اشي بس لما يصير هاد الاشي معي بصير كأني بعرفش دبل وبلس , كان ردت فعله انو مش مشكل وبتصير ..~

ما صدكت هاليوم يخلص بالشغل , لانو صارت مظاهرات وفي حظر وكصص وكرف , وراح ابلش اسكر المحل من يوم الخميس وراح اشتغل بدون شهيره ومش عارفه كيف راح اروح ع شغلي وارجع ع البيت يالله شو الاشي صعب معاي , كل مالها بضيق عليا وامي بضل تحكيلي ما بضيق الا لتفرج , اوصلت البيت وكنت جعانه وعملت اكل وكان المطبخ كايم كاعد عشان امبارخ نمت بدري وما رتبته بعد العشا , لهيك اليوم رتبت المطبخ ووصلني تنبيه انو المانغا المفضله عندي نزلوا الفصل , ويالله عطول قراتها وشوفتها قصيره اليوم , واخيرا بعد سنين التقوا , ملامح وجوهم , عطول خلفيه للكمبيوتر , عاد اكعد استنى اشهر للفصل التاني مشان اشوف شو ردت فعلهم وجوهم مش عبعض , لأ بديش كره بينهم ! وهيني ..~


فش وكت لاشوف اي اشي لانو يا مدونه يا فلم , وبحب المدونه , الله يهونها علينا كلنا لانو الامور بتصعب كاعده وصايره معنديش البال لاتحمل او لارضى .. حتى ما صورت اي صوره باليومين , مكانش الي نفس ..~

واحد حلو والتاني وجه مشّطب ..~
كم مره راح اضل احلم ؟ ازعاج ! بس مع هيك صارلنا زمن .
كلشي راح ينتسى لانو الزكريات قصيره ..~

بشوفكم ع خير ()

السلام عليكم ..~

10 واشي بالليل من يوم عطلتي الاربعا ..~

6\3\20 .

||

امبارح اسهرت شوي اجاني تلفون واتاخرت فيه , واصحيت اليوم بدري , استغربت من حالي وحتى اصحيت مرتاحه وشبعانه نوم , ومش عارفه شو الاشي اللي خلاني اول اشي اعمله اني اكوم من التخت واروح افتح باب البيت , كان من ربنا لانو لكيت روميو فاتح شباك غرفته وكان يستنى ع باب بيتي , يعني الله ستر ما طلع ع الشارع , عبرته عندي , افطرت واشربت كهوه ورتبت البيت , وحكيت بدي اروح اشغل السياره صارلي يمكن اربع ايام مش مشغلها وبديش اياه تخرب لاني ما بسوكها , وسبحان الله اللي كنت افكر فيها صار , السياره خربت , ما بتشتغل , وكنتي استدعي ربنا انو المشكله تكون من البطاريه , حاولت اشغل فيها عالفاضي , حكيت احكي مع حبي , الله بحبني كان موجود مش نايم او متوجع , تلفونات وكميرا وكصص وكل اشي بحكي البطاريه , مع انه شوفت فش زيت , وحكى وتشغيل السياره عشر دكايك مرتين بالاسبوع مش هالاشي اللي يخليها ماشيه لازم اكتر وكت , بعدها حكيت مع اخوي واحد مشان يجي يشحنها ومشان اشتري بطاريه اد بس هيك مشكلتها مش اشي تاني , بس ك تجريب انو نشحنها , اخوي كان بالشغل واتفكنا انو يجي عندي العصر بس يخلص من الشغل , كنت لسا ع تلفون مع حبي ولسا عند السياره لاني كنت ادور ع الاشتراك اللي هو السلك او الوصله اللي بتشحن من سياره لسياره , الحمد لله لكيت واحد معي بسيارتي , ونشوف شو حجم البطاريه عشان اشتري الصح وشو الزيت لانها بتهرّب زيت كمان , بحمد الله كتير ع انو في حد يساعدني بهيك اشي , لانو وانا بالبلاد كان ابوي الله يطول بعمره يساعدني بكل هاي الكصص حتى تغير البنشر والعجال , اتعلمت منه كتير بالسيارات , بس هون بامريكا كلشي صعب لانو الناس بتكون مشغوله وفش لا جار ولا صاحب , لهيك حمدت الله انو مش متكاتله مع حبي وانو بنحكي , اليوم كان شوووب اشي كتير , وانا لسا بحكي مع حبي ما شوفت الا اختي ايمان جايه عندي , سكرت مع حبي , وهي لما شافتني وشافت كيف وجهي احمر من الشمس ومن الكهر والخوف انو تطلع مشكله السياره مش بس البطاريه , عطول نزلت من سياره بنتها وحكت شوي في .؟ حكتلها السياره ما بتشتغل واوعك امي تعرف وحكيت مع اخوي وراح يجي بعد العصر نجرب اد الشحن بحلها , وجهها لاختي خافت انو احكيلها خلي بنتك تشحنها , بس مستحيل اقرب ع اشي من طرف زوجها عشان لو بعد عشر سنين خربت سياره بنتها يحكي الحك ع اختك لما شحنتو سيارتها , عبرنا البيت وحكت تكهريش حالك وان شاء الله بس مشكله بطاريه , ضلت عندي وبعد بشوي اجت اختي الكبيره , وضلوا للعصر لوكت ما اجى اخوي واحد وضلوا كمان لوكت ما خلص بلشت التلفونات ترن انهم اتاخروا عندي , لهيك هم اتسهلوا وانا واخوي واحد بلشنا بكصه شحن السياره , ما اشتغلت من الشحن , لا من المره الاولى ولا التانيه , بعدها كعد اخوي يغّير في الفيوزات زي تبعات كهربا السياره , وكعدنا كمان نشحن لوكت ما الحمد لله اشتغلت , بس في خوف انو باي لحظه ما تشتغل وانو لازم اشتري بطاريه للسياره وانو اغير الزيت وانو بنفش اضل مصفوفه ع طلعه بس انا سكانه بمنطقه طلوع وصعود وجبال يعني فش خيار , فا الحمد لله الكهر اللي انكهرت اليوم انتهى بانو اشتغلت السياره وانو ع امل اد بشتري بطاريه تانيه ما راح تواجهني المشكله , اقرب فرصه راح اشتري البطاريه والزيت , وهاد كان يومي , الله لا يدوكم زي هيك لانو هاي سياره تانيه بامريكا بتخرب معي ومعيش مصاري لسيارات تانيات , وما صارلها معي سنه او اظن صار سنه وكم شهر ..~

بكرا راجعه ع الدوام واخ يبي ع اللي جاي , ان شاء الله مهونه , عفكره صرت اخاف من بكرا ..~



هاي الصوره الكل فكر انو فش فيها بنزين عشان السهم تبع البنزين ع الصفر , الضربه الاوله للمفتاح هيك ,والضربه التاني بطلع السهم بمنطقه البنزين ع الربع وانو فش حزام امان , وكله مش مهم عندي كان الا انو اهون اشي البطاريه لانها بتتغير ..~ ويا رب اغيرها وما اواجه مشاكل مع السياره مش ناكصني ..~



وكت الشحن

||

اشوفكم ع خير

السلام عليكم ..~

من ليل السبت , 6\6\20 ..~

||

خميس وجمعه وسبت كله ايام شغل , وانا وشهيره مش نفس الساعه بنشتغل مع بعض , دايما فلسفه من المدراء انو لازم نبيع , النفسيه والمزاج من مره بالشغل لانو ارجعنا نسكّر8 واشي بالليل , زباين مش مناح , وزي بكرا بدي اشتغل لحالي بدون شهيره , يعني محدش يساعد , يعني بزهك حالي وبكون صعب بدونها , وفوك كل هاد عليا شغل 6 ايام سحبه واحده , عطلتي لسا الاربعا الجاي , اسبوع كامل شغل من الصبح لليل , بزبطش الشغل معي , بعرفوا عني بعرفش اشي بالشغل وبزهكوا مني , فش وكت لاعمل اي اشي بحياتي لا مسلسل ولا لعبه , يالله يالله اعمل عنايه لوجهي الخربان من قله نوم وتوتر شغل , وصحيح سيارتي مش اشتغلت , تاني يوم لما جربتها ما اشتغلت , وفي عنا تزبيط شوارع لهيك لازم اشيل السياره وفش وكت اشتري البطاريه , ويا رب تكون مشكلتها بس , صحتي كمان مش عبعضها , مرات ظهري بيملع عليا ومعدتي ..~ ومع هيك هيني ماشيه وعايشه .






شغلات اتزكرها لامشي ..~

بكدرش اغيّر الماضي
التفكير الزياده بعمل كآبه
السعاده موجوده بشغلي
ما تسمع للنميمه عنك
دوّر عن المنيح باللي بصير
ضل اضحك ع كلشي
عادي تعيش حياه الناس التانين ما بفهموها

الله يهونها علينا كلنا ويسهّل امورنا ()

السلام عليكم ..~

من يوم عطلتي الاربعا بس لانو لسا الدنيا نهار ومزاجي منيح ما بيطلع حكي معي عن الاسبوع الكئيب اللي مر عليا .. لهيك راح احكي عن شغلات اشتريتها واستخدمتها ..~

بشهر رمضان ايش اشتريت واستخدمت .. لانو نصه كنت بالبيت فا كان اشي عندي حلو , لما ما اكون اشتغل بكون معي لوكت لحالي لاني بعرف انظم حالي , لانو مش كل نهاري برى البيت في الشغل ..~



هاد شو استخدمت !

كنت كل يومين استخدم قناع لوجهي , واوصلت لمرحله انو كل الجرار تبع الاقنعه بده يخلص لهيك اشتريت كمان اقنعه ..~

- اقنعه when , لسا ما جربت منهم لحد الان , وهاي اول مره بستخدم الشركه .
- اقنعه purlisse جربت انواع كتيره وكانت من الاقنعه اللي سعرها منيح ونتيجه حلوه كتير , وهاي المره الاولى اللي بجرب هاد النوع عجبني بس شوفت في نوع تاني احسن , وكتير جربت اشياء من الشركه من كريمات , في كريمات احبها وفي كريمات تكون عاديه مش واو . بس ما كنت اكره اشي منهم .
- اقنعه frudia اول مره بستخدم اشي من الشركه , وعجبني كتير كتير .
- اقنعه tula جربت ملان شغلات من هالشركه وكلشي احبه كتير , بس مشكله انو في اقنعه تسحل معي واقنعه لأ , ولانو بس بدها بالكتير عشر دكايك وانو نوع مطاط اكتر من قماش لهيك بين كل هالانواع هاي الانواع مفضله ..~

-وجه مخده سلك , لاني بس بستخدم سلك للمخده مشان يخفف من الحبوب من وجهي وما يهنفش شعري , بس نوع غريب , انو مفتوح من كل الاجناب لهيك حبيت اجربه وانو جهه واحده بس سلك , بعرفش يعني اولها بتكون واو بعدين مع الغسيل والدعك بتخرب يمكن , ع امل لأ , لحد الان كلشي تمام معاها .

- صفطه من كل الاقنعه اللي استخدمتهم من وجه عيون تم

- توع كريم لقشره الراس مشان القشره , من زمان عندي بس هجرته وعاودت ارجعتله , الحلو فيه انو مفعوله بسرعه , يعني بحط ع المفارق بالراس بخفي القشره لكم ساعه , بس لازم تاني يوم تغسلي شعرك لانو بصير دهني اشي مش طبيعي , ما اظنش راح اشتريه كمان مره .
انا بوكت بستحدم شامبو للقشره صراحه واخيرا زبط شامبو معي , بس مع الوكت ببلش يخفف من القشره .

- 111skim اد بنسال شو هي الشركه المفضله عندي بين كل انواع الكريمات والشركه اللي اه بدفع مبالغ كبيره عليهم بكون جوابي هاي الشركه , من وكت ما جربتها فش اشي يعلى عليها , من اقنعه لسيروم لكريم لاي اشي منهم .
phase anti blemish لهيك جربت سيروم للحبوب , كان رهيب للحبوب الصغيره وللحبوب اللي تحت الجلد , بس اد حبوب كبيره لأ ما اشوف نتيجه .

- كريم للايدين .
- عطر .



هاد كان شو خلصته واشتريته بشهر رمضان .